U piatnicu prezident Rasii Uładzimir Pucin pravioŭ telefonnuju razmovu z kancleram FRH Ołafam Šolcam, u jakoj łžyva śćviardžaŭ, što finansavaja i vajskovaja dapamoha Ukrainie stvaraje situacyju, pry jakoj Kijeŭ kateharyčna adchilaje pieramovy. Šolc u svaju čarhu zajaviŭ, što luboje dypłamatyčnaje raźviazańnie kanfliktu pavinna ŭklučać vyvad rasijskich vojskaŭ z terytoryi Ukrainy.
Razmova z Šolcam supała z dypłamatyčnaj inicyjatyvaj prezidenta ZŠA Džo Bajdena, jaki ŭ čaćvier zajaviŭ, što hatovy havaryć z Pucinym, kali toj budzie šukać sposab pakłaści kaniec vajnie. Pradstaŭnik Kramla Dźmitryj Piaskoŭ pačuŭ u słovach Bajdena prapanovu ab vyvadzie vojskaŭ i adchiliŭ jaje, zajaviŭšy, što «śpiecyjalnaja vajennaja apieracyja» budzie praciahnutaja. A jašče raniej kiraŭnik MZS Rasii Siarhiej Łaŭroŭ kazaŭ, što Zachad pavinien prajavić hatoŭnaść abmierkavać dakumienty, prapanavanyja Maskvoj u śniežni 2021 hoda (ab «harantyjach biaśpieki»).
ISW raniej aceńvała rytoryku Pucina jak ukazańnie na toje, što jon nie zacikaŭleny ŭ surjoznych pieramovach z Ukrainaj i zachoŭvaje maksimalisckija mety vajny. Toje, što Pucin, a taksama Piaskoŭ i Łaŭroŭ viarnulisia da temy pieramovaŭ, ekśpierty tłumačać žadańniem stvaryć u Zachadu ŭjaŭleńnie pra toje, što Rasiju treba zavablivać da pieramovaŭ.
«Kreml, vierahodna, maje namier stvaryć situacyju, pry jakoj zachodnija ŭłady buduć prapanoŭvać papieradžalnyja sastupki ŭ nadziei pierakanać ustupić u pieramovy, nie patrabujučy naŭzamien značnych papiarednich sastupak ad Rasii, — kanstatuje ISW. — Zajavy Pucina, Łaŭrova i Piaskova padkreślivajuć, jakimi mohuć być niekatoryja z žadanych previentyŭnych sastupak: skaračeńnie finansavaj i vajskovaj dapamohi Ukrainie, pryznańnie anieksii Rasijaj ukrainskaj terytoryi i abmiežavańni na vajennyja dziejańni NATO i Zachadu ŭ Jeŭropie».
Maskvie było b vyhadna časovaje mirnaje pahadnieńnie, kab atrymać paŭzu ŭ bajavych dziejańniach, adnak Pucin nie prajaŭlaje asablivaj cikavaści da takoha spynieńnia ahniu, miarkujuć ekśpierty. Kreml praciahvaje vystaŭlać patrabavańni, raŭnasilnyja poŭnaj kapitulacyi Zachadu, namiakajučy, što Pucin pa-raniejšamu zasiarodžany na dasiahnieńni vajennaj pieramohi. A dla atrymańnia previentyŭnych sastupak Rasija sprabuje vykarystoŭvać sieryju udaraŭ pa ŭkrainskaj infrastruktury i źviazanuju ź joj humanitarnuju situacyju, vynikaje z ahladu ISW.
