U vyniku byli aryštavanyja pa kryminalnaj spravie Kryścina Čarankova (art. 130 KK RB — raspalvańnie sacyjalnaj varožaści za niekalki dopisaŭ u Instahramie) i Hanna Pyšnik (art. 361-4 KK — sadziejničańnie ekstremisckaj dziejnaści, imavierna, za anarchisckija stykiery), paviedamlajuć pravaabaroncy.
Astatnich zatrymanych asudzili pa administracyjnych spravach: Alaksandr Dzieravieńka, Anton Bialak, Albiert Zubaraŭ, Andrej Otčyk — pa 10 sutak aryštu, Arciom Škirman — 15 sutak.
Muža Kryściny, Fiodara Čarankova, adpuścili da suda. Jaho abvinavačvajuć u raspaŭsiudžvańni ekstremisckich materyjałaŭ (reposty materyjałaŭ «Biełsata»). Sud projdzie 29 sakavika.
U Mazyry ciaham minułaha tydnia zatrymali 33 čałavieki, piša «Svaboda».
«U praŭładnych telehram-kanałach zapuścili infarmacyju, što ŭ Mazyry «nakryli» «bandu anarchistaŭ». Z hetaj kampanii tolki adzin čałaviek niejak cikaviŭsia anarchizmam. Niekatoryja zatrymanyja palitykaj uvohule nie cikavilisia», ‒ raspavioŭ vydańniu žychar Mazyra..
Častka zatrymanych pracuje na Mazyrskim naftapierapracoŭčym zavodzie.
«Ich zatrymali, bo chadzili čutki pra mahčymuju dyviersiju na zavodzie. Heta nie aktyvisty, choć i nie «jabaćki». Prosta narmalnyja ludzi. U kaho znajšli jakija padpiski na telehram-kanały — dali «sutki«. U pratakołach za padpiski na kanały napisali tak: «U svabodnym dostupie dla inšych hramadzian trymaŭ u siabie ŭ telehramie padpisku na ekstremisckija kanały«. Ale inšyja hramadzianie nie majuć «svabodnaha dostupu« da našych telehramaŭ», — kaža žychar Mazyra.
Jon dadaŭ, što ŭ milicyi vyklikaje šalenstva, kali žychary Mazyra zdymajuć i vykładajuć u internet fota i videa z rasiejskimi vajskoŭcami, jakija ciapier «prosta akupavali» rajcentr. Za heta milicyja pieraśleduje taksama.
