Raptoŭny pryrost aŭdytoryi
Videaservis YouTube jašče ŭ pieršaj pałovie sakavika zabłakavaŭ kanały rasijskich dziaržaŭnych ŚMI va ŭsim śviecie. Hetyja abmiežavańni nie tolki nie zakranuli ich biełaruskich kaleh, ale i pa ŭsioj bačnaści zhulali im na ruku.
U sakaviku-krasaviku šerah YouTube-kanałaŭ dziaržaŭnych miedyja pieražyli šalony pryrost aŭdytoryi. Tak, naprykład, stvorany ŭ 2010 hodzie kanał BiełTA jašče ŭ lutym 2022-ha mieŭ 196 tysiač padpisčykaŭ. Ale ŭžo 31 sakavika ich było bolš za 450 tysiač. Imklivy pryrost aŭdytoryi ciahnuŭsia da siaredziny krasavika, kali ŭ kanała stała bolš za 550 tysiač fałovieraŭ.
Hrafik pryrostu aŭdytoryi na jutub-kanale BiełTA. Fota: skrynšot z sajta socialblade.com
Aŭdytoryja kanała praciahvaje raści, choć užo i bolš ścipłymi tempami. Pa stanie na 29 žniŭnia na jaho padpisanyja 701 tysiača čałaviek. Pryrost skłaŭ bolš za paŭmiljona padpisčykaŭ za apošnija paŭhoda.
A voś jak vyhladaje statystyka jutub-kanała BT (jon nazyvajecca «ATN: naviny Biełarusi i śvietu»). Ciaham miesiaca jahonaja aŭdytoryja pavialičyłaś na 316 tysiač — z 231 tysiačy pa stanie na 8 sakavika da 547 tysiač na 9 krasavika.
Hrafik pryrostu aŭdytoryi na jutub-kanale BT. Fota: skrynšot z sajta socialblade.com
Zaŭvažna, što šaleny pryrost adbyvaŭsia tolki ŭ pieryjad z 7 sakavika pa 4 krasavika. U hety čas kanał prybaŭlaŭ pa 60-80 tysiač čałaviek kožny tydzień. Ale niebyvały rost skončyŭsia. Ź siaredziny krasavika da pačatku traŭnia aŭdytoryja nie pavialičvałasia.
Hrafik pryrostu aŭdytoryi na jutub-kanale BT. Fota: skrynšot z sajta socialblade.com
Peŭny rost padpisčykaŭ nazirajecca i ŭ inšych kanałaŭ, ale jon nieparaŭnalny z dasiahnieńniami BiełTA i BT. Aŭdytoryja YouTube-kanała ANT za apošnija šeść miesiacaŭ pryrasła amal na 100 tysiač čałaviek, z 532 da 628 tysiač. Na kanale CTB aŭdytoryja za hety čas pavialičyłasia na 47 tysiač. Što cikava, najbolš zaŭvažny pryrost naziraŭsia nie ŭ sakaviku-krasaviku, jak u papiarednich kanałaŭ, a ŭ pačatku traŭnia.
Hrafik pryrostu aŭdytoryi na jutub-kanale CTV. Fota: skrynšot z sajta socialblade.com
Dakładna vyznačyć, čamu na niekatorych prapahandysckich kanałach adbyŭsia taki skačok aŭdytoryi, niemahčyma.
Ci mahli biełarusy masava pieraklučycca na dziaržmiedyja? Niezaležnaje daśledavańnie pakazała, što kolkaść tych, chto schilny daviarać uładzie, vyrasła. U kastryčniku 2021 hoda bałans «zaŭziatyja prychilniki + schilnyja daviarać» VS «zaŭziatyja praciŭniki + schilnyja nie daviarać» składaŭ prykładna 38 / 62. U mai 2022 hoda hety pakazčyk składaŭ prykładna 48 / 52. «U situacyi vajny «hałubinaja» rytoryka Alaksandra Łukašenki pra toje, jak kraina supraciŭlajecca ŭciahvańniu ŭ vajnu, znachodzić svaju aŭdytoryju», — adznačali daśledčyki.
Ale zruch u statystycy nie taki kardynalny, jak rost aŭdytoryi prapahandysckich kanałaŭ. Da taho ž hety zruch adbyŭsia, jak miarkujuć analityki, za košt niejtralnych hramadzian, jakim dalokaja ahresiŭnaja rytoryka dziaržaŭnych ŚMI.
Zatoje jana blizkaja toj rasijskaj aŭdytoryi, jakaja hladzić Sałaŭjova.
Całkam mahčyma, što biełaruskija prapahandysty prosta skarystalisia situacyjaj, kali jutub błakuje ich rasijskich kaleh. I zanialisia prasoŭvańniem svaich kanałaŭ, kab chutka zaniać nišu, jakaja raptam vyzvaliłasia.
Siarod samych papularnych videa na hetych kanałach za piaty miesiac vajny — uspaminy pra pamierłaha śpievaka Juryja Šatunova i ekśpiertnyja mierkavańni rasijskich palitołahaŭ.
U lubym vypadku pryrost padpisčykaŭ YouTube-kanałaŭ biełaruskich dziaržaŭnych miedyja adbyvajecca ŭ mnohim za košt rasijan i ruskamoŭnaj aŭdytoryi ź inšych krain. Pra heta śviedčać i kamientary da videasiužetaŭ.
Kamientatary žadajuć «baćku» zdaroŭja, doŭhich hadoŭ žyćcia i škadujuć, što ŭ ich niama takoha kiraŭnika, jaki dumaje pra narod, daje nahaniajaŭ čynoŭnikam, sočyć za zboram uradžaja i h.d. Dopisy z padobnym źmiestam — heta ledź nie pałova z taho, što možna adšukać pad videa.
Paśla prahladaŭ navin na prapahandysckich kanałach, karystalnicy Halinie Padolnaj tak spadabałasia Biełaruś, što joj zachaciełasia žyć i pracavać u biełaruskim siale! I jana takaja nie adzinaja. Tak, naprykład, niechta Bieniedzikt Bieniedziktaŭ piša nastupnaje: «Baćka maładziec! Adčuvaju, treba pierajazdžać u Biełaruś!»
Łukašenku nazyvajuć prazarlivym i dalnabačnym palitykam. Karystalnik Aleh Marozaŭ piša, što ŭ Rasii lubiać i pavažajuć Łukašenku.
Pra toje, što siarod hledačoŭ šmat niebiełarusaŭ, śviedčać i dopisy pra «braterski narod», «vašaha prezidenta» i situacyju ŭ Rasii ŭ paraŭnańni ź biełaruskaj.
Takija karystalniki časta pišuć nie Biełaruś, a «Biełoruśsija» ci «Biełaruśsija», a samoha palityka čaściej za ŭsio kličuć «baťkoj» (pryčym časam pišuć «baťko»).
«Ech, jak by takoha prezidenta da nas zamanić», — maryć chtości pad videa.
Pra svaju luboŭ da Łukašenki pišuć nie tolki karystalniki z RF, jakija naŭprost u kamientary pakidajuć infarmacyi pra svaju krainu pražyvańnia, ale i ź inšych postsavieckich krain.
Znajści niehatyŭnyja kamientary pad videa na prapahandysckich kanałach amal niemahčyma. Zatoje tam časta byvajuć parady «bierahčy Łukašenku».
Boty ci sapraŭdnyja amatary dyktatury?
Šaleny pryrost aŭdytoryi i proćma pazityŭnych kamientaroŭ pad videa možna patłumačyć nastupnym čynam. Pa-pieršaje, aŭdytoryja, jakaja raniej spažyvała ŭ YouTube infarmacyju ad rasijskich dziaržaŭnych ŚMI i prapahandystaŭ, paśla vydaleńnia hetych kanałaŭ była vymušanaja šukać inšyja krynicy. Naturalna, što samymi blizkimi pa źmieście akazalisia kanały biełaruskich dziaržaŭnych ŚMI. Tamu pryrost aŭdytoryi za košt rasijskich amataraŭ dyktatury vyhladaje całkam naturalnym. Aproč samich rasijan, da hetaha śpisu možna dadać peŭnuju častku ruskamoŭnych karystalnikaŭ ź inšych krain byłoha SSSR.
Tym nie mienš, vielizarnaja kolkaść padobnych pa źmieście pazityŭnych kamientaroŭ vyklikaje šmat pytańniaŭ. Vyhladaje, što častka ź ich — heta praca tak zvanych botafiermaŭ, dzie sapraŭdnyja ludzi pa raznaradcy pakidajuć kamientary peŭnaha źmiestu. Takija dopisy robiać jak z sapraŭdnych akaŭntaŭ, tak i z akaŭntaŭ-pustyšak, jaki admysłova stvorany dla taho, kab pakidać kamientary na prafiesijnaj asnovie.
Boty zvyčajna pakidajuć karotkija dopisy, pakolki ich asnoŭnaja zadača — heta kolkaść, a nie jakaść.
Załajkanaść padobnych kamientaroŭ taksama tłumačycca vielmi prosta — padabajki pad kamientarami prastaŭlajuć tyja ž boty, što ich pakidajuć.
Prodažam fejkavych kamientaroŭ zajmajucca roznyja SMM-ahiencyi, čaściej za ŭsio rasijskija. Aproč kamientaroŭ jany prapanujuć nakrutku prahladaŭ, padabajek i ahulnaj kolkaści padpisčykaŭ.
Cana na takija pasłuhi zaležyć jak ad kolkaści kamientaroŭ, tak i ad ich jakaści i daŭžyni. Naprykład, adna z ahiencyj pradaje 50 kamientaroŭ za 4,5 dalara, a 100 za 8,5 dalara.
Na niekatorych sajtach možna navat skarystacca kalkulataram, kab vyznačycca, vam patrebnyja kamientary daŭžynioŭ u 6 skazaŭ ci chopić i dvuch słoŭ.
Choć padobnyja pasłuhi čaściej za ŭsio prapanujuć rasijskija ahiencyi, u ich jość nieabchodnyja pakiety i dla inšych krain, u tym liku i dla Biełarusi.
Zaŭvažym, što łukašysty mohuć zakuplać nie tolki pazityŭnyja kamientary i reakcyi dla svaich kanałaŭ, ale i niehatyŭnyja dla niezaležnych resursaŭ, jak heta, naprykład, ciapier adbyvajecca ŭ Telegram. Raniej, «Naša Niva» pisała padrabiazna pra heta.
Čytajcie taksama: Łukašenkaŭcy pačali kuplać łajki pad pastami ŭ TH. Voś kudy jany ich staviać i jak
