Valeryj Kavaleŭski ŭ Vilni z pradstaŭnicaj meryi horada. U aŭtamabili humanitarnaja dapamoha dla Ukrainy
Ciapier jość administracyjnyja zadačy — my arhanizujem ofis pradstaŭnictva, šukajem pamiaškańnie, i aproč hetaha pačynajem pracu nad tym, kab lepš zrazumieć, što adbyvajecca ŭ biełaruskaj supolnaści, u biełaruskaj dyjaspary, jakija prablemy, i što my možam zrabić ciapier dla vyrašeńnia tych prablem, jakija stajać pierad biełarusami», — paviedamiŭ «Svabodzie» Valeryj Kavaleŭski.
Najpierš, pavodle jaho słovaŭ, viadziecca pra zabłakavanyja bankaŭskija rachunki biełarusaŭ, pra mihracyjnyja pytańni, pra źmienu adukacyjnych prahram u škołach Ukrainy i vyklučeńnie ź ich tvoraŭ biełaruskich piśmieńnikaŭ, a taksama ab źmianieńni biełaruskich nazvaŭ.
«Musim zrazumieć, jaki ŭ nas front pracy i pačynać zajmacca hetym praz sustrečy z pradstaŭnikami aficyjnych viedamstvaŭ, z hramadzianskaj supolnaściu, z ekśpiertami, miedyja. Užo pieršyja kroki byli zroblenyja. Pakul my havorym ab pracoŭnym uzroŭni, ab ustalavańni dačynieńniaŭ, ab tym, što my vychodzim na instytuty, na ahienctvy, na peŭnyja ŭstanovy i zaviazvajem ź imi kantakty, kab pačynać raspracoŭvać rašeńni isnujučych prablem», — udakładniŭ jon.
Razam z tym, skazaŭ Valeryj Kavaleŭski, na paradku dnia pradstaŭnictva Śviatłany Cichanoŭskaj buduć i bolš składanyja pytańni mižnarodnaha charaktaru.
«My havorym pra infarmacyjny abmien i abmien pazicyjami ŭ razumieńni taho, što prasoŭvaje kožny z bakoŭ — biełaruski i ŭkrainski — na mižnarodnaj arenie, niejkaje spałučeńnie našych namahańniaŭ tam, dzie heta mahčyma, kaardynacyja, mahčyma, navat supolnyja dziejańni pa paradku dnia siońniašniaha».
Najpierš, pavodle Kavaleŭskaha, havorka idzie ab supracoŭnictvie ŭ pytańni sankcyj.
«Voś, naprykład, hetaja ideja, ahučanaja hienieralnym sakratarom AAN, źniać sankcyi ź Biełarusi i z Łukašenki-Pucina, ja b tak skazaŭ, — heta taja tema, pa jakoj my možam razam papracavać. Bo ni Biełarusi, ni Ukrainie nie cikava bačyć, jak dva dyktatary — Pucin i Łukašenka — atrymlivajuć pieradyšku i dadatkovyja resursy. Pieršy dla taho, kab uzmacniać ahresiju suprać Ukrainy, a druhi, kab uzmacniać represii suprać biełarusaŭ. Tamu my, viadoma, budziem hetamu supraćstajać, i pravilna było b heta rabić razam z Ukrainaj, jakaja taksama zacikaŭlenaja ŭ źniaćci błakady z čarnamorskich partoŭ, kab bolš efiektyŭna pastaŭlać zbožža na suśvietnyja rynki», — patłumačyŭ Valeryj Kavaleŭski.
Kiraŭnik Kabinieta pradstaŭnikoŭ Śviatłany Cichanoŭskaj padkreśliŭ, što jaje pradstaŭnictva pracuje tolki treci dzień, ale «budzie sprabavać ruchacca jak maha chutčej».
«Dla nas važna zrazumieć, jakija prablemy ŭ biełarusaŭ tut, va Ukrainie,i što my pavinny zrabić, kab vyrašyć hetyja prablemy. Bo dakładna, kali b łukašenkaŭskaja ambasada tut była, ci kali jana vierniecca siudy, to jana hetymi prablemami zajmacca nie budzie. Joj važna prasoŭvać prapahandu pra režym i śvietłuju budučyniu pry Łukašenku, što jon miratvorac i hetak dalej. Tamu heta vielmi važnyja pytańni. Intaresy biełarusaŭ va Ukrainie — adno z našych pryjarytetnych pytańniaŭ. Łukašenkaŭskaja ambasada vyjechała, tamu naša praca na siońniašni dzień — heta adzinaja aficyjnaja biełaruskaja prysutnaść», — patłumačyŭ Valeryj Kavaleŭski.
24 maja delehacyja Ofisa Cichanoŭskaj na čale z Valeryjem Kavaleŭskim pieradała biełaruskim dobraachvotnikam z pałka Kalinoŭskaha i pałka «Pahonia» aŭtatranspart, a taksama miedykamienty, turnikiety i pradukty. Hetuju dapamohu sabrali biełarusy i meryja Vilni, pra što damoviłasia Śviatłana Cichanoŭskaja z meram Vilni Remihijusam Šymašusam u krasaviku 2022 hoda.
