Što zapatrabavana najbolš?
Dla pracy ŭ IT-śfiery treba dobra viedać anhielskuju
«Heta svojeasablivy padmurak, pakolki vyvučycca z nula na taho ž teściroŭščyka za 3-6 miesiacaŭ možna, a vyvučyć z nula movu za taki pieryjad — nie», — kaža hr-śpiecyjalistka (imia nie nazyvajecca pa jaje prośbie).
Kali z anhielskaj u vas usio dobra i vy majecie namier pracavać u IT, to varta vyznačycca, da čaho mienavita ŭ vas lažyć duša. Kožnaja śpiecyjalnaść praduhledžvaje peŭny skład rozumu. Raspracoŭščyk u ideale pavinien być z profilnaj IT abo matematyčnaj adukacyjaj. Teściroŭščykam stać krychu praściej.
Biznes-analityk — heta čałaviek, jaki źjaŭlajecca suviaznym źvianom pamiž kamandaj raspracoŭščykaŭ i klijentam. Ad takich śpiecyjalistaŭ patrabujecca mienšy ŭzrovień pahłyblenaści ŭ roznyja techničnyja niuansy, ale jany ŭsio adno pavinny dobra ciamić ŭ IT-śfiery.
Pa słovach surazmoŭcy, try samyja zapatrabavanyja śpiecyjalnaści ciapier — front-end developer, Java developer i Python developer (roznyja vidy raspracoŭščykaŭ).
Usiaho ŭ biełaruskaj IT-halinie ciapier bolš za 1670 vakansij (pa danych servisu rabota.by).
Kursy kaštujuć kala 500 dalaraŭ. Ale heta taksama biznes
Kali vy nie vučylisia na prahramista va ŭniviersitecie, to vaš šlach ajcišnika budzie pačynacca z kursaŭ. U siecivie chapaje mnostva jakasnych urokaŭ. Pryčym jak biaspłatnych, tak i niedarahich.
«Pry žadańni možna vyvučycca i takim čynam, ale dla hetaha treba mieć vialikuju siłu voli, tamu čaściej za ŭsio ludzi vybirajuć varyjant naviedvańnia płatnych kursaŭ. Škoł, jakija hatovyja davać viedy šmat, bo prodaž płatnych kursaŭ heta taksama biznes», — zaŭvažaje surazmoŭca.
Akramia niepasrednaha naviedvańnia kursaŭ, śpiecyjalistka adznačaje važnaść pastajannaha samaraźvićcia. Jana rekamienduje ŭsim žadajučym pasprabavać siabie ŭ IT čytać šmat profilnaj litaratury, hladzieć tematyčnych błohieraŭ i, viadoma ž, udaskanalvać uzrovień anhielskaj.
«Sami kursy kaštujuć kala 500 dalaraŭ. Ale treba razumieć, što ŭ bolšaści vypadkaŭ pačatkovaha ŭzroŭniu budzie niedastatkova dla taho, kab uładkavacca na pracu. Tamu spatrebicca praciahvać navučańnie na nastupnym etapie. Niekatoryja vučni, jakija bačać pierśpiektyvu dla raźvićcia ŭ hetym kirunku, za asobnuju płatu najmajuć sabie mientaraŭ, jakija ich vučać i dapamahajuć u pryvatnym paradku.
U pryncypie, kali kazać ab prafiesii teściroŭščyka, to pry ŭmovie vałodańnia anhielskaj movaj i schilnaści da hetaj prafiesii ŭ vas budzie šaniec uładkavacca paśla 3-6 miesiacaŭ kursaŭ. Ale nie varta zabyvać, što z kožnym hodam stanovicca ŭsio bolš ludziej, jakija majuć takija siertyfikaty. Tamu znajści pracu budzie nie tak užo i prosta».
Adrazu paśla karotkich kursaŭ, kaža hr-śpiecyjalistka, praściej za ŭsio ŭładkavacca na teściroŭščyka, jakoha ŭžo zhadali, i front-end raspracoŭščyka.
Usio prosta tolki ŭ rekłamie
Najmalniki najbolš achvotna biaruć na stažyroŭku vypusknikoŭ VNU profilnych śpiecyjalnaściaŭ, čym bolš darosłych ludziej, u jakich za plačyma jość tolki niejkija kursy.
«Heta tolki ŭ rekłamie samich kursaŭ usio vyhladaje prosta i pryhoža. Viadoma, byvaje, kali, naprykład, niechta ŭ 30-40 hadoŭ kardynalna mianiaje śfieru dziejnaści, vyrašaje pasprabavać siabie ŭ IT, prachodzić kursy, paśla čaho ŭładkoŭvajecca na pracu i stanovicca paśpiachovym śpiecyjalistam. Ale heta ŭsio ž redkaść, kali ŭ čałavieka sapraŭdy jość schilnaści, a jon prosta doŭha pracavaŭ u inšaj śfiery i nijak nie navažvaŭsia syści ŭ IT», — adznačaje surazmoŭca.
Tym nie mienš, hałoŭnym faktaram pry pošuku supracoŭnika źjaŭlajecca nie ŭzrost, najaŭnaść dypłoma abo roznych siertyfikataŭ, a toje, što suiskalnik moža pakazać u svaim GitLab (ci GitHub). GitLab — heta sajt, dzie inžyniery-prahramisty zachoŭvajuć kod. Možna skazać, partfolija z pracami, pa jakich bačna, što čałaviek umieje.
Kampanii skaracili nabor
Havoračy ab pierśpiektyvach pracaŭładkavańnia, hr-śpiecyjalistka zaznačaje, što ciapier nadyšli nie samyja lepšyja časy.
«Raniej było davoli papularna, kali paśla navučańnia i stažyrovak z 20 čałaviek adbirali 2-3 najbolš talenavitych, jakich potym brali na pracu. Ale ciapier situacyja źmianiłasia, i ŭvajści ŭ IT čałavieku biez vopytu stała značna składaniej.
Z pačatkam vajny mnohija zanialisia rełakiejtam supracoŭnikaŭ i samich kampanij. Niaredka heta vymušanaja miera, jakaja pradyktavanaja zakazčykami, jakija nie chočuć, kab vykanaŭcy i kampanii znachodzilisia na terytoryi Biełarusi.
Z-za niestabilnaści kampanii prykmietna skaracili nabor novych supracoŭnikaŭ. Mnohija prypynili nabor ludziej na «łaŭku zapasnych». Jaje imknucca farmavać z tych supracoŭnikaŭ, jakija ŭžo majucca ŭ štacie», — adznačaje śpiecyjalistka.
Akramia hetaha, pačaścilisia vypadki, kali navat dla śpiecyjalistaŭ-pačatkoŭcaŭ vystaŭlajuć patrabavańnie adrazu rełakavacca.
«Dla pačatkoŭcaŭ heta vialikaja prablema, kali kampanija hatovaja brać da siabie na pracu tolki pry ŭmovie adjezdu ŭ inšuju krainu. Zarobki ŭ IT na pačatkovym etapie nievialikija. Pieršyja miesiacy heta moža być 300-400 dalaraŭ, i tolki niedzie praz hod čałaviek daraście da midła, dzie budzie zarablać 1200-1500 dalaraŭ».
Usie šukajuć daśviedčanych śpiecyjalistaŭ
Surazmoŭca adznačaje, što praz skaračeńnie naboru na rynku pačała źjaŭlacca pieranasyčanaść kadrami. Heta ŭ svaju čarhu pryviało da pavyšeńnia patrabavańniaŭ da kandydataŭ.
«Ciapier usie starajucca brać ludziej z vopytam i takich šmat. Častka niehatovych da rełakiejtu śpiecyjalistaŭ źmianiajuć kampanii, kab zastacca ŭ Biełarusi. Z-za hetaha u pracadaŭcaŭ źjaŭlajecca bolš mahčymaściaŭ vybirać sabie supracoŭnika ź liku tych, chto ŭžo paśpieŭ papracavać u IT. Ludzi biez vopytu ciapier praktyčna nie patrebnyja, tamu možna skazać, što kankretna ŭ biahučaj situacyi ŭvachod u IT mocna ŭskładniŭsia».
Tym nie mienš śpiecyjalistka vykazvaje ŭpeŭnienaść, što takaja situacyja časovaja, tamu žadajučym vučycca na prahramista nie varta admaŭlacca ad zadumanaha.
«Hetaja prafiesija ŭ lubym vypadku zastaniecca zapatrabavanaj, pakolki IT-śfiera praciahvaje raźvivacca. Adzinaje, čaho ciapier rabić dakładna nie varta, — heta kidać dziela vučoby raniejšuju pracu ŭ nadziei na toje, što pa zaviaršeńni vučoby vy chutka znojdziecie pracu i vyjdziecie na salidny zarobak».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Biełarusy łamanulisia pieravučvacca ŭ IT, ale realnaść žorstkaja — našych džunijaraŭ nidzie nie čakajuć
«Z krainy źjazdžajuć tysiačy ludziej z zarpłataj 2500—3000 dalaraŭ». Jak adtok ajcišnikaŭ paŭpłyvaje na ekanomiku
