Jaho abvinavacili adrazu pa piaci artykułach Kryminalnaha kodeksa:
— č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich);
— č. 1 art. 361-1 (stvareńnie ekstremisckaha farmavańnia abo ŭdzieł u im);
— art. 369 (źniavaha pradstaŭnika ŭłady);
— č. 1 art. 368 (abraza prezidenta);
— č. 1 art. 130 (raspalvańnie rasavaj, nacyjanalnaj, relihijnaj albo inšaj sacyjalnaj varožaści).
Spravu razhladaŭ sudździa Aleh Charoška.
Aleh Kanavałaŭ, uładalnik jutub-kanała «Trietij riehion Biełaruś», byŭ zatrymany 10 studzienia 2022 hoda, kali viarnuŭsia ŭ Biełaruś na śviaty.
Jaho abvinavacili ŭ tym, što jon deananimizavaŭ siłavikoŭ i ŭžo paśla adjezdu va Ukrainu praciahvaŭ «raźmiaščać u sacsietcy infarmacyju antydziaržaŭnaha kštałtu, prapahandavać supraciŭ pradstaŭnikam ułady». Mužčyna zahružaŭ na svoj kanał videa z akcyj salidarnaści biełarusaŭ u Kijevie. Taksama jamu ŭ vinu staviać «cyničnyja kamientaryi» pra zahinułaha supracoŭnika KDB Dźmitryja Fiedasiuka.
U kancy lutaha 2022 hoda jon na siem sutak byŭ źmieščany ŭ SIZA №3 u karcar.
U vyniku sud pryznaŭ maładoha čałavieka vinavatym u «kiraŭnictvie ekstremisckim farmavańniem, arhanizacyi hrupavych dziejańniaŭ, jakija hruba parušajuć hramadski paradak, i aktyŭnym udziele ŭ takich dziejańniach», a taksama ŭ publičnaj abrazie Łukašenki, pradstaŭnika ŭłady i raspalvańni sacyjalnaj varožaści.
U vyniku jaho asudzili na piać hadoŭ kałonii ŭzmocnienaha režymu, aštrafavali na 3200 rubloŭ, a taksama prysudzili kampiensacyju maralnaj škody na karyść paciarpiełaha milicyjanta 5000 rubloŭ.
