Fota: Pixabay.
Za źničkami možna nazirać z 17 lipienia pa 24 žniŭnia, adnak pik pryjdziecca na noč ź piatnicy na subotu 12 žniŭnia. Šou pačniecca z 23 hadziny pa biełaruskim časie i praciahniecca da samaha ŭzychodu sonca. Kab pabačyć 100-150 źničak na hadzinu treba vykanać peŭnyja ŭmovy.
Rychtujemsia nazirać za Piersieidami
Pa-pieršaje, varta pravieryć nadvorje. Jano moža być pachmurnym, tamu lepiej zahadzia pierakanacca, što nad vašaj miascovaściu nie budzie šmat abłokaŭ. Dapamohuć zvyčajnyja sajty z dynamičnymi kartami nadvorja. Kali nieba pachmurnaje ci jość apadki, varta admovicca ad nazirańnia i pieranieści jaho na inšy dzień. U vypadku spryjalnych umoŭ pamiatajcie, što heta budzie siaredzina nočy, heta značyć, čas sutak, kali pachaładaje. Varta ŭziać z saboj dadatkovuju vopratku, a taksama što-niebudź ciopłaje ź pićcia i ježy.
Pa-druhoje, varta adjechać padalej ad vialikich haradoŭ, kab haradskoje aśviatleńnie nie paharšała bačnaść. Ale kali takoj mahčymaści niama, to lepš za ŭsio pajści na łuh abo vialikuju dziciačuju placoŭku, tolki kab aśviatleńnie na joj unačy było vyklučanaje. Taksama možna vyjści na bałkon ci na dach, kali inšych mahčymaściaŭ niama. Hałoŭnaje, kab vy byli vyšej za lichtary.
Pa-treciaje, nieabchodna zaniać adpaviednaje stanovišča. Suzorje Piersieja, ad jakoha pachodzić nazva Piersieidy, znachodzicca na paŭnočna-ŭschodnim kirunku. Kab daviedacca, dzie heta, prosta ŭklučycie Google Maps, i prahrama pakaža paŭnočny ŭschod. Važnaja taksama i pazicyja, u jakoj my nazirajem za niebam. Lepš za ŭsio prosta prylehčy, naprykład, pasłaŭšy koŭdru na travu.
I apošniaja parada: na čas nazirańnia varta adklučyć ekrany telefonaŭ, tamu što vačam patrebna pryzvyčaicca da ciemry.
Akramia taho, 12 žniŭnia my ŭbačym poŭniu. Miesiac u hetu noč budzie zdavacca čałaviečamu voku na 14% bolšym i budzie vielmi blizka da Ziamli.
Piersieidy. Što heta?
Heta roj mietearytaŭ, što źjaŭlajucca askiepkami kamiety Swift-Tuttle. Čas ad času hetaja kamieta pačynaje ruchacca da Sonca, i tady lod na jaje pavierchni vyzvalaje čaścicy pyłu. Heta mietearoidy roznych pamieraŭ, zvyčajna milimietrovych, choć sustrakajucca i bolš bujnyja frahmienty kamiety.
Nazva Piersieidy pachodzić ad suzorja Piersieja, u jakim znachodzicca radyjant (miesca, adkul z našaha punktu hledžańnia laciać źnički). Kali askiepki traplajuć u atmaśfieru Ziamli, jany na chutkaści 59 km/s zharajuć daščentu pad uździejańniem treńnia.
