Rasijskija mabilizavanyja. Fota: RIA Novosti
Na dumku ISW, prychavanaja mabilizacyja budzie praciahnutaja, pakolki prezident Rasii, z adnaho boku, kaža, što kolkaść mabilizavanych u RF skłała 318 tysiač čałaviek — nibyta za košt dobraachvotnikaŭ, a ź inšaha boku — u hety ž samy dzień padpisvaje zakon, jaki dazvalaje pryzyvać hramadzian ź niaźniataj ci niepahašanaj sudzimaściu za ciažkija złačynstvy (što na praktycy šyroka prymianiałasia i da zakona).
Rasijskija ŭłady taksama spadziajucca, što prastymulavać dobraachvotnikaŭ moža padpisany Pucinym ukaz, zhodna ź jakim mabilizavanyja i naniatyja pa kantrakcie vajskoŭcy atrymajuć adnarazovyja vypłaty ŭ pamiery 195 tysiač rubloŭ. Adnak takija vypłaty akazvajuć cisk na rasijskuju ekanomiku i mohuć vyklikać sacyjalnuju napružanaść, kali Kreml nie vykanaje svaje finansavyja abaviazacielstvy pierad udzielnikami «śpiecyjalnaj vajennaj apieracyi», — havorycca ŭ zvodcy. Pakul rasijskija hubiernatary ŭžo vypuskajuć zajavy, u jakich sprabujuć apraŭdać zatrymki z vypłataj kampiensacyj mabilizavanym i ich siemjam.
Samich ža mabilizavanych užo sprabujuć vykarystoŭvać u nastupalnych apieracyjach na danieckim kirunku. Vajskovyja ekśpierty spasyłajucca na hałoŭnakamandujučaha USU Valeryja Załužnaha, pa słovach jakoha, rasijskaja armija ŭtraja pavialičyła intensiŭnaść bajavych dziejańniaŭ na asobnych učastkach frontu. A ŭkrainski Hienštab paviedamiŭ, što hetyja nastupalnyja apieracyi — u kirunku Bachmuta, Aŭdziejeŭki i zachodniaj častki Danieckaj vobłaści. Pry hetym u zvodcy havorycca, što drennaja padrychtoŭka, łahistyka i kamandavańnie mohuć pieraškodzić rasijskim vajskoŭcam dasiahnuć značnych pośpiechaŭ, jakija b istotna paŭpłyvali na chod vajny.
Inšaja prablema Rasii — zaležnaść ad iranskich bieśpiłotnikaŭ. Ekśpierty ISW adznačajuć, što heta dazvalaje Iranu akazvać bolšy ŭpłyŭ na rasijskich čynoŭnikaŭ dla padtrymki svajoj jadziernaj prahramy.
