«Ciapier svabodnaha času dla zapisu niama». Ahlad mahčymaściej
Hiermanija. U červieni ambasada hetaj krainy ŭ Minsku adnaviła pryjom dakumientaŭ na turystyčnyja vizy: u Hiermanii časova źniali karanavirusnyja abmiežavańni. Rehistravacca na padaču dakumientaŭ treba anłajn, ale pryjdziecca manitoryć i łavić daty ciaham dnia. U jaki čas ich «vykidvajuć», nieviadoma.
Na sajcie ambasady adznačajecca, što ciapier nazirajecca vielmi vysoki popyt na zapis dla afarmleńnia šenhienskich viz. Taksama tam prosiać nie źviartacca da płatnych pasłuh trecich asobaŭ dla braniravańnia zapisu.
Italija. Zapis ažyćciaŭlajecca na sajcie vizavaha centru hetaj krainy i pa telefonie da 12 hadzin. My pasprabavali pieršy varyjant, zapoŭnili ankietu, i prahrama vykinuła šmat dat, ale ni adna ź ich nie klikabielnaja.
Hrecyja. Dakumienty možna padać praz hrečaski vizavy centr u Minsku abo ŭ hienkonsulstvie ŭ Maskvie. Vyjavić dastupnaść dat u minskim vizavym centry nam nie ŭdałosia, tamu što zarehistravacca na sajcie — toj jašče kvest. Inšaha sposabu zabraniravać dzień padačy niama.
Darečy, krynicy siarod turfirmaŭ raspaviadajuć, što hreki čaściej za ŭsio adkryvajuć vizu na adno padarožža.
Danija. Dacki vizavy centr u Minsku niekalki miesiacaŭ tamu adnaviŭ pryjom zajavak pa ŭsich katehoryjach viz. Papiaredni zapis dla padačy dakumientaŭ nie patrebny. Dakumienty ŭ vizavym centry prymajuć z 9 da 16 hadzin pa budnych dniach biez papiaredniaha zapisu.
Servisny zbor — €53, ale ž cana vizy ŭ Daniju — €80, a nie €35, tamu što dadatkovaje pahadnieńnie pamiž Biełaruśsiu i Danijaj nie zaklučana.
Słavakija. Padacca na šenhien hetaj krainy možna pa žyvoj čarzie abo treba manitoryć volnyja daty na sajcie vizavaha centra. Apošniaje nam nie ŭdałosia z-za niemahčymaści aktyvacyi akaŭnta.
Vienhryja. Vyłavić svabodnyja daty na sajcie vizavaha centra i konsulstva Vienhryi davoli składana. «Paviedamlajem vam, što ciapier volnych pryjomaŭ niama. Dadatkovyja słoty buduć dastupnyja ŭ bližejšy čas. Kali łaska, pasprabujcie paźniej!» — napisaŭ sajt konsulstva ŭ adkaz na našu sprobu.
Zarehistravacca z dvuch imejłaŭ na sajcie vizavaha centru taksama apynułasia niepasilnaj zadačaj: abiacanaja spasyłka dla aktyvacyi akaŭnta nie pryjšła. Ale ž na sajcie isnuje premium-pasłuha, kali mabilny vizavy centr pryjedzie da vas dadomu dla pryjomu zajavy na vizu. Niaredka ludzi, viedajučy situacyju z datami, adrazu karystajucca pasłuhami turfirm.
Nahadajem, što pradstaŭnictvy Polščy i Litvy nie prymajuć dakumientaŭ na turystyčnyja vizy, ale prymajuć na nacyjanalnyja i humanitarnyja.
«Dva miesiacy čakali, ale ničoha nie atrymałasia»
Alaksandra (imia žančyny źmieniena) razam z mužam afarmlała vizu pad tur: para spačatku chacieła ŭ Italiju, ale mieniedžaram nie ŭdałosia ich zapisać.
«Heta było ŭletku. My dva miesiacy čakali, ale ničoha nie ŭdałosia. Čerhi, prablemy z zapisam… I ja čuła, što ciapier u italjanskim centry vizy adkryvajuć na nievialiki čas. Moža, i dobra, što tak vyjšła», — zhadvaje Alaksandra.
Paśla niaŭdałaj sproby minčanie vyrašyli pajści ŭ vienhierski vizavy centr — i tam usio prajšło dobra.
«Prykładna tydzień čakali vizy ź vienhierskaha VC. I ja, i muž atrymali šmatrazovyja vizy. Ale roznych terminaŭ z-za roznaj vizavaj historyi, ja liču. Potym pajechali ŭ jeŭratur z abaviazkovym naviedvańniem Vienhryi», — raspaviadaje žančyna.
Fota: pixaby.com
Raniej u jaje było šmat hadavych viz, tamu Alaksandry adkryli multyšenhien na dva hady, a jaje mužu — na niekalki miesiacaŭ.
«Byli prykłady, kali ludziam i na 4 hady adkryvali. Chapaje tych, chto taksama praz tur adčyniaje vizu, — adznačaje jana. — Hałoŭnaje — treba pamiatać pra pieršy zajezd u krainu».
«Ja spadziavałasia na canu da 500 rubloŭ i, miakka kažučy, była ŭ šoku»
Alena (imia źmieniena) niekalki dzion tamu padałasia na nacyjanalnuju vizu ŭ Polšču. Vyrašyła sama, tamu što ŭ ceńniki ŭ pasiarednikaŭ — 1000 rubloŭ
«Paśla abjavy ab mabilizacyi ŭ Rasii vyrašyła, što sapraŭdy treba rabić vizu, pakul jość mahčymaść vyjechać. Prahladzieła forumy, padpisałasia ŭ Instagram na turahientaŭ, kab razumieć, jakija jość vizy i na kolki ich zaraz dajuć. Razumieła, što praca ahienctva budzie kaštavać niejkuju sumu, ale na toj momant jašče nie cikaviłasia. Vyrašyła, što mnie patrebna mienavita multyviza, daŭhaterminovaja i šmatrazovaja», — pačynaje Alena.
Fota: pixaby.com
Pavodle jaje słoŭ, lepš za ŭsio dajuć šmatrazovyja vizy mienavita pad zaprašeńnie, dziełavyja pajezdki, ale ž svajakoŭ u ES u minčanki niama — tolki siabry.
Takim čynam dziaŭčyna pasprabavała varyjanty amal va ŭsich mahčymych vizavych centrach.
«U Francyi, Hiermanii i Italii vielmi praciahły zapis. Ciapier dźvie pieršyja, nakolki ja viedaju, dajuć daty na śniežań, Italija — naohuł tolki na viasnu praź vizavy centr. Choć i jość ščylina zapisacca ŭ konsulstva Italii, ale taksama za ennuju sumu hrošaj, — adznačaje dziaŭčyna. — Ispanskuju vizu zaraz možna atrymać tolki ŭ Maskvie, ale ž zusim nie chočacca jechać u Rasiju, plus prablema viartańnia biez pašparta».
Ale ŭ vyniku Alena vybrała Polšču. Z-za taho, što ŭsie jaje vizy za apošnija 10 hadoŭ byli polskimi i byŭ dośvied zapisu. A taksama jana doktarka, a ŭ Polščy jość admysłovaja prahrama dla miedykaŭ.
Fota: pixaby.com
«Polšča turystyčnych vizaŭ nie daje, ale zatoje daje humanitarnyja. Na hod, z mahčymaściu znachodžańnia ŭ krainie 365 dzion i z mahčymaściu pracaŭładkavańnia. Taksama zaraz jość mahčymaść padoŭžyć humanitarnuju vizu na terytoryi Polščy ci padacca na humanitarny VNŽ», — tłumačyć biełaruska.
Pasiarednik skinuŭ canu za broń čarhi — 1000 rubloŭ, a da hetaha tranślavaŭ u storyz, što 90% stanoŭčych vychadaŭ i 10% admoŭ.
«Ja čakała canu da 500 rubloŭ i, miakka kažučy, była ŭ šoku. U vyniku palezła na forumy i pračytała dośvied papiarednich rehistracyj. Pakolki na papiarednija vizy ja taksama sprabavała zapisacca sama, była hatova, što daviadziecca patracić šmat času i nie spadziavacca, što ź pieršaha razu ja zmahu», — zhadvaje Alena.
Pavodle jaje słoŭ, daty vykidvali kožnuju sieradu, sajt u hety dzień lažaŭ. Da viečara, paśla pastajannych abnaŭleńniaŭ Alena ŭžo amal straciła nadzieju, ale na forumach ludzi pisali čakać svabodnych słotaŭ i ŭviečary ŭ sieradu i navat na nastupny dzień.
«Akramia asnoŭnaha, ja vyrašyła spampavać na kampjutar jašče try inšyja braŭziery. Čyściła historyju, kuki, keš, vykarystoŭvała mabilny internet, i kab chutčej išła zahruzka, uklučała i adklučała internet, kab pamianiaŭsia IP», — pieraličvaje jana.
Tolki ranicaj čaćviarha Alenie pašancavała: sajt staŭ pracavać chutčej, jašče byli daty. Da taho momantu byli volnyja słoty tolki ŭ Mahilovie i Homieli.
«Pakul abnaŭlaŭsia sajt, u Mahilovie skončylisia miescy, ale ja zmahła zapisać nas ź siabroŭkaj na Homiel, — adznačaje dziaŭčyna. — Heta vialiki pośpiech, i pa niekalki miesiacaŭ ludzi manitorać daty… Kali huhlić, to kampanii prapanujuć pa 850—1000 rubloŭ za zapis».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
