Pucin padčas praviadzieńnia 200-tysiačnaha mitynhu ŭ Łužnikach
Tak zvanaja «kamanda tyhraŭ», kudy ŭvachodziać śpiecyjalisty pa nacyjanalnaj biaśpiecy, z 28 lutaha pravodzić imitacyjnyja vučeńni, kab adpracavać mahčymyja miery ŭ adkaz.
Sa słoŭ nienazvanych krynic haziety, hrupa taksama prapracoŭvaje reakcyju na vypadak ataki Pucina pa terytoryi NATO — naprykład, kali rasijskija vojski pačnuć abstrelvać kałony, jakija dastaŭlajuć zbroju i dapamohu Ukrainie z krain aljansu.
Kamanda, jakaja sustrakajecca try razy na tydzień, taksama vyvučaje hatoŭnaść Rasii napaści na susiednija krainy, uklučajučy Małdovu i Hruziju.
Usiaho miesiac tamu takija scenaryi zdavalisia chutčej hipatetyčnymi, piša hazieta. Ale siońnia i Bieły dom, i štab-kvatera NATO ŭśviadomili, što Rasija moža źviarnucca da samaj mahutnaj zbroi ŭ svaim arsienale, kab vybracca z vajennaha tupika.
U sieradu, 23 sakavika, i Bajden, i hienieralny sakratar NATA Jens Stołtenbierh zajavili ab raście kolkaści prykmiet, jakija pakazvajuć na toje, što Rasija rychtujecca prymianić va Ukrainie chimičnuju zbroju.
Čakajecca, što mahčymyja scenaryi raźvićcia padziej usie lidary krain NATO abmiarkujuć u čaćvier, 24 sakavika, na pazačarhovaj siesii ŭ Brusieli, kudy pryjedzie prezident Džo Bajden.
Sustreča projdzie za začynienymi dźviaryma, biez pamočnikaŭ i mabilnych telefonaŭ, i heta budzie pieršaja sustreča ŭsich kiraŭnikoŭ krain NATO paśla pačatku rasijska-ŭkrainskaj vajny.
