Skrynšot z pakajannaha videa
Nikałajeva 10 lutaha z vykarystańniem mabilnaha telefona, noŭtbuka i fłeškarty spampavała ŭlotki z sajta xx2022.org, razdrukavała 16 štuk, i tyja byli vyjaŭlenyja i vyniatyja 10 lutaha pa miescy pracy Nikałajevaj u dziciačym sadku. Akramia hetaha, abvinavačanaja 9 lutaha adpraviła znajomamu P. Pakaciłavu ŭ Telehramie publikacyju «Sumlennych ludziej» ad 27 śniežnia, u jakoj ŭtrymlivaŭsia zaklik da raspaŭsiudžvańnia hetych ulotak i prapanoŭvałasia rabić biuleteni niesapraŭdnymi.
Žančyna na pracesie raspaviała, što ŭ śniežni ŭ internecie źjaviłasia infarmacyja pra paradak udziełu ŭ respublikanskim refierendumie. Pakolki žančyna lepš usprymaje infarmacyju ŭ drukavanym vyhladzie, to vyrašyła razdrukavać źviestki dla asabistaha aznajamleńnia. Jana spampavała ulotku na fłešku i razdrukavała na pracoŭnym pryntary vosiem listoŭ — pa dźvie ŭlotki na kožnym. Pa słovach Łarysy, jana chacieła razdrukavać tolki adzin ekzemplar ulotki, ale niechta ź jaje kaleh raniej ustanaviŭ na pryntary značeńnie vosiem ekzemlaraŭ, tamu jana razdrukavała mienavita takuju kolkaść.
Paśla hetaha jana razrezała ulotki i pakłała ich u šufladku pracoŭnaha stała. 10 lutaha jana ŭspomniła pra ŭlotki i źbirałasia ich adnieści dadomu, kab vykarystoŭvać ich dla nasieńnia raślin, pakłała ich u pakiet. Adnak u chutkim časie jana była zatrymanaja supracoŭnikami milicyi, jakija zabrali ŭ jaje ŭlotki.
Što kazali na sudzie śviedki?
Što charakterna, Pavieł Pakaciłaŭ byŭ pryznany paciarpiełym pa spravie. Jon na sudzie paćvierdziŭ, što Nikałajeva dasyłała jamu paviedamleńnie ad «Sumlennych ludziej», ale, pa jaho słovach, jon nie adkryvaŭ spasyłku i nie hladzieŭ paviedamleńnie, pakolki jaho hetaja tema nie cikaviła. Pa słovach mužčyny, abvinavačanaja i raniej dasyłała jamu paviedamleńni «apazicyjnaha charaktaru», ale jon ich vydalaŭ. Paciarpieły na sudzie raspavioŭ, što časam ź Nikałajevaj abmiarkoŭvali situacyju ŭ krainie. Łarysa kazała jamu, što «jak adbyvajecca ŭ nas u krainie, nie pavinna być, žyć u takim napružańni niemahčyma, treba niešta vyrašać». Na sudzie mužčyna skazaŭ, što staraŭsia nie kamunikavać z abvinavačanaj na hetyja temy, kab nie psavać adnosiny.
Na sudzie taksama dapytali supracoŭnic dziciačaha sadka, u jakim pracavała Nikałajeva. Tak, naprykład, Laŭkovič raspaviała na sudzie, što «joj viadoma, što Nikałajeva prytrymlivałasia pazicyi, što treba niešta mianiać u krainie, adnak heta nikoli nie abmiarkoŭvałasia».
Łarysa Nikałajeva ŭtrymlivałasia pad vartaj z 23 studzienia. Svajo 60-hodździe žačyna sustreła za kratami. Sudździa Skuratovič pryznała jaje vinavataj pa č. 2 art. 191 Kryminalnaha kodeksa i pryznačyła try hady abmiežavańnia voli biez nakiravańnia ŭ papraŭčuju ŭstanovu («chatniaj chimii»). Žančynu vyzvalili ŭ zale suda.
Sud pastanaviŭ źniščyć 16 ulotak. Akramia hetaha, u Łarysy kanfiskavali telefon, noŭtbuk i navat fłešku, jak «srodki ździajśnieńnia złačynstva».
