Mašyna ź Biełarusi ciapier abydziecca na 800-1000$ tańniej

U Rasii časova spraścili praceduru rehistracyi transpartu, jaki impartujuć. Ad 16 lipienia 2020 hoda da 1 studzienia 2023 hoda rasijanie zmohuć uvozić i rehistravać aŭtamabili biez ustalavańnia knopki vykliku ekstrannaj dapamohi «ERA-HŁONASS» (knopka SOS). Rasijski ŭrad byŭ vymušany pajści na taki krok z pryčyny taho, što ŭ ich naziraŭsia vostry niedachop takoha abstalavańnia. Sam deficyt, pa ich słovach, byŭ vyklikany sankcyjami z boku «niesiabroŭskich krain».

Praz admienu hetaha patrabavańnia vydatki na rehistracyju aŭto, pryviezienaha z-za miažy, skaračajucca na 800-1000 dalaraŭ, što robić kuplu aŭto ŭ Biełarusi bolš vyhadnaj spravaj. Adnak pa słovach ułaśnika staličnaha aŭtakomisa, rasijanie davoli aktyŭna kuplali aŭtamabili ŭ Biełarusi i da anansavanych palohak.

«Tym, što rasijanie aktyŭna kuplajuć aŭtamabili ŭ Biełarusi, naŭrad ci možna kahości ździvić, bo apošnija hady dva pakupniki z RF byli ŭ nas davoli častymi hościami. U pieršuju čarhu heta źviazana z tym, što ŭ nas dziejničaje 140-y ŭkaz, jaki dazvalaje razmytnivać aŭtamabili z 50% źnižkaj. Pa hetaj pryčynie rasijskim pierakupščykam i šarahovym aŭtaamataram było praściej i vyhadniej nabyvać aŭto ŭ Biełarusi, čym kuplać jaho samastojna ŭ Jeŭropie ci ZŠA, vieźci ŭ Rasiju i tam razmytnivać na poŭnym taryfie», — adznačaje biznesoviec.

Rasijanie vymušany kuplać patrymanyja aŭtamabili zamiest novych

Na ruku biełaruskim aŭtabiznesmienam hraje skaračeńnie vytvorčaści novych aŭtamabilaŭ u RF, jakoje jašče bolš pačało schilać biełarusaŭ i rasijan da nabyćcia patrymanych aŭtamabilaŭ. Taki trend musić zachavacca na davoli praciahły čas, pakolki navat zhodna z zajavaj ministra pramysłovaści i handlu RF Rasiju čakaje prykładna 50%-naje skaračeńnie vytvorčaści lehkavych aŭtamabilaŭ za 2022 hod.

«Paśla taho, jak kurs rasijskaha rubla stabilizavaŭsia, popyt na aŭtamabili z boku rasijan mocna pavialičyŭsia, jany pačali jašče bolš aktyŭna cikavicca mašynami ź Biełarusi, dobra biaruć jak śviežapryhnanyja varyjanty, tak i tyja, što ŭžo paśpieli pajeździć pa Biełarusi. Naviny pra spraščeńnie pracedury rehistracyi tolki pavysili cikavaść da nabyćcia aŭto ŭ Biełarusi».

Pa słovach surazmoŭcy, rasijanie apošnim časam sapraŭdy skardzilisia na toje, što kupić knopku SOS stała składana, što ceny na jaje ŭzraśli ledź nie ŭ dva razy.

Biełaruskija firmy-pierahonščyki pačynajuć adkryvać filijały ŭ RF

Inšy biznesmien, jaki zajmajecca padboram aŭtamabilaŭ ź Jeŭropy na zamovu, taksama padkreślivaje, što ŭ apošnija miesiacy rasijanie ŭsio aktyŭniej cikaviacca mahčymaściu pryhnać aŭto praź Biełaruś.

«Da nas usio čaściej pačali źviartacca klijenty z Rasii, jakija chočuć zamović aŭtamabil ź Jeŭropy. Apošnija pasłableńni taksama pazityŭna paŭpłyvali na cikavaść da takich mašyn.

Tak, naprykład, u nas u pracy byŭ klijent, jaki chacieŭ nabyć sabie darahi BMW. Pačatkova jon spadziavaŭsia znajści sabie lhotnika, kab sekanomić na apłacie mytu, ale kali daviedaŭsia, što bolš nie treba budzie tracić hrošy na «ERA-HŁONASS», to vyrašyŭ adrazu vieźci mašynu ŭ Maskvu i razmytnivać u siabie pa poŭnym taryfie», — kaža aŭtapadborščyk.

Pra surjozny patok aŭto ź Biełarusi ŭ Rasiju kažuć i aŭtapieravozčyki, jakija praz sankcyi zhubili mahčymaść pracavać na jeŭrapiejskim kirunku i vymušany znachodzić inšyja nišy dla pracy.

«Rasijanie ciapier vyvoziać aŭtamabili ź Biełarusi cełymi aŭtavozami. Čaściej za ŭsio heta mašyny, jakija jany nabyvali pad zamovu, to-bok u Biełarusi jany tolki razmytnivalisia, ale chapaje varyjantaŭ, kali treba dastavić u Maskvu ci Picier aŭtamabili, jakija ŭžo pierakupili ŭ Biełarusi.

Taksama my nazirajem tendencyju, kali bujnyja biełaruskija firmy, jakija majuć vialiki dośvied pracy ŭ hetaj śfiery, pačynajuć adkryvać filijały ŭ RF. Značyć, popyt sapraŭdy vialiki», — miarkuje pieravozčyk.

Kala pałovy aŭto sa Štataŭ u vyniku jedzie ŭ Rasiju

Biznesmien, jaki zajmajecca aŭtamabilami z ZŠA, taksama adznačaje rost cikavaści da kupli aŭto ŭ Biełarusi z boku pakupnikoŭ z Rasii. Pa jahonych nazirańniach, kala pałovy ad tych mašyn, što pryjazdžajuć u Biełaruś sa Štataŭ, paśla prachodžańnia mytnaj ačystki i ramontu nakiroŭvajucca ŭ Rasiju.

«Časovyja palohki naŭrad ci mocna źmieniać karcinu, pakolki jany (rasijanie) i biez hetaha aktyŭna kuplali mašyny sa Štataŭ. Zaraz uvohule nazirajecca taki trend, što ŭsio čaściej zamaŭlajuć darahija aŭto, koštam ad 30 tysiač dałaraŭ. Tamu ekanomija ŭ 1000 dalaraŭ na knopcy ŭ bolšaści vypadkaŭ prosta stanie pryjemnym bonusam pry kupli, čym niejkim vyrašalnym faktaram.

Novyja aŭtamabili ŭ Rasii amal pierastali vypuskać, jość prablemy ź impartam, ceny na aŭto ŭ sałonach šalonyja, tamu narod pieraklučyŭsia na «beušku», vialikaja častka jakoj tak ci inakš idzie prachodzić praź Biełaruś», — padsumoŭvaje biznesmien.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?