Pra admienu apošniaj hadziny polskaj movy i litaratury paviedamiła dyrektar siaredniaj škoły № 36 Danuta Surmač. U baćkoŭ hetaja infarmacyja vyklikała «hłuchuju złość i biaśsille», skazała Hrodna.life maci vučnia škoły Natalla Saroka.
Pa słovach Natalli, baćki buduć sprabavać adstajać prava pravodzić zaniatki pa polskaj movie i litaratury albo arhanizavać fakultatyŭ.
Pra toje, što ź vieraśnia 2022 hoda ŭ polskich škołach u Hrodnie i Vaŭkavysku zaniatki buduć vieści na ruskaj movie, stała viadoma ŭ krasaviku 2022 hoda.
Kiraŭnictva škoły spasłałasia na źmieny ŭ Kodeksie ab adukacyi. Pavodle zakona, ciapier u Biełarusi vykładańnie na movach nacyjanalnych mienšaściaŭ nie praduhledžvajecca. U vyniku bolšaść pradmietaŭ budzie pa-rusku, pa-biełarusku — tolki historyja Biełarusi i častka pradmieta «Čałaviek i śviet», a pa-polsku — uvohule ničoha.
Moŭnaje pytańnie ŭ polskaj škole ŭzdymali i raniej. Pieršy raz — u 2012 hodzie, kali prapanavali stvaryć asobnyja ruskamoŭnyja kłasy. U 2017 hodzie Ministerstva adukacyi Biełarusi płanavała pieravieści častku pradmietaŭ i ekzamienaŭ na dziaržaŭnyja movy.
Tady baćki apielavali da polska-biełaruskich damoŭlenaściaŭ, pavodle jakich hetaja škoła, pabudavanaja za polskija hrošy, pavinna vykarystoŭvacca tolki dla navučańnia na polskaj movie.
U žniŭni 1995 hoda Sajuz palakaŭ Biełarusi padpisaŭ damovu z Hrodzienskim harvykankamam. U punkcie 1.3 hetaha dahavora paznačana, što budynak škoły, pabudavany za hrošy polskich padatkapłatnikaŭ, pavinien vykarystoŭvacca jak škoła z polskaj movaj navučańnia. Źmianić heta možna tolki pa pahadnieńni bakoŭ. Na takich ža ŭmovach u 1999 hodzie adkryli škołu ŭ Vaŭkavysku. Ale heta maje značeńnie tolki tady, kali ŭ krainie choć by trochi da zakonaŭ.
Škoła ŭ Vaŭkavysku budzie pieraviedzienaja z vosieni na ruskuju movu taksama. Taksama likvidujucca litoŭskija škoły ŭ vioskach Pielasa Voranaŭskaha i Rymdziuny Astravieckaha rajonaŭ.
