Kirył Stramavusaŭ paćvierdziŭ «Možiem objaśniť», što źjechaŭ z horada. Na videa za jaho śpinaj napiaredadni zaŭvažyli Varoniež.
«Ja sapraŭdy ŭ Rasii i pastajanna pierasoŭvajusia», — zajaviŭ Kirył Stramavusaŭ, pryznačany Rasijaj «namieśnikam kiraŭnika vajenna-hramadzianskaj administracyi Chiersonskaj vobłaści». Jon nie ŭdakładniŭ, dzie ciapier znachodzicca, i ci źbirajecca viarnucca ŭ rodny horad.
Napiaredadni Stramavusaŭ vypuściŭ videazvarot, u jakim zajaviŭ, što «Rasija ŭ Chiersonie nazaŭždy». Videa było źniataje ŭ pamiaškańni, vielmi padobnym na piacizorkavy hatel Marriot u Varoniežy. A za jaho śpinaj byli bačnyja Błahavieščanski sabor i Varoniežskaje vadaschovišča.
Stramavusaŭ pakinuŭ Chierson u toj momant, kali ŭkrainskija ŭłady zajavili ab pačatku kontrnastupleńnia na rehijon. Pavodle ich źviestak, rasijskija desantniki nibyta biehli z pola boju paśla praryvu pieršaj linii abarony. Vojski RF nibyta akazalisia adrezanymi ad šlachoŭ zabieśpiačeńnia praz Dniapro z-za pracy HIMARS. Stramavusaŭ ža napiaredadni admaŭlaŭ hetyja zajavy.
«Heta fejk, nastup USU — heta niejkaja iluzija, kino. Nichto nikudy nie nastupaje, nichto nie adstupaje. Heta ŭsio fantazija. Žyviom spakojna, raźvivajemsia», — skazaŭ jon.
U Chiersonskaj vobłaści, tym časam, praciahvajucca zamachi na pradstaŭnikoŭ akupacyjnych uładaŭ. Ranicaj u aŭtorak tam padarvali mašynu 37-hadovaha majora Śniešyna, pryznačanaha Rasijaj «v.a. načalnika dziažurnaj častki DIBDR». U vyniku vybuchu nichto nie paciarpieŭ. Napiaredadni pad Chiersonam byŭ zabity eks-deputat Viarchoŭnaj rady Alaksiej Kavaloŭ, jaki pierajšoŭ na bok Rasii.
