«Žyvy Žurnał» (LiveJournal) i siervis kantekstnaj rekłamy Google AdSense abjavili pra zapusk sumiesnaha prajekta «Vaš časopis — vašy hrošy», piša hazieta.ru . Raspracoŭščyki abiacajuć karystalnikam ŽŽ z płatnymi akaŭntami mahčymaść zarablać na svaich dziońnikach. Dla hetaha błohiery pavinny buduć pahadzicca pakazvać rekłamu svaim čytačam.
«Upieršyniu ŭ błohieraŭ źjaviłasia mahčymaść zarablać na svaich anłajn‑dzionńnikach,» — zajaviła ŭ aŭtorak hienieralny darektar SUP (uładalnik LiveJournal) Anelis van den Bielt.
SUP zabiaśpiečyła servisam Google AdSense, jaki ŭładkavany ŭ interfiejs błoha. Pakazvać rekłamu, taksama jak i admovicca ad jaje prahladu, zmohuć tolki tyja błohiery, chto zapłaciŭ za svaje žurnały.
Technična zarablać na rekłamie ŭ LiveJournal budzie prosta. Patrebna zavieści ci naładzić Google AdSense, paznačyć tematyku svajho Žyvoha Žurnału i pamiery rekłamy. Paśla ŭ błohu źjavicca abjava ad Google AdSense, čytačy pačnuć klikać na jaje, a błohier —atrymlivać hrošy. Zarobak budzie zaležyć ad kolkaści klikaŭ i cany adnaho klika, jakuju vyznačajuć rekłamadaŭcy na standartnym aŭkcyjonie.
Adnak zarabić surjoznuju sumu budzie nialohka. Naprykład, kali na banier buduć klikać raz u dzień i ŭmoŭnaja cana adnaho klika składzie $1, to heta pryniasie ŭ miesiac $30, padličyŭ kiraŭnik prajekta LiveJournal Barys Aŭčyńnikaŭ. Płatny akaŭnt, jaki kaštuje $2 na miesiac, kaniešnie akupicca, adnak miljanieram takaja rekłama vas nie zrobić. Akramia taho, tyja, chto budzie zarablać nievialikija sumy, buduć mieć składanaści ź pieravodam hrošaj z Google AdSense. Naładki hetaha siervisa dazvalajuć zdymać ź jaho sumu nie mieniej za $100. Mnohim błohieram pryjdziecca čakać, pakul naźbirajecca hetaja suma.
Prybytak z rekłamy pamiž saboj padzielać Google i karystalnik błoha. Pry hetym Google abiacaje nakiroŭvać karystalnikam «bolšuju častku prybytku», a LiveJournal uvohule nie maje pretenzij na hetyja hrošy. Vyhoda LiveJournal u tym, kab pavialičyć kolkaść płatnych akauntaŭ. Sistemaj praduhledžana, što karystalnik u luby momant moža vyjści z prahramy ci časova spynić pakaz płatnych abjavaŭ.
Raspracoŭščyki spadziajucca, što prajekt «Vaš časopis — vašy hrošy» nie tolki spadabajecca karystalnikam, bo daść mahčymaść zarablać, ale i źmienić ich staŭleńnie da rekłamy ŭ błohach. Adnak ekśpierty papiaredžvajuć, što moža być advarotnaja reakcyja. «Asnoŭnaja masa ludziej, natchnionaja pierśpiektyvaj lohkaha i pryjemnaha zarobku, pabačać, što naviedvalnaść ich błohaŭ niedastatkovaja navat dla taho, kab akupić košt paid‑akaunta», — pradkazvaje vice‑prezident Mail.Ru Anna Artamonava. Peŭny adsotak zaciatych karystalnikaŭ, na jaje dumku, mohuć pieratvaryć błohi ŭ zborniki kantentu, skapijavanaha ź inšych resursaŭ u nadziei chutka pašyryć aŭdytoryju. Takija časopisy buduć dyskredytavać status i davier da błohachostynha ŭ cełym, papiaredžvaje ekśpiert.
