Fota: Pixabay
Tendencyja ačałaviečvać žyvioł časta pryvodzić da pamyłkovych dyjet i źniasilvajučych pracedur, piša The Times. Pavodle EthicsFirst — hrupy vieterynarnych śpiecyjalistaŭ i navukoŭcaŭ Vialikabrytanii — «dyśnieifikacyja» žyvioł tolki mučyć ich.
Tak, niekatoryja haspadary prymušajuć vieterynaraŭ rabić dla svaich pažyłych hadavancaŭ pratezy noh abo arhanizujuć dla ich źniasilvajučaje lačeńnie raku.
Žyvioły zdolnyja na kałasalnyja emacyjnyja pieražyvańni, ale jany nie pieražyvajuć ich tak, jak ludzi. Jany adčuvajuć žyćcio ŭ režymie realnaha času. «Adna sprava, kali dziadula zhadžajecca na chimijaterapiju, bo viedaje, što heta značyć, a inšaja — padviarhać joj sabaku, jaki nie maje mahčymaści spadziavacca», — kažuć vieterynary.
U toj čas jak antrapamarfizm — prypisvańnie čałaviečych emocyj i pavodzin žyviołam — moža spryjać supieražyvańniu, jon taksama pryvioŭ da niepatrebnych rečaŭ, takich, jak kałyski, adekałon dla chatnich žyvioł, šampuni, padhuźniki i srodki dla aśviažeńnia dychańnia, kažuć daśledčyki.
Apytańnie, praviedzienaje siarod 230 000 uładalnikaŭ sabak, pakazała, što 47% śpiać sa svaim sabakam u adnym łožku. Navukoŭcy ź Italii paviedamlajuć, što sabačyja džempiery, viehanskija dyjety i navat zališnija abdymaški z sabakami mohuć vyklikać surjoznyja prablemy.
Apranańnie sabak u džempiery, naprykład, moža pieraškadžać zdolnaści sabaki rehulavać ułasnuju tempieraturu, pavyšać uzrovień vilhotnaści skury i vyklikać naciortaści.
Trymańnie abo našeńnie chatnich žyvioł na praciahu doŭhaha času moža vyklikać atłuścieńnie, zapaleńnie sustavaŭ i pieraškadžać ich zdolnaści prystasoŭvacca da navakolnaha asiarodździa, što pryvodzić da tryvožnaści. A naviaźlivaje abdymańnie sabaki ci koški možna razhladać jak ihnaravańnie pieravah i žadańniaŭ žyvioły.
Prafiesar Edzi Kłatan, jaki vykładaje vieterynarnuju aniestezijałohiju ŭ Edynburhskim univiersitecie, kaža: «Ludzi adčuvajuć, što abaviazany zrabić dla svaich blizkich usio mahčymaje, zapłacić za samaje darahoje lekavańnie, pasprabavać usio. Tak, jany mohuć być častkaj siamji. Ale kali abychodzicca z hadavancami jak ź ludźmi, to heta faktyčna prymianšaje toje, čaho jany žadajuć nasamreč — kab pra ich kłapacilisia jak pra sabaku ci kata».
