Adkazvajučy na pytańnie pra mabilizacyju 1 młn čałaviek, pra jakich dniami zhadaŭ ministr abarony Ukrainy Alaksiej Reźnikaŭ, Arastovič skazaŭ, što ciapier prablema nie ŭ asabistym składzie, a ŭ zbroi:
«Zdam dziaržaŭnuju tajamnicu: nas mocna bolš, čym kali my pačynali hetuju vajnu. Tamu ličba Reźnikava nie hučyć takoj strašnaj, nie takaja ŭžo jana vialikaja ŭ paraŭnańni z tym, chto ŭžo ciapier staić pad ružžom. U nas inšaja prablema — ciažkaja zbroja».
Ale jość nadzieja na lend-liz: Arastovič adznačyŭ, što ŭkrainskaje vojska navat bieź lend-liza zdoleła «razmałoć» vojski Rasii na čatyroch apieratyŭnych napramkach — Kijeŭ, Charkaŭ, Čarnihaŭ, Sumy:
«A što ž budzie, kali pryjedzie lend-liz u tavarnaj kolkaści? Tamu što hetyja harady vyzvaliła terabarona, lohkija piachotnyja padraździaleńni ź nievialikimi ŭkrapleńniami miechanizavanych, razmałacili tankavyja dyvizii, desantnyja padraździaleńni, marskuju piachotu. Što ž budzie, kali pryjeduć i sfarmujucca narmalnyja ciažkija bryhady na lend-lizie?»
Ale i ciapier, pavodle Arastoviča, spravy iduć niakiepska:
«My pierajšli ŭ maleńkuju kontrataku na Iziumskim napramku. Upieršyniu z momantu pačatku hetaj apieracyi (z 4 krasavika), našy spynili ich na napramku hałoŭnaha ŭdaru i kontratakavali dy adcisnuli. Z vajennaha punktu hledžańnia heta aznačaje, što abaznačylisia prykmiety vialikaha pierałomu na kirunku hałoŭnaha ŭdaru!»
Zachad ža, pavodle jaho nazirańniaŭ, daje rasijskim palityčnym, ekanamičnym i vajskovym elitam «kluč», ź jakim jany mohuć vyjści ź izalacyi — pazbavicca ad Pucina:
«Rasijskamu narodu, rasijskaj armii, rasijskamu kiraŭnictvu padkazvajuć: «Pazbaŭciesia ad Pucina! Vy kansalidujeciesia vakoł śmiarotna chvoraha čałavieka».
Što da rasijan, to Arastovič pierakanany, što ich u budučyni nakryje na niekalki hadoŭ depresija i pieražyvańnie katastrofy maralnaj, palityčnaj i ekanamičnaj:
«Hety machavik jašče tolki pačynajecca. Užo najciažejšyja nastupstvy, dla ludziej, jakija niešta razumiejuć, vajennaja katastrofa ŭžo nastupiła. Ale heta jašče nie dajšło, jano dojdzie. A takija nastupstvy, jak ściskańnie ščyhrynavaj skury, rynku rasijskich uzbrajeńniaŭ, strata hieapalityčnaha ŭpłyvu i naohuł pieratvareńnie pucinskaj Rasii ŭ čumny barak, ad jakoha ŭsie šarachajucca, heta jašče hadami budzie razhortvacca.
Budzie adčuvańnie tatalnaj katastrofy, voś, što ŭsio pavaliłasia, usio nie tak. A za hetym staić vielmi balučaja vysnova — usio, u što my vieryli, akazałasia niapraŭdaj. A heta — pierachod sacyjalna-palityčnaj katastrofy ŭ indyvidualnuju katastrofu kožnaha hramadzianina.
Katastrofa režymu kanviertujecca ŭ asabistuju maralnuju katastrofu kožnaha, chto vieryŭ u Kreml i pucinski režym, tamu što Rasija i pucinski režym — heta vielmi roznyja rečy. I voś ich čakaje žudasnaja maralnaja katastrofa».
