Drahičyn: da 800 rubloŭ. Ci jechać u Minsk
U Drahičynskim rajonie sušukalnikam prapanujuć 127 pracoŭnych miescaŭ ad 9 arhanizacyj. Na samaj spravie, u śpisie vakansij i praca ŭ Minskaj vobłaści.
Najbolšaja zarpłata prapanujecca aharodniku (1200 rubloŭ) i apierataru mašynnaha dajeńnia (1000) rubloŭ. Voś tolki pracavać pryjdziecca nie ŭ Drahičynie, a ŭ Minskim rajonie, u vioscy Vialiki Traścianiec na «Minskaj fabrycy harodniny».
Taksama čamuści siarod drahičyncaŭ šukajuć elektrazvarščyka na žodzinski «BIEŁAZ» (1000 rubloŭ) i vieterynara-hiniekołaha na tuju ž «Minskuju fabryku harodniny» (900 ruloŭ).
U samim Drahičynie vakansii z najbolšym zarobkam nastupnyja: inžynier-enierhietyk (811 rubloŭ), mular (800 rubloŭ), pradaviec miascovaha rajpo (800 rubloŭ) i fielčar (702 rubli).
Najbolš patrabujecca kiroŭcaŭ u miascovy aŭtapark (ažno 10 vakansij, zarobak — 650 rubloŭ) i ŭračoŭ-śpiecyjalistaŭ (7 vakansij, zarpłatu abiacajuć u 700 rubloŭ).
Admietna, što samyja nizkija zarobki ŭ Drahičynie i rajonie prapanujucca miedykam. Miedsiaścior i farmaceŭta šukajuć na zarobak u 250 rubloŭ, abiedźvie vakansii — praca na pałovu staŭki.
Słuččyna: nul vakansij
U Słuckim rajonie prapanujuć pracavać na toj ža «Minskaj fabrycy harodniny», tymi ž aharodnikami ci apieratarami mašynnaha dajeńnia (tyja ž 1200 i 1000 rubloŭ zarobku).
Taksama šukajuć administratara ŭ Minsk (1000 rubloŭ), zvarščykaŭ i tokaraŭ (1000 i 800 rubloŭ zarpłaty adpaviedna )na žodzinski BIEŁAZ. Prapanoŭ pracy ŭ samim Słuckim rajonie — nul.
Hłyboččyna: buchhałtaru płaciać jak dvorniku
U Hłybockim rajonie bolš za ŭsio abiacajuć inžynieru pa lesanarychtoŭkach i pierapracoŭcy — 1300 rubloŭ. Hałoŭny zaatechnik moža raźličvać na 1200 rubloŭ, hałoŭny ahranom ci vieterynarny ŭrač — na 1000.
Hłybocki psichanieŭrałahičny dom-internat dla sastarełych i invalidaŭ šukaje miedykaŭ, zarpłata 950 rubloŭ.
Kiroŭcy ci traktarysty ad 420 da 900 rubloŭ, laśnik — 800 rubloŭ.
Samy mały zarobak buduć płacić apierataru mašynnaha dajeńnia na viaskoym ahrapradpryjemstvie — ŭsiaho tolki 400 rubloŭ. Zatoje dastatkova tolki bazavaj adukacyi.
Cikava, što na tym ža pradpryjemstvie buchhałtaru prapanujuć zarpłatu ŭ 450 rubloŭ — dla paraŭnańnia, inšyja arhanizacyi prapanujuć stolki ž prybiralščyku ci trochi mienš (430 rubloŭ) dvorniku.
Navapołack: najbujniejšy zarobak na «Naftanie». I samy maleńki tam ža
Taksama elektronny kirmaš vakansii prajšoŭ i dla moładzi Navapołacka. Tut 111 prapanoŭ ad 7 arhanizacyj.
Patrebny inžynier-prahramist na «Naftan» — zarobak abiacajuć u 1510 rubloŭ 65 kapiejek.
Načalniku kaštarysna-damoŭnaha adździeła ŭ budaŭnictvie buduć płacić roŭna 1500 rubloŭ.
Patrabujecca stamatołah na «Naftan», zarpłata — 1210 rubloŭ (abiacajuć žyllo i sacpakiet). Tudy ž patrabujucca urač UHD i ŭrołah (abiedźvie vakansii na čverć staŭki, 297 rubloŭ zarobku)
Prarab u miascovym treście moža raźličvać na 1000 rubloŭ, mašynist krana — na 900, mašynist svajebojnych ustanovak — ažno na 1100 rubloŭ zarpłaty.
Samaja maleńkaja zarpłata niečakana prapanujecca znoŭ ža na «Naftanie»: patrebny renthienłabarant na 0,4 staŭki, zarobak — 186 rubloŭ. Mała, ale pradastaŭlajuć žyllo.
Invalidy Viciebščyny: u sielskuju haspadarku
Apublikavanyja vakansii taksama dla asob ź invalidnaściu Viciebskaj vobłaści. Apieratar mašynnaha dajeńnia moža raźličvać na 800 rubloŭ, kiroŭca pahruzčyka i traktarysty na 700, žyviołavod, ślesar ci kiroŭca — na 600 rubloŭ zarpłaty. Palavodu zapłaciać tolki 450 rubloŭ za miesiac pracy.
Pry hetym, usie vakansii pradastaŭlenyja tolki adnym sielhaspradpryjemstvam «Olhaŭskaje»— kali miascovy invalid nie choča pracavać na viaskovym ahrapradpryjemstvie, dziaržavie prapanavać jamu niama čaho.
Hałoŭnaja vysnova: vakansij nie tak i šmat. Absalutnaja bolšaść — heta praca na vytvorčych pradpryjemstvach ci ŭ ahrarnym siektary, vakansij z ofisnaj pracaj — adzinki. Taksama kidajecca ŭ vočy, što niamała patrabujecca miedykaŭ.
Vakansij z zarpłataj u zapavietnyja 500 dalaraŭ u biełaruskich rehijonach taksama litaralna niekalki prapanoŭ.
