«Śpis ustalavanych i zatrymanych pamahatych ekstremisckaj sietki tolki ŭ ramkach rasśledavańnia adnoj kryminalnaj spravy naličvaje bolš dvuch dziasiatkaŭ čałaviek. Niekatoryja ź ich atrymali zasłužanaje pakarańnie ŭ vyhladzie 5-11 hadoŭ pazbaŭleńnia voli», — zaznačaje SK i pryvodzić prykład mieniedžara sietki mabilnaha apieratara «BIEST», jaki «aktyŭna zajmaŭsia pieradačaj piersanalnych źviestak administrataram ČKB, dostup da jakich mieŭ u ramkach svaich słužbovych abaviazkaŭ».
Jamu vystaŭlenaje abvinavačvańnie ŭ dapamozie ŭ raspalvańni sacyjalnaj varožaści i varožaści pa prykmiecie inšaj sacyjalnaj prynaležnaści, učynienaje słužbovaj asobaj z vykarystańniem svaich słužbovych paŭnamoctvaŭ i hrupaj asob, jakija paciahnuli inšyja ciažkija nastupstvy (č. 6 art. 16 i č. 3 art. 130 Kryminalnaha kodeksa).
Taksama SK paviedamlaje, što daśledavali ŭsie nośbity infarmacyi Safii Sapiehi. Heta dapamahło im ŭstalavać liniju ŭzajemadziejańnia administrataraŭ sa svaimi krynicami. Tych udzielnikaŭ ČKB, chto znachodziŭsia ŭ Biełarusi, zatrymali, a paźniej im vystavili abvinavačvańni.
«Siarod ich vyjaŭlenyja rabotniki dziaržorhanaŭ, byłyja pravaachoŭniki i asoby, jakija mieli dostup da asabistych źviestak biełarusaŭ», — piša pres-słužba Śledčaha kamiteta.
Nahadajem, što raniej Safiju Sapiehu asudzili na šeść hadoŭ kałonii za administravańnie ČKB, u jakoj raźmiaščalisia piersanalnyja źviestki siłavikoŭ i inšych asob, jakija ŭdzielničali ŭ padaŭleńni pratestaŭ u 2020 hodzie i praviadzieńni vybaraŭ. SK zaznačaje, što dla ŭstanaŭleńnia ich asob vykarystoŭvałasia infarmacyja, atrymanaja z pryład Sapiehi.
