Fota: skrynšot ź jutub-kanała «Maksimalna»
Zanatavali samaje cikavaje z intervju na jutub-kanale «Maksimalna».
Da vybaraŭ Ina pracavała ŭ kulturnaj prastory Ok16.
«Maja častka pracy była źviazana z teatram i ŭsim, što padobna na teatr u Ok16. Ja dumaju, što ŭsie, chto tam byŭ kali-niebudź, viedajuć, što heta nie taki teatralny budynak, dzie stajać aksamitnyja kresły i siadziać ludzi pad žyrandolaj…
Heta miesca, jakoje davała mahčymaść prajaŭlacca. Važna nie toje, na jaki ivent prychodziš, a toje, što heta pad saboj niasie, što ŭ hetym miescy moža być i rejv, i śpiektakl, i vystava, a heta značyć, svaboda tvajoj tvorčaj prajavy. Ty možaš znajści tam pa svaich intaresach toje, što tabie blizka, i budzieš adčuvać tam siabie svaim ci svajoj».
Ina zhadvaje, što źmianiłasia ŭ Ok16 z prychodam Maryi Kaleśnikavaj.
«Maša pryŭniesła niejki svoj drajv, jaki joj ułaścivy jak asobie. U Ok16 my ŭžo pracavali tady hoda paŭtara, treba byŭ niejki nastupny ŭzrovień, śviežaja kroŭ, novyja ludzi z novymi idejami. I ŭ hetym sensie našy žadańni supali, tamu što Maša — čałaviek šyrokaha myśleńnia. Heta byŭ, viadoma, uźlot. I kali Ok16 skončyŭ svajo isnavańnie, heta adbyłosia na ŭźlocie, možna skazać».
Publičny vobraz Kaleśnikavaj adpaviadaje tamu, jak jana siabie pavodzić u žyćci i na pracy, dzielicca Ina Kavalonak.
«Jana nie viedała ad samaha pačatku, što stanie lidarkaj pratestu. I ŭ hetym sensie cikava było nazirać za joj, jak jana źmianiałasia. Ale ŭ cełym, što mienavita Maša akazałasia tam, dzie jana akazałasia, kaniešnie, dla mianie nie było siurpryzam. Maša — ekstraardynarnaja asoba ŭ pramym sensie słova. Čałaviek ź niazvykłaj kambinacyjaj, zdavałasia b, prostych jakaściaŭ u vielmi mocnaj kancentracyi».
Ina apisvaje noč u štabie z 9 na 10 žniŭnia 2020-ha.
«Hałoŭnaje adčuvańnie — heta niepradkazalnaść. Nichto ž nie viedaŭ, što budzie adbyvacca. Pamiataju momant, kali pryjšli pieršyja paviedamleńni, što na niekatorych učastkach paviesili praŭdzivyja pratakoły. My siadzieli ŭ pakoi, praz škło žurnalisty bačyli, što adbyvajecca ŭ nas. I Maša akurat heta pačuła [pra praŭdzivyja pratakoły], padskočyła — i žurnalisty zrazumieli, što adbyłosia niešta absalutna ekstraardynarnaje. Prycisnulisia da škła, pačali fotkać. Heta była ščyraja radaść».
Niadaŭna ŭ Polščy staviŭsia śpiektakl pra palitźniavolenych. Ina była adnoj z pradziusarak.
«Vialiki dziakuj teatru, jaki pahadziŭsia na hetuju troški avanturu. Kamanda z roznych krain — biełaruskija artysty, biełaruskija pradziusarki, režysior z Rasii. Hetaja kamanda sabrałasia, kab zrabić śpiektakl u pieršuju čarhu dla zamiežnikaŭ, kab im było choć troški zrazumieła pra palitviaźniaŭ. Meta była patłumačyć, što za hetym staić. Usie vielmi ździŭlalisia: božuchna, stolki ludziej u adnoj kamiery, boža, duš raz na tydzień 15 chvilin. I, kaniešnie, heta sposab praciahvać kazać pra padziei ŭ Biełarusi, što ničoha nie spyniłasia, i danina pavahi samim palityčnym viaźniam».
Što źmianiłasia ŭ palityčnych źniavolenych paśla pačatku vajny?
«Jość dźvie tendencyi, mnie zdajecca, — dzielicca nazirańniami Ina. — Pa-pieršaje, jašče bolš pačali błakavać listy. Prablemy ź listavańniem u palityčnych byli zaŭsiody, ale zaraz vielmi zaŭvažna.
A druhi momant — hetaja tema pačynaje sychodzić na druhi płan navat u atačeńni biełarusaŭ. My nie možam sabie dazvolić na heta zabycca, bo chto jašče budzie hetym zajmacca aproč nas?
My možam heta ŭbačyć u svaich sacyjalnych sietkach, kali apošni raz niechta repościŭ navinu vajennuju ci navinu z žyćcia palitźniavolenych. Vidavočna, u fokusie vajna. Zaraz šmat ludziej vyjazdžaje ź Biełarusi, i ŭ niejkim sensie dla ich biaśpiečniej havaryć pra toje, što adbyvajecca ŭnutry krainy.
Stała bolej vypadkaŭ, kali ludziam jašče adno kryminalnaje abvinavačvańnie pradjaŭlajuć, adpaviedna pavialičvajecca ich termin u niavoli».
