Fota: delfi.lt
«Pa-pieršaje, naŭrad ci chto-niebudź z analitykaŭ zdoleŭ užo całkam pračytać dakład, — kaža dyrektar mižnarodnaj kansałtynhavaj kampanii Friendly Avia Support Alaksandr Łaniecki. — Zvyčajna heta dakumient, jaki składajecca ź niekalkich socień listoŭ, da taho ž, na anhlijskaj movie. Tamu pakul my možam apieravać tolki ŭskosnymi danymi.
Tym nie mienš, zychodziačy z najaŭnaha abjomu infarmacyi, možna kazać ab tym, što vysnovy kamisii buduć albo na karyść Biełarusi, albo niejtralnymi.
Rastłumaču čamu. Biełaruskija ŭłady ŭ incydencie z samalotam Ryanair pastaralisia vykanać usie nieabchodnyja ŭ takich vypadkach farmalnaści. Tyja pretenzii, jakija pakul prahučali ŭ publičnym poli ad śpiecyjalistaŭ, znajomych sa spravazdačaj, tyčacca niejkich druharadnych detalaŭ: niepryncypovych parušeńniaŭ standartnych pracedur.
Heta nie značyć, što ŭ dakładzie nie budzie bolš surjoznych faktaŭ, adnak my bačym toje, što bačym. Znoŭ ža, biełaruski bok i jaho łabisty buduć akcentavać uvahu na tych detalach spravy, jakija im vyhadnyja. I voś hety farmalny bok ź vialikaj dolaj vierahodnaści moža pieravažyć sutnaść prablemy.
Fota: delfi.lt
Tym nie mienš, dla Biełarusi heta moža aznačać tolki zachavańnie najaŭnaha stanovišča. Bo nie treba zabyvać, što incydent z Ryanair byŭ tolki adnoj z pryčyn pryniaćcia sankcyj, chaj i klučavoj.
Kryzis ź mihrantami, padziei leta i vosieni 2020 hoda — pakul nie budzie znojdzienaje pryncypovaje vyrašeńnie hetych prablem, asnoŭnyja sankcyi naŭrad ci buduć źniatyja.
U vypadku stanoŭčaha dla biełaruskich uładaŭ vyrašeńnia pytańnia, nie vyklučaju, što asobnyja sankcyi buduć asłablenyja: skažam, budzie adkrytaje nieba nad Biełaruśsiu dla asobnych pieravozčykaŭ abo biełaruskim hruzavym pieravozčykam dazvolać lotać praz terytoryju Jeŭrasajuza.
Adnak heta naŭrad ci zakranie tuju ž «Biełavija», bo jana znachodzicca pad sankcyjami, što majuć u svajoj asnovie inšyja matyvy, čym incydent z Ryanair».
Fota: onliner.by
«Kali ISAO prymie rašeńnie, jakoje mocna paharšaje stanovišča Biełarusi, Rasija maje mahčymaści dla jaho błakavańnia»
Miž tym, 31 studzienia ISAO paabiacała pravieści sustreču, na jakoj buduć vyznačanyja dalejšyja dziejańni ŭ dačynieńni da Biełarusi. A taksama Saviet arhanizacyi abiacaje razhledzieć skarhi Biełarusi na nieabhruntavanaść sankcyj, jakija byli pryniatyja paśla incydentu. Jakim čynam prymajucca takija rašeńni?
Pa słovach Łanieckaha, ciapier praca pravodzicca ŭ videafarmacie. Jak praviła, pradstaŭniki atrymlivajuć instrukcyi ad svaich krain pa tym, jak dziejničać, jak hałasavać, na jakija možna iści sastupki, a na jakija nie varta.
«Jak i ŭ luboj inšaj padobnaj struktury, tam jość svaje abjadnańni: adny siabrujuć ź inšymi abo naadvarot — supierničajuć, — adznačaje ekśpiert. — Adpaviedna, prymajuć rašeńni, zychodziačy z ahulnych intaresaŭ, kirujučysia nie tolki zdarovym sensam, ale i palityčnaj kanjunkturaj u hety momant».
Dadatkova my źviazalisia i z rasijskim ekśpiertam, jaki pahadziŭsia prakamientavać situacyju na ŭmovach ananimnaści.
«Usie krainy-ŭdzielnicy ISAO majuć prava adnaho hołasu. U ZŠA adzin hołas, i ŭ mikrakrainy z kapieječnym biudžetam taksama adzin hołas, — adznačyŭ naš surazmoŭca. — Urady šmatlikich krain, miakka kažučy, niedalublivajuć tyja ž Złučanyja Štaty Amieryki i hatovyja hałasavać suprać prosta tamu, što Štaty hałasujuć za.
Plus da taho, bahatyja krainy, skažam tak, majuć mahčymaść upłyvu na pryniaćcie rašeńniaŭ krainami niebahatymi, tym bolš, kali za hetuju praceduru adkazvaje kankretny čynoŭnik ci čynoŭniki. Pra heta nie pryniata kazać, ale padobnyja tendencyi majuć miesca. Asabliva heta tyčycca dziaržaŭ, u jakich mocnaja cenzura i presa vielmi abmiežavanaja ŭ mahčymaściach kantrolu za pracaj dziaržaŭnych orhanaŭ.
Budziem kazać naŭprost, kali ISAO prymie rašeńnie, jakoje mocna paharšaje stanovišča Biełarusi, to Rasija maje ŭsie mahčymaści dla błakavańnia hetaha rašeńnia.
Isnuje taksama praktyka, kali kraina prosta nie hałasuje, až da taho, što pradstaŭnik fizična nie źjaŭlajecca na pasiadžeńnie. Heta aznačaje, što farmalna «suprać» nie hałasavali, ale i «za» taksama, bo nie prysutničali. Kab padobnaha nie adbyvałasia, nieabchodna pryciahvať pilnuju ŭvahu presy i lidaraŭ mierkavańniaŭ navat da samoha praviadzieńnia pracedury hałasavańnia».
***
Miž tym kiraŭnik MZS Litvy Habryelus Łandśbierhis užo prakamientavaŭ dakład ISAO.
«Ja mimachodź byŭ aznajomleny sa spravazdačaj, — adznačyŭ jon. — Maja pieršaja acenka takaja, što ŭ spravazdačy prysutničajuć jaŭnyja i hrubyja parušeńni. Razumieju, što nie chapaje tych, chto chavaŭsia za hetymi parušeńniami, chto heta zrabiŭ.
Nie mahu kamientavać u poŭnym abjomie, tamu što nie bačyŭ samoha tekstu, (…) ale, kali hetaja acenka spraviadlivaja, zrazumieła, kali paznačanyja niezakonnyja dziejańni, to ź niezakonnych dziejańniaŭ pavinny ŭźnikać i nastupstvy».
Čytajcie taksama:
Stali viadomyja padrabiaznaści spravazdačy ICAO ab pasadcy samalota Ryanair u Minsku
Raman Pratasievič źjaviŭsia paśla niekalkich miesiacaŭ adsutnaści ŭ infarmacyjnym poli i anansavaŭ pieramieny ŭ svaim žyćci
