Polski sojm pryniaŭ rezalucyju z asudžeńniem uvarvańnia Čyrvonaj Armii 17 vieraśnia 1939 hodu ŭ Zachodniuju Biełaruś i Zachodniuju Ukrainu,
jakija pamiž dźviuma suśvietnymi vojnami ŭvachodzili ŭ skład polskaj dziaržavy.
Pryśviečanyja hetym padziejam rezalucyi polski sojm prymaje nia pieršy hod, ale ŭpieršyniu ŭ joj užytaje słova «hienacyd» adnosna dziejańniaŭ SSSR suprać Polščy.
Padstavu dla ŭvarvańnia Čyrvonaj Armii daŭ pakt Mołatava‑Rybentropa. U vyniku «Polšča pała achviaraj dvuch tatalitarnych režymaŭ — nacyzmu i kamunizmu». Asudžajučy ahresiju savieckich vojskaŭ, aŭtary rezalucyi adznačajuć, što polski los padzialili mnohija inšyja narody Centralnaj i Ŭschodniaj Eŭropy. Pavodle sojmu Polščy, «arhanizacyja systemy, daŭžynia i maštab źjavy nadali hetym złačynstvam, u tym liku katynskamu złačynstvu, prykmiety hienacydu».
Rezalucyju pryniali biez hałasavańnia i debataŭ.
Dakument byŭ uzhodnieny na minułym tydni śpikieram sojmu Branisłavam Kamaroŭskim padčas kansultacyj z usimi frakcyjami parlamentu. U budynku sojmu znachodzilisia siemji palakaŭ, rasstralanych u Katyni ŭ 1940 hodzie.
U zaklučnaj častcy dakumentu sojm zaklikaje rasiejski bok da sumiesnych salidarnych dziejańniaŭ pa abnarodavańni i asudžeńni złačynstvaŭ časoŭ stalinizmu.
Historyk Anatol Hryckievič nazvaŭ hetuju rezalucyju «zakanamiernaj dla Polščy»:
«Jana faktyčna nia tolki suprać Savieckaha Sajuzu. Jana suprać ciapierašniaj imperyjalistyčnaj palityki Rasiei, u tym liku ŭ dačynieńni da Biełarusi. Jany padychodzili da hetaha ŭžo daŭno. I dla Polščy nasamreč pačatak Druhoj suśvietnaj vajny byŭ udaram z adnaho i z druhoha bakoŭ. Samaje cikavaje, što hetaha nie ŭkryvali i kiraŭniki SSSR. I, zrazumieła, heta była ahresija jak Niamieččyny, tak i Savieckaha Sajuzu. Heta navat z punktu hledžańnia Biełarusi my pavinny ličyć. Biełaruś była abjadnana. Ale abjadnana nie dla biełaruskaha narodu, a dla imperyjalistyčnaj palityki Stalina i Savieckaha Sajuzu ŭ 1939 hodzie. Abjadnańnie farmalnym było. Faktyčna, Zachodniaja Biełaruś trapiła z adnoj niavoli ŭ druhuju».
Pavodle byłoha staršyni Viarchoŭnaha Savietu Biełarusi Stanisłava Šuškieviča, u palakaŭ jość usie padstavy kazać pra «prykmiety hienacydu». Jon nahadaŭ, što paśla dałučeńnia etničnych biełaruskich ziemlaŭ da SSSR sotni tysiač ludziej byli adpraŭleny ŭ Sybir, byli źniščany:
«Faktyčna spadkajemcam savieckaj palityki, spadkajemcam SSSR źjaŭlajecca Rasieja. Tak što heta moža mieć adnosiny da rasiejska‑polskich stasunkaŭ. I toje, što Rasieja dahetul na aficyjnym, dziaržaŭnym uzroŭni nie pryniesła prabačeńnia za Katyń, ja dumaju, daje padstavy dla taho, kab pra heta nahadvałasia. I kab nahadvałasia, što imperskija ambicyi Rasiei aficyjna nie ŭtajmavanyja. I tamu jość usie padstavy prymać takoje rašeńnie».
