«Mašynu ź siurpryzam žychar Hrodna Andrej kupiŭ paru dzion tamu, ale ŭžo sutki da jaje nie padychodzić — paviedamlaje sajt «Viečiernij Hrodno». — Sprava ŭ tym, što ŭ aŭtamabili pasialiłasia łaska. Jak ni sprabavaŭ mužčyna adtul jaje prahnać, ničoha nie atrymlivajecca: žyvioła tolki chavajecca».
Pieršy raz Andrej ubačyŭ jaje ŭ hetyja vychodnyja, kali jechaŭ u Vaŭkavyski rajon, — źviarok vypaŭz padčas ruchu aŭto z-pad paneli pa piedalach.
«Całkam adkryvaŭ mašynu, dumaŭ, uciače — nie dapamahło. Źviazaŭsia sa starym uładalnikam, skinuŭ jamu fota, toj skazaŭ, što taksama bačyć žyviolinu ŭpieršyniu! Znajomyja kažuć, što lepš jaje nie čapać — kusajecca. Moža, u jaje tam hniazdo abo nara?» — zadajecca pytańniem mužčyna.
Śpiecyjalisty z Hrodzienskaj haradskoj i rajonnaj inśpiekcyi pryrodnych resursaŭ i achovy navakolnaha asiarodździa rajać:
«Samy prosty sposab — pakinuć dźviery ŭ mašynie adčynienymi: kali žyvioła zdarovaja, to jana vyjdzie sama. Druhi varyjant — vyhnać źviarka pacham harełaha: dla ich heta tryvožny sihnał. Kali ž łaska nie sydzie sama, to tady treba źviartacca ŭ MNS».
Taksama ŭ viedamstvie adznačyli, što łaski, jak i tchary, zajcy ci kunicy, sustrakajucca ŭ haradach, choć i redka. Mahčyma, źviarok u mašynie Andreja — samka, jakaja šukała sabie prytułak, kab vynasić patomstva. Zvyčajna hety pieryjad prypadaje na sakavik, ale z-za vysokich tempieratur moh i zrušycca na bolš rańni čas.
