17 śniežnia ŭ Nacyjanalnaj akademii navuk Biełarusi adbylisia vybary jaje pravadziejnych členaŭ (akademikaŭ) i členaŭ-karespandentaŭ. Usiaho było abrana 19 pieršych i 16 druhich. Siarod novych akademikaŭ, jak adznačajecca na sajcie NANB, «aŭtarytetnyja vučonyja, lidary navukovych kirunkaŭ». Apublikavany poŭny ich śpis, u im navukoŭcy pa samych roznych dyscyplinach.
Šyrokaj hramadskaści ź ich najbolš viadomy, badaj, akademik-sakratar Adździaleńnia humanitarnych navuk i mastactvaŭ, były šmathadovy dyrektar Instytuta historyi Alaksandr Kavalenia. Viadomaść jaho, praŭda, dastatkova śpiecyfičnaja: nie jak navukoŭca, a jak čałavieka, jaki bolš za paŭtara dziesiacihodździa z roznych vysokich pasad rupliva pravodzić dziaržaŭnuju palityku ŭ histaryčnaj śfiery.
Minuły raz pravaliŭsia
Kavalenia nie raz adznačaŭsia adyjoznymi publičnymi vykazvańniami i niasie niepasrednuju adkaznaść za vyčyščeńnie ź Instytuta historyi supracoŭnikaŭ z krytyčnymi adnosna aficyjnaj ideałohii pohladami.
Heta była nie pieršaja jaho sproba ŭźniacca na najvyšejšuju ŭ aficyjnaj navucy viaršyniu. Na vybarach 4 hady tamu jon spačatku na hałasavańni pa humanitarnym adździaleńni pieramoh svajho kankurenta, historyka kampartyi Uładzimira Babkova, i vyjšaŭ «u finał», na pasiadžeńnie ahulnaakademičnaha schodu. Niečakanaści na hetaj stadyi zdarajucca redka, ale toj raz akurat byŭ taki vypadak. Kavalenia tady siensacyjna nie nabraŭ patrebnaj kolkaści hałasoŭ i akademikam nie staŭ.
Akademik ź dźviuma knihami
Mahčyma, pieraškodzili tady Kavaleniu słabyja realnyja navukovyja dasiahnieńni. Apošniaja jahonaja samastojna vydadzienaja kniha, jakuju možna było b choć by ŭmoŭna ličyć navukovaj manahrafijaj, vyjšła ŭ 2001 hodzie, pad nazvaj «Biełaruś, 1939-1945 hh.: Vojna i politika». A akramia jaje, jon mieŭ jašče tolki adnu, vydadzienuju ŭ 1999-m (jana ž i doktarskaja dysiertacyja na temu «Prahiermanskija sajuzy moładzi na Biełarusi,1941—1944: Vytoki. Struktura. Dziejnaść»).
Inšyja ž «manahrafii» Kavaleni, jakich, kali vieryć sajtu NANB, naličvajecca 21 — tak zvanyja «kalektyŭnyja», to-bok abahulnialnyja zborniki na roznyja zvyčajna šyrokija temy, dzie Kavaleniu naležyć tolki niejki raździeł (prytym nie fakt, što i jon napisany indyvidualna, a nie ŭ saaŭtarstvie). Faktyčna heta bolš padobna na artykuł, čym na knihu.
Za apošnija čatyry hady navukovaha bahažu ŭ Kavaleni asabliva nie dadałosia. Navat akademičny sajt jakija padavaŭ ličby tady — raŭniusieńka takija i ciapier. Novych samastojnych manahrafij nie źjaviłasia dakładna. Ale kanjunktura hetym razam akazałasia bolš spryjalnaja.