U novaj pramovie Zialenski źviarnuŭsia da Jeŭrasajuza i zapatrabavaŭ nieadkładnaha pryniaćcia Ukrainy ŭ ES pa śpiecyjalnaj pracedury, kab Ukraina «była razam z usimi jeŭrapiejcami» i «była na roŭnych».
«Ja ŭpeŭnieny, heta spraviadliva i my heta zasłužyli», — skazaŭ Zialenski.
«Ukraincy pakazali śvietu, chto jany jość. I Rasija pakazała, jakoj jana stała», — dadaŭ jon.
Pavodle danych prezidenta Ukrainy, za 4 dni paśla ŭvarvańnia rasijskich vojskaŭ zahinuli 16 ukrainskich dziaciej, 45 paranienyja.
Uładzimir Zialenski padziakavaŭ Polščy i ŭsim udzielnikam antyvajennaj kaalicyi za dapamohu i salidarnaść. Jeŭropa zakryła nieba dla ŭsich rasijskich samalotaŭ, biznes admaŭlajecca ad supracoŭnictva z rasijskimi kampanijami. «Pahladzim, čym skončycca hety tydzień dla rasijskaj valuty», — skazaŭ Zialenski.
«Rasijskaja dziaržava niasie takija straty, nibyta vajna prajšła i praź jaje terytoryju», — padkreśliŭ jon.
I źviarnuŭsia da rasijan.
Zialenski spytaŭ, dla čaho heta ŭsio im — rasijskim maci, rasijskim nastaŭnikam, pradprymalnikam, prosta zvyčajnym ludziam? «Dla čaho? Užo 4,5 tysiačy rasijskich sałdat zabita. Dziela čaho? Navošta vy ŭsie siudy pryjšli?»
«Kidajcie techniku i sychodźcie. Ratujcie svaje žyćci», — źviarnuŭsia Zialenski da rasijskich sałdat.
Taksama jon paviedamiŭ, što było pryniataje niaprostaje, ale karysnaje rašeńnie va movach vajennaha stanu: udzielniki vajennych apieracyj z realnym bajavym dośviedam buduć vyzvalenyja z-pad varty. Pavodle Zialenskaha, jany zmohuć kampiensavać svaju pravinu ŭ samych haračych kropkach vajny, bo klučavoje ciapier — abarona.
«Kali ja išoŭ u prezidenty, ja kazaŭ, što kožny z nas — prezident. Bo my ŭsie adkazvajem za našu dziaržavu. Za našu cudoŭnuju Ukrainu. A ciapier tak skłałasia, što kožny z nas — voin. Voin na svaim miescy. I ja ŭpeŭnieny, što kožny z nas pieramoža. Słava Ukrainie!» — skončyŭ jon pramovu.
