Fota: president.gov.by.
Kommiersant': Łukašenka — hienierał słoŭnikavaha zapasu
Łukašenka sustreŭsia z Pucinym, kab vyhavarycca. Biez hetaha ciapier lubomu nie pa sabie, piša ahladalnik «Kommiersanta» Andrej Kaleśnikaŭ.
Jak zaŭsiody, Kaleśnikaŭ iranična kamientavaŭ cytaty Łukašenki.
«Tut było adrazu ŭsio: i liryka, i fizika, i adpačynak, i praca, i žyćcio, i śmierć. Tak ukłaści ŭsio hetaje žyćcio, usie jaho sensy i niuansy moža tolki jon, viečny prezident Biełarusi», — kpiŭ Kaleśnikaŭ.
«U Alaksandra Łukašenki byŭ liryčny nastroj. Z takim nastrojem nie na pieramovy ŭ Bačaraŭ Ručaj jeździć, a sadzicca miemuary pisać», — praciahvaŭ žurnalist.
Kaleśnikaŭ miarkuje, što Łukašenka dahetul nie moža daravać biełaruskamu narodu, što toj vystupiŭ suprać palityka ŭ 2020 hodzie:
«Biełaruski prezident da hetaha času, padobna, nie moža daravać svajmu narodu, što chadziŭ suprać jaho, zdradziŭ jamu, Alaksandru Łukašenku, baćku svajmu. Nie acaniŭ, zdradziŭ — voś što jaho hryzie. Užo sam narod ničoha nie hryzie, machnuŭ rukoj i imkniecca nie dumać pra baćku, a baćka pra narod dumaje, zdrady daravać nie moža i nie choča i biez kanca viartajecca da hetaj temy», — piša žurnalist.
Na dumku ahladalnika «Kommiersanta», Łukašenka havaryŭ usio toje, što chacieŭ skazać sam Pucin, ale nie moh.
«Zdavałasia, jon, Pucin, prosta ciarpliva čakaje, kali Alaksandr Łukašenka skončyć. Ale nie, jon byŭ zhodny i ŭstaŭlaŭ u pramovu biełaruskaha prezidenta źviony, što adsutničali. Tamu što heta była i jaho pramova», — piša Kaleśnikaŭ.
Moskovskij Komsomolec: Łukašenka na sustrečy z Pucinym havaryŭ u čatyry razy bolš za jaho
Voś što piša vydańnie pra sustreču Pucina i Łukašenki, akramia cytat dvuch palitykaŭ:
«Ahułam u adkaz na 207 słoŭ, skazanych Uładzimiram Pucinym, Łukašenka vymaviŭ amal 750 słoŭ. Adnak ź jakoj mienavita metaj jon pryjechaŭ na pieramovy ŭ Sočy i jakaja pazicyja hałoŭnaha chaŭruśnika Rasii na novym etapie raźvićcia rasijska-ŭkrainskaha kanfliktu, zastałosia niajasnym.
Raniej Minsk havaryŭ, što mabilizacyi ŭ Biełarusi nie budzie i aŭtamatyčnaha pryznańnia vynikaŭ refierendumaŭ u DNR i ŁNR nie adbudziecca. Kiraŭnik biełaruskaha MZS Uładzimir Makiej z trybuny AAN pasłaŭ vyrazny sihnał ab hatoŭnaści viarnucca da dyjałohu z Zachadam «biez usialakich pieradumoŭ», — miarkuje vydańnie.
Iźviestija: U ciažkija časy vyhadna trymacca razam
Pa vynikach sustrečy Pucina i Łukašenki vydańnie ŭziała kamientar u namieśnika staršyni kamiteta Savieta Fiederacyi pa ekanamičnaj palitycy Ivana Abramava.
Rasijski sienatar spadziajecca, što vizit biełaruskaha palityka ŭ Sočy aznačaje dalejšaje zbližeńnie dźviuch krain. U hetym zacikaŭlenyja abodva baki, padkreśliŭ Abramaŭ. «Sankcyjny cisk» na Maskvu i Minsk, pavodle jaho słoŭ, naŭrad ci asłabnie najbližejšy čas. Tamu Rasija i Biełaruś praciahnuć umacoŭvać supracoŭnictva ŭ roznych arhanizacyjach, naprykład u JEAES. Taksama važna zbližeńnie dvuchbakovych adnosin.
— U takija ciažkija časy vyhadna trymacca razam — jak u ekanamičnym, tak i palityčnym płanie, — zaklikaje sienatar.
Niahledziačy na ekanamičnyja abmiežavańni Zachadu, ryzyk surjoznych uzrušeńniaŭ u Rasii ci Biełarusi nie nazirajecca, padkreśliŭ Ivan Abramaŭ.
Rubaltic.ru pra vizit u Abchaziju: Precedent stvorany
Kamientujučy vizit Łukašenki ŭ Abchaziju, rasijskaje vydańnie Rubaltic.ru adznačaje, što havaryć ab paŭnavartasnym aficyjnym pryznańni Abchazii z boku Biełarusi pakul što rana. Tym nie mienš, sam fakt pryjezdu tudy Łukašenki možna ličyć maleńkaj revalucyjaj u biełaruskaj zamiežnaj palitycy.
«Hetaja sustreča havoryć pra toje, što ŭ Minsku narešcie pačynajuć pastupova ŭśviedamlać novyja hieapalityčnyja realii, u ramkach jakich raniejšyja praviły, u tym liku biezumoŭnaja lehitymnaść aficyjnych postsavieckich miežaŭ, bolš nie dziejničajuć», — piša prapahandysckaje vydańnie.
Ci stanie vizit Łukašenki krokam da pryznańnia nie tolki Abchazii, ale i da apraŭdańnia akupacyi ŭkrainskich terytoryj Rasijaj?
«Vidavočna, Minsk pa-raniejšamu vahajecca ŭ hetym pytańni, uzvažvajučy ŭsie mahčymyja za i suprać», — piša vydańnie.
Takim čynam, pazicyja biełaruskich uładaŭ zastajecca hnutkaj. U biahučaj situacyi ŭłady addajuć pieravahu nie prymać adnaznačnych rašeńniaŭ, pakidajučy dla siabie adkrytymi roznyja mahčymaści, i buduć dziejničać zychodziačy z abstanoŭki.
Regnum: Łukašenka vielmi tonka adčuvaje hieapalityčnyja źmieny
Łukašenka źmianiŭ svaju pazicyju ŭ dačynieńni da Abchazii i Paŭdniovaj Asiecii, tamu što dobra adčuvaje hieapalityčnyja źmieny, razvažaje kamientatar Regnum.ru Asłan Rubajeŭ.
— Jon 14 hadoŭ nie pryjazdžaŭ i staraŭsia nie havaryć ab pytańniach Paŭdniovaj Asiecii i Abchazii, dalikatna ich paźbiahaŭ, a siońnia Łukašenka vielmi źmianiŭ svaju rytoryku. Ad šmatviektarnaj palityki jon pierajšoŭ da palityki blizkaj pa duchu Rasii. I Łukašenka vydatna razumieje, što Rasija siońnia ŭ niejkich momantach adužała, Rasija sprabuje pieraniać niejkuju stratehičnuju inicyjatyvu, bolš nie być krainaj druhoha ešałona dzieści za Zachadam, — maluje idyličnuju karcinu rasijskaje prapahandysckaje miedyja.
Na dumku rasijskich prapahandystaŭ, Rasija skončyć vajnu, pa vynikach jakoj śviet mocna źmienicca, i Rasija «kali i nie zojmie miesca ZŠA, to budzie dzieści na roŭnych ź joj».
— I heta Łukašenka ciapier vydatna razumieje i tamu zadumaŭ niejkaje takoje turne ŭ Abchaziju, a ŭ budučyni, mahčyma, i ŭ Paŭdniovuju Asieciju. Siońnia Łukašenka źjaŭlajecca dla nas adnym z hałoŭnych chaŭruśnikaŭ. I ja dumaju, što Łukašenka pryznaje Abchaziju. Ciapier maski ŭ vialikaj palitycy skinutyja, i Łukašenku treba vyznačacca, čym chutčej, tym lepš, — kamientuje Asłan Rubajeŭ.
