«Z pačatku vajny my ŭžo 47 sutak abaraniajem Maryupal… my trymali abaronu hodna, robiačy niemahčymaje. Ale lubyja resursy majuć ułaścivaść zakančvacca. 

Piachota ŭsia zahinuła, i strałkovyja bai viaduć artylerysty, zienitčyki, suviazisty, kiroŭcy i kuchary. Navat arkiestr. Hinuć, ale zmahajucca. My pastupova zakančvajemsia.

Mudryja hienierały rajać zabirać bojeprypasy ŭ praciŭnika. Napeŭna, nie vymierli hetyja saŭkovyja parkietniki, tamu šmat narodu z-za ich pamre daremna. Byli šancy. Byli mahčymaści, ale z-za bajaźlivaści dakładvać pa viertykali jany nie realizavanyja.

Z nami ŭžo nichto nie choča mieć znosiny, tamu što my śpisanyja.

Siońnia budzie, napeŭna, krajni boj, pakolki bk [bojekamplektaŭ] nie zastałosia. Dalej — urukapašnuju. Dalej — dla niekatorych śmierć, a dla niekatorych — pałon».

Marpiechi paviedamili, što za čas bajavych dziejańniaŭ im adzin raz pieradali 50 122 snarady, 20 min, trochi «enłavaŭ» i starlink Iłana Maska.

Biez bojekamplektu marpiechi nie mieli mahčymaści abaraniacca, tamu praciŭnik pastupova adsunuŭ ich na zavod «Azoŭmaš», «akružyŭ, skavaŭ ahniom i zaraz sprabuje źniščyć».

36-ja bryhada adznačaje, što byŭ varyjant pryvieści da ich reziervy, kab uzmacnić i praciahnuć abaronu. Taksama byli varyjanty bryhadzie ździejśnić praryŭ i vyjści da svaich vojskaŭ. Pra heta dakładvali ŭ apieratyŭnym kamandavańni «Uschod», dzie navat pačynali płanavać apieracyju, ale «ich starejšyja štaby zavaročvali».

Ab ciažkaj situacyi paviedamlali ŭ Apieracyi abjadnanych sił. Tam kazali — «Trymajciesia, my pracujem, abiacali viertalot, jaki tak i nie prylacieŭ».

Marpiechi dadali, što razmaŭlali z hałoŭnakamandujučym, jaki abiacaŭ debłakadu, i z harantam, jaki «harantavaŭ abo palityčnaje, abo vajennaje rašeńnie situacyi».

Ciapier pałova pakinutych u bryhadzie — paranienyja, što budzie dalej, marpiechi nie viedajuć.

Pavodle źviestak vydańnia, aŭtaram hetaha teksta źjaŭlajecca adzin z vyšejšych aficeraŭ 36-j bryhady. Heta nie aficyjnaja pazicyja vajskovaj častki, a «list marskoha piechacinca», praź jakoha ažyćciaŭlałasia suviaź z padraździaleńniem i jaki apisvaje realnaje stanovišča spraŭ pa abaronie Maryupala marskimi piechacincami.

Adznačajecca, što suviaź z pres-aficeram bryhady stračanaja, ale vajskoviec, jaki viadzie FB-staronku bryhady, paćvierdziŭ, što jana nie ŭzłamanaja. Aficer prasiŭ apublikavać zvarot biez ukazańnia jaho asoby paśla taho, jak jon nie zmoža vychodzić na suviaź.

Krynicy «Ukrainskaj praŭdy» u raźviedcy paćvierdzili, što situacyja ŭ Maryupali vielmi ciažkaja, sproby debłakavańnia byli niaŭdałymi, va ŭkrainskaj armii niama siłaŭ dla hetaha.

Hałoŭnakamandujučy USU Valeryj Załužny prakamientavaŭ situacyju nastupnym čynam: «Praciahvajecca abarona Maryupala. Suviaź z padraździaleńniami sił abarony, jakija hieraična ŭtrymlivajuć horad, ustojlivaja i padtrymlivajecca. Padkreślivaju, što praviadzieńnie abaronnych apieracyj nie źjaŭlajecca temaj dla publičnych abmierkavańniaŭ. My robim mahčymaje i niemahčymaje dla pieramohi i zachavańnia žyćcia asabistaha składu i mirnych žycharoŭ va ŭsich napramkach».

U lutym Alaksandr Łukašenka zajaŭlaŭ, što «vajna praciahniecca try-čatyry dni» i pradrakaŭ chutki razhrom Ukrainy. Ën taksama kazaŭ, što «Zialenski truchnuŭ». U sakaviku Łukašenka znoŭ zaklikaŭ Ukrainu pahadzicca na patrabavańni Rasii i pahražaŭ, što ŭ advarotnym vypadku vajna zakončycca kapitulacyjaj pa ŭzory Japonii ŭ 1945 hodzie. 

Paśla paŭtara miesiaca vajny prasoŭvańnie rasijskich vojskaŭ spyniłasia na ŭsich kirunkach, i Maskva ŭsio bolš vyrazna demanstruje hatoŭnaść da kampramisaŭ. Kali napačatku rasijski bok nastojvaŭ, kab pieramovy prachodzili na terytoryi Biełarusi, ź jakoj adbyłosia ŭvarvańnie va Ukrainu, to paśla jany adnavilisia ŭ Stambule.

Rasijskija vojski daminujuć u pavietry. Niahledziačy na prośby Kijeva, Ukraina tak i nie atrymała ad Zachadu ani sučasnych supraćpavietranych kompleksaŭ, ani dalnabojnych rakiet. Heta robić nastupalnyja apieracyi niemahčymymi. Ukraincy ŭparta abaraniajuć svaje pazicyi, ale majuć ciažkaści ŭ advajoŭvańni stračanych terytoryj. Debłakavańnie Maryupala tym bolš ciažkaje, što miascovaść vakoł jaho raŭninnaja i stepavaja, ukrainskija častki stali b na joj lohkaj zdabyčaj dla rasijskaj avijacyi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?