Bundeśliha adnoj ź pieršych u futbolnaj Jeŭropie raspačała kampaniju pa padtrymcy Ukrainy. Fota: AFP
Raspačałosia ŭsio padčas subotniaj tranślacyi hałoŭnaj sustrečy 28-ha tura niamieckaj Bundeślihi. Nie prajšło i čverci hadziny ŭ vyśviatleńni adnosinaŭ «Barusii» z Dortmunda dy «Lejpcyha», jak kamientatar raptoŭna pierarvaŭ žyvy efir.
Napačatku Ihar Kytmanaŭ patłumačyŭ fors-mažor abstavinami, jakija nie zaležać ad tranślatara. Adnak paśla ŭdakładniŭ: maŭlaŭ, u Bundeślizie vyrašyli nie prytrymlivacca pryncypu «sport pa-za palitykaj» — i heta spravakavała rasijskuju reakcyju ŭ adkaz.
Nu a mienš, čym praz 24 hadziny, situacyja paŭtaryłasia znoŭ. Tolki na hety raz rasijanie pratrymalisia ŭsiaho dzieviać chvilin dvuboja miž «Majncam» dy «Barusijaj» ź Mionchienhładbacha. Paśla čaho ŭžo biez ekivokaŭ u efir pajšło abvinavačvańnie Hiermanii ŭ palityzacyi sportu.
Što vyklikała abureńnie televizijnych bosaŭ? Pierš za ŭsio, baner «Stop war» na fonie ŭkrainskaha ściaha, jaki piermanientna źjaŭlaŭsia na centralnaj led-paneli stadyjonaŭ. Pa-druhoje, chešteh «Stand with Ukraine» — jon supravadžaŭ bolšaść infarmacyjnych paviedamleńniaŭ padčas sustrečy. Apošniaj ža kroplaj stała demanstracyja zaŭziataraŭ z błakitna-žoŭtym praparami.
Jak raskazali nam znajomyja ź situacyjaj, bujnyja płany fanaŭ kiraŭnictva «Matču» pryraŭniała da antyrasijskaj prapahandy, tamu dało zahad «nacisnuć na rubilnik».
Cikava, što Bundeśliha ŭžo daŭno razhladajecca rasijskimi fiederałami jak varožaja arhanizacyja. U sakaviku «Matč» aburyŭsia patrabavańniem pravaŭładalnikaŭ zamianić emblemu turnira va ŭsich efirach — i admoviŭsia pierafarboŭvać łoha spabornictva ŭ žoŭta-błakitnyja kolery.
U adkaz pryjšła ledźvie nie sudovaja pozva z pahrozaj ad niamieckaha futbolnaha sajuza razarvać kantrakt. Tady da radykalnych mier sprava nie dajšła, niahledziačy na toje, što rasijanie praciahnuli efiry biez pravak.
Adnak ciapier, vierahodna, supracoŭnictva usio ž spynicca — častkova albo całkam. Chacia «Matč» naŭradci hetym budzie šakavany.
Napačatku viasny krainu, što raźviazała vajnu, pakinuli biez efiraŭ anhlijskaja Premjer liha dy francuzskaja Liha 1 — kantrakty skasavalisia jeŭrapiejcami ŭ adnabakovym paradku.
Darečy, manipulacyi z pakazami futbołu dla «Matča» — nie navina. Niekalki tydniaŭ tamu kanał adznačyŭsia»pry tranślacyi hulni Lihi Jeŭropy miž «Vest Chemam» dy «Sieviljaj». Kali na 88-j chvilinie sustrečy anhlijski kłub kidaŭ u boj ukrainca Andreja Jarmolenku, režysiory pierakryli zamienu płanam stadyjona.
Kali ž paŭabaronca na 112-j chvilinie prynios łondancam pieramohu zamiest jaho śviatkavańnia hledačy pabačyli… čałavieka, što łasavaŭsia burhieram! Miž tym, miač zajmieŭ vyrašalnaje značeńnie dy vyvieŭ «Vest Chem» u nastupny raund spabornictva.
Radaść ukrainca Jarmolenki rasijskaje telebačańnie zamianiła kudy bolš važnym płanam. Fota: skrynšot efira «Matč TB»
Pryncypovaść TB, mahčyma, była b zrazumiełaj pry peŭnaj paśladoŭnaści ŭ dziejańniach fiederałaŭ. Adnak na tym ža minułym tydni viadučy žyvoha efiru Anton Anisimaŭ padčas padsumavańnia vynikaŭ kvalifikacyi ČS-2022 pa futbole nazvaŭ hulcoŭ zbornaj Polščy «miarzotnymi istotami».
I zrabiŭ heta tolki tamu, što polskija spartoŭcy adabralisia na «mundzial» biez vočnaha zmahańnia z rasijanami. Apošnich, nahadajem, za ahresiju z boku dziaržavy ŭ dačynieńni da Ukrainy dyskvalifikavali z usich turniraŭ pad ehidaj FIFA i UEFA jakraz napiaredadni raunda płej-of.
Anisimaŭ ža, jaki ledźvie nie harantavaŭ rasijanam miesca na forumie, pabačyŭ u hetym palityčnuju sprobu pieraškodzić spartyŭnym pryncypam. I tamu «daŭ volu emocyjam prostaha zaŭziatara».
Nijakaj palityki «Matč» nie pabačyŭ i ŭ žyvoj tranślacyi kancertu «Za śviet biez nacyzmu! Za Rasiju! Za Prezidenta!», jaki adbyŭsia ŭ siaredzinie sakavika ŭ «Łužnikach».
Prapahandziscki śpič Uładzimira Pucina, jaki apraŭdvaŭ raźviazanuju va Ukrainie vajnu, słuchali tolki na terytoryi stadyjona pad 200 tysiač čałaviek.
Tranślatar ža apraŭdvaŭ pakaz mierapryjemstva najaŭnaściu tam vielizarnaj kolkaści spartoŭcaŭ-čempijonaŭ: fihurystki Sinicynaj, himnastki Avierynaj, łyžnika Balšunova, płyŭca Ryłova i jašče dziasiatka alimpijcaŭ. Da taho ž vieŭ mierapryjemstva hołas rasijskaha bijatłonu Dźmitryj Hubiernijeŭ.
U vyniku śpievy Paliny Haharynaj dy patryjatyčnyja nastaŭleńni Aleha Hazmanava aŭdytoryja «Matču» čuła ciaham niekalkich hadzin zamiest prahladu realnych spabornictvaŭ — tych, dziela jakich i zapuskaŭsia telekanał.
Lepšyja rasijskija spartoŭcy — na palityčnym mierapryjemstvie ŭ «Łužnikach». Fota: skrynšot tranślacyi kanała «Matč»
Nu i kaniešnie, jakaja ž palityka na kanale, jaki vyklučaje sa svaich šychtoŭ top-kamientataraŭ, što dazvolili sabie krytyčnyja vykazvańni na adras ułady ci jaje dziejańniaŭ? Miž inšym, zvalnieńni takoha kštałtu adbyvajucca na «Matčy» z 2016 hoda, pra što mohuć raspavieści Alaksiej Andronaŭ dy Dzianis Kazancaŭ. Śviežyja prykłady — historyi Dźmitryja Šniakina dy Ramana Nahučava, jakich «adchilili ad pracy na niavyznačany termin»…
Vasil Utkin — darečy, taksama zvolnieny z kanała hołas sportu — niadaŭna padličyŭ, što dyktatura na kanale kaštavała pracy ŭžo bolš jak dziasiatku supracoŭnikaŭ. I adtok kadraŭ, pa anonsie profi, praciahniecca.
Tamu, kaniešnie, samy čas vinavacić u palityzacyi sportu Bundeślihu — inšych prykładaŭ uvarvańnia prapahandy na čužoje pole i ŭjavić niemahčyma…
«Naša Niva» adnaŭlaje zbor danataŭ — padtrymać prosta
Polšča admaŭlajecca hulać z Rasijaj u płej-of Čempijanatu śvietu
