Zialenski: Štodzionnyja straty USU — kala 30 zahinułych i 250 paranienych 2

Pachavańnie ŭkrainskaha vajskoŭca ŭ Kijevie. 18 lipienia 2022 hoda. Fota: AP Photo/Efrem Lukatsky

Zialenski skazaŭ u intervju, što źmianieńnie suadnosin ahniavoj mocy dziakujučy zamiežnym pastaŭkam pieradavoj vajskovaj techniki pryviało da taho, što straty USU značna źmienšylisia ŭ paraŭnańni z majem i červieniem. Ciapier štodnia hinuć u siarednim 30 ukrainskich vajskoŭcaŭ i prykładna 250 atrymlivajuć ranieńni.

Zialenski admoviŭsia nazvać žurnalistam dakładnuju kolkaść strataŭ, jakija paniesła armija Ukrainy z pačatku ŭvarvańnia, ale znoŭ padkreśliŭ, što hetaja kolkaść u razy mienšaja za tyja straty ŭ asabistym składzie, jakija niasie Rasija.

Zialenski taksama prakamientavaŭ zajavu Pucina, što Ukraina nibyta «nie nastrojenaja na pieramovy»: «Jon pryjšoŭ siudy, zabiŭ ludziej, zrabiŭ biežancami 12 miljonaŭ, a ciapier kaža, što Ukraina nie choča pieramovaŭ. Jany voś tak prosta zabivajuć ludziej, rujnujuć harady, uvachodziać u ich, a potym kažuć: «Davajcie damaŭlacca». Z kim jany mohuć paśla hetaha pahavaryć? Z kamianiami? Jany pakrytyja kryvioju, i hetuju kroŭ niemahčyma zmyć. I my nie dazvolim im jaje zmyć», — skazaŭ ukrainski prezident.

Ukraincy patrabujuć vyzvaleńnia ŭsich akupavanych Rasijaj terytoryj, i tolki paśla taho možna budzie abmiarkoŭvać, što rabić dalej i jak žyć potym. Viadoma, ukraincy addali b pieravahu mirnaj i biaskroŭnaj deakupacyi, ale zrazumieła, što heta naŭrad ci mahčyma, uličvajučy, z kim jany majuć spravu.

«Pakul jany nie atrymlivajuć pa mordzie, jany naohuł ničoha nie razumiejuć», — ličyć Zialenski.

Jon taksama prakamientavaŭ prapanovy «zamarozić kanflikt»: «Kašałot adkusiŭ dva rehijony i ciapier kaža: davajcie zamarozim kanflikt. Potym jon nabiarecca siłaŭ, praz dva-try hady znoŭ adkusić dva rehijony i znoŭ skaža: davajcie zamarozim kanflikt. I tak budzie praciahvacca znoŭ i znoŭ, sto adsotkaŭ».

Ale Pucin vielmi niedaacaniŭ Ukrainu, skazaŭ Zialenski. «Jon adkryŭ pašču, byccam jon udaŭ, a my niejki trusik. Ale my nie trusik, i jamu nie ŭdałosia nas prahłynuć — zatoje zaraz jość ryzyka, što jon sam łopnie».

18

1

2

4

1

2

Nashaniva.com