Fota: pixabay.com
Što tańniej — kipiacić vadu dla makarony ŭ elektryčnym čajniku ci ŭ kastruli na hazavaj kanforcy?
Z adnaho boku, zdajecca, što čajnik — najlepšy vybar, bo jon kipiacić vadu napramuju, kastrula taksama hreje vadu, ale i jaje samu spačatku treba nahreć. Vada ŭ čajniku zakipić bolš chutka, a enierhii na heta spatrebicca mienš. Ź inšaha boku, z ulikam roźnicy ŭ taryfach na haz i elektryčnaść kipiacić vadu ŭ kastruli moža być bolš tannym varyjantam. Ale pry hetym važna, kab vy nahravali nie bolš vady, čym treba, vykarystoŭvali kryšku i svoječasova vyklučali kanforku, piša Guardian.
Ci tracicca elektryčnaść, kali ja pakidaju zaradku ad hadžeta ŭ razietcy?
Tak. Kampanija British Gas śviedčyć, što rachunki brytancaŭ za elektryčnaść možna było b źnizić na sumu da 23% ad ahulnaj, kali b tyja vyklučali hadžety z razietak. Televizary, prystaŭki dla kabielnaha telebačańnia, hulniavyja kansoli i inšyja pryłady ŭ režymie čakańnia vykarystoŭvajuć elektryčnaść, i čym starejšaja pryłada, tym bolš enierhii sychodzić. Toje ž tyčycca i devajsaŭ nakštałt elektryčnych zubnych ščotak i brytvaŭ, jakija časam možna pastavić zaradžacca i zabyć pra ich. Lepiej za ŭsio adklučać takija hadžety ad sietki, jak tolki ličba na dyspłei dasiahnie 100%, tym bolš, što heta padoŭžyć pracu akumulatara.
Što tańniej — hazavyja ci elektryčnyja kanforki?
Hazavyja. Ale ŭsio składaniej, kali ŭ vas indukcyjnaja plita. Takija plity zvyčajna najbolš enierhaefiektyŭnyja, bo ŭ ich nie tracicca enierhija na toje, kab daremna nahravać miesca vakoł kanforki.
U lubym vypadku, možna dadatkova zekanomić, kali vykarystoŭvać kastrulu pravilnaha pamieru, napaŭniać jaje toj kolkaściu vady, jakaja patrebnaja, i nakryvać kastrulu kryškaj.
Ci možna dobra pamyć adzieńnie na tempieratury, nižejšaj za 40 hradusaŭ?
Tak, sučasnyja srodki dla myćcia bializny dobra pracujuć pry nizkich tempieraturach. Takija brendy, jak Ariel i Persil, kažuć, što ich pradukcyja moža efiektyŭna pramyvać rečy pry tempieratury 30 hradusaŭ, ale z bolš nizkaj tempieraturaj mohuć być prablemy. Praŭda, jakaść myćcia ŭsio roŭna nie pahoršycca mocna. Tym nie mienš, navat kali myć rečy pry tempieratury 30 hradusaŭ, pralnaja mašyna budzie zatračvać na 40 pracentaŭ mienš enierhii, čym pry vyšejšaj tempieratury.
Ci zaŭsiody varta vyklučać śviatło, kali sychodziš z pakoja?
Zvyčajnyja lampački, u tym liku śvietadyjodnyja, nie zatračvajuć dadatkovuju enierhiju na ŭklučeńnie, tamu, kali vam nie patrebnaje śviatło ad ich, lepiej sapraŭdy jaho vyklučyć. Sučasnyja śvietadyjodnyja lampački pracujuć nastolki efiektyŭna, što kali pakidać ich uklučanymi na lišnija piać chvilin, heta nie zrobić vaš rachunak našmat bolšym. Ale ekśpierty ŭsio roŭna rajać vyklučać śviatło, kab zachavać hetuju dobruju zvyčku.
Što tańniej — vanna ci duš?
Duš, pryčym karotki. Zvyčajna dla pryniaćcia vanny patrebnyja 90 litraŭ vady, niedzie 60 litraŭ ź ich — heta haračaja vada i 20-30 — chałodnaja. U toj ža čas u dušy zatračvajecca niedzie 9 litraŭ vady za chvilinu, to-bok prykładna 6 litraŭ haračaj vady i 3 litry chałodnaj. Tamu, kali vy prymajecie duš mienš, čym 10 chvilin, jon budzie tańniejšy za vannu.
Jak vybrać syr: jaki samy karysny, a jakoha lepiej paźbiahać
«Naša Niva» adnaŭlaje zbor danataŭ — padtrymać prosta
