«Nie, nie byŭ upeŭnieny ŭ kalehu Uładzimir Pucin»
Vynikovy dakumient, jaki padpisali Łukašenka i Pucin, śpiecyjalny karespandent «Kommiersanta» Andrej Kaleśnikaŭ ličyć pramiežkavym.
Žurnalist miarkuje, što horad Sievastopal, adkul Pucin prysutničaŭ na anłajn-sustrečy, byŭ abrany nie vypadkova.
Fota: kremlin.ru.
«Alaksandr Łukašenka, jak viadoma, dahetul nie śpiašajecca pryznavać Krym, i z vychavaŭčaha punktu hledžańnia było b pravilna paŭdzielničać u pasiadžeńni Dziaržsavieta mienavita tut», — zaŭvažaje karespandent.
Składvałasia ŭražańnie, što Łukašenka tak i nie źbirajecca ličyć Krym častkaj Rasii, jak i Biełaruś, zaŭvažaje Kaleśnikaŭ.
Łukašenka nazvaŭ Sajuznuju dziaržavu «pryjarytetam z pryjarytetaŭ».
«I tak voś užo 23 hady», — iranizuje vydańnie.
«Tym časam Uładzimir Pucin, pakul biełaruski prezident rychtavaŭsia padpisać vynikova-pramiežkavy dakumient, dziŭnym čynam, nie adkazvaŭ jamu ničoha i naohuł źniešnie nijak nie reahavaŭ. A nasamreč byŭ vielmi napružany. Takoje ŭražańnie, što jon da apošniaha čakaŭ čahości ad spadara Łukašenki. Toj moh ža niešta vytvaryć. Nie, nie byŭ upeŭnieny ŭ kalehu Uładzimir Pucin», — piša Kaleśnikaŭ.
«U im z novaj siłaj pračnuŭsia akcior škłoŭskaha teatra, i hołas jaho pakryŭdžana zadryžaŭ», — tak apisaŭ rasijski žurnalist momant, kali Łukašenka paskardziŭsia Pucinu na toje, što jaho nie ŭziali ŭ Krym.
«U Rasii, na žal, tut niama vybaru, tamu što ŭ nas nie tak šmat sajuźnikaŭ»
Člen Rady pry prezidencie Rasii pa mižnacyjanalnych adnosinach, namieśnik dyrektara Centra ŭkrainistyki i biełarusistyki MDU Bahdan Biazpalka ŭ efiry NSN vykazaŭ zdahadku — dasiahnutyja damoŭlenaści sapraŭdy mohuć być «histaryčnymi».
«Kali tam sapraŭdy zakładzieny šerah intehracyjnych prahram z mahčymym nastupnym palityčnym naroščvańniem intehracyi, heta budzie histaryčnaja padzieja, tamu što my vielmi doŭha ruchalisia, taptalisia ŭ pačatku «darožnych kart», ciapier sajuznych prahram. Z 2019 hoda my nie možam uzhadnić navat pytańnie roŭminhu», — rastłumačyŭ namieśnik dyrektara Centra ŭkrainistyki i biełarusistyki MDU.
Taksama, na jahonuju dumku, Łukašenka pajšoŭ na padpisańnie dakumientaŭ ab Sajuznaj dziaržavie z kiraŭnikom Rasii, kab atrymać padtrymku na fonie cisku na Minsk Zachadu.
Pry hetym palitołah Hleb Paŭłoŭski raskrytykavaŭ abjadnańnie Rasii ź Biełaruśsiu, ličačy, što Łukašenka źjaŭlajecca vielmi słabym palityčnym lidaram, jaki «skampramientuje luboje bujnoje dziaržaŭnaje rašeńnie, jakoje budzie prymać».
«U Rasii, na žal, tut niama vybaru, tamu što ŭ nas nie tak šmat sajuźnikaŭ, a Pucin nie moža dazvolić sabie stracić Biełaruś, heta budzie vielmi drenna ŭspryniata, u pieršuju čarhu, jaho vybarščykami. Heta i stvaraje dla Łukašenki mahčymaść šantažavać Rasiju finansava i palityčna», — zajaviŭ palitołah.
«Łukašenka pryznaje Rasiju va ŭsich miežach, kudy ŭvachodzić i Krym»
Rasijski palitołah Marat Bašyraŭ źviazvaje vykazvańnie Łukašenki pra Krym z padpisańniem Dekreta Sajuznaj dziaržavy pa intehracyi. Takoje mierkavańnie jon vykazaŭ u hutarcy z «Iźviestijami».
«Heta naŭprost źviazana z tym, što siońnia byli padpisanyja intehracyjnyja karty. Pa-mojmu, až 28 dakumientaŭ byli padpisanyja prezidentam Pucinym i Łukašenkam. Adpaviedna, kali spadar Łukašenka pryznaje Rasijskuju Fiederacyju ŭ jakaści ŭdzielnika Sajuznaj dziaržavy, to jon pryznaje jaho va ŭsich miežach rasijskaj dziaržavy, kudy ŭvachodzić i Krym. Voś i ŭsia łohika», — adznačyŭ ekśpiert.
Fota: kremlin.ru.
«Jon pryznaje, što padpisvaje intehracyjnyja dakumienty ź dziaržavaj, jakaja apisana ŭ Kanstytucyi RF, a tam jość i Respublika Krym», — dadaŭ jon.
Palitołah padkreśliŭ, što padpisanyja dakumienty ŭ pieršuju čarhu važnyja dla Maskvy, ale i Minsk «atrymlivaje dadatkovyja harantyi z punktu hledžańnia biaśpieki».
«Kreml zališnie dobry»
Palitołah i publicyst Kirył Aviarjanaŭ-Minski ŭ hutarcy z «360» vykazaŭ zdahadku, da jakich vynikaŭ pryviaduć hetyja pieramovy.
«Łukašenka — toj čałaviek, jaki nie zaŭsiody vykonvaje ŭskładzienyja na jaho abaviazacielstvy. U 2004 hodzie pavinna była być adzinaja valuta, jaje niama», — adznačyŭ ekśpiert i dadaŭ, što siońniašnija dakumienty mohuć być hetak ža praihnaravanyja.
Aviarjanaŭ-Minski miarkuje, što dasiahnuć vykanańnia damoŭlenaściaŭ ad Biełarusi možna tolki adnym sposabam: kali Kreml voźmie heta pad žorstki kantrol. Ale ekśpiert nie ŭpeŭnieny, što Maskva hatovaja razmaŭlać ź Minskam u rezkaj formie.
«Ci zdolny Kreml tak žorstka razmaŭlać z kiraŭnictvam Biełarusi — heta vialikaje pytańnie. Usia papiaredniaja historyja adnosin pamiž kiraŭnictvam Rasii i Biełarusi pakazała, što Kreml zališnie dobry ŭ adnosinach da biełaruskich kaleh. I nievykanańnie imi svaich abaviazańniaŭ zastajecca biez naležnaha adkazu z boku Rasii», — skazaŭ palitołah.
«Łukašenka ŭžo faktyčna naviedaŭ paŭvostraŭ»
Tak zvany «staršynia» tak zvanaha «parłamienta Kryma» Uładzimir Kanstancinaŭ zajaviŭ, što Łukašenka «faktyčna naviedaŭ» akupavany Rasijaj paŭvostraŭ padčas razmovy z Pucinym.
«Alaksandr Ryhoravič užo faktyčna naviedaŭ Krym, kali ŭziaŭ udzieł u razmovie z našym prezidentam, jaki znachodzicca ŭ Sievastopali. Spadziajomsia, što ŭśled za virtualnym naviedvańniem budzie i realnaje», — skazaŭ Kanstancinaŭ.
Pa jaho słovach, na krymskim paŭvostravie «zaŭsiody hatovyja prymać siabroŭ».
Palityk taksama zajaviŭ, što ŭ Krymie zacikaŭlenyja ŭ vizicie biełaruskaha palityka i adznačyŭ, što krymčanie ź biełarusami źjaŭlajucca siabrami.
«Demanstracyja hnutkaści źniešniaj palityki Maskvy»
Pry ŭsioj miakkaści farmulovak i pry vyklučeńni z płana intehracyi pytańniaŭ vajenna-techničnaha supracoŭnictva, a taksama (pa patrabavańni Łukašenki) ab pierachodzie da adzinych padatkaŭ i adzinaj valuty Sajuznaj dziaržavy — da 2024 hoda — havorka idzie ab stvareńni ahulnaha rynku dźviuch krain u śfiery vytvorčaści i spažyvańnia faktyčna ŭsiaho śpiektru tavaraŭ i pasłuh, adznačaje «Fiedieralnoje ahientstvo novostiej».
Realizacyja ŭsiaho śpiektru prahram nie tolki spryjaje dalejšamu zbližeńniu dźviuch krain, ale i demanstruje hnutkaść źniešniaj palityki Maskvy, śćviardžaje aŭtar. A heta važny sihnał Maskvy i byłym sajuznym respublikam.
«Alaksandr Łukašenka pierajšoŭ da niedapryznańnia Kryma»
Zajava Łukašenki pra žadańnie naviedać Krym nie zastałasia niezaŭvažanaj ni ŭ rasijskaj, ni ŭ biełaruskaj stalicy. Apytanyja «Kommiersantom» ekśpierty ŭpeŭnienyja: «Łukašenka sprabuje pradać Maskvie svoj upadabany tavar — sajuźnickuju rytoryku». Pry hetym prahučała zajava stavić niaprostyja zadačy nie tolki pierad Łukašenkam, ale i pierad jaho supiernikami. Palityku pryjdziecca dumać nad tym, jak kančatkova nie zahubić adnosiny — u pieršuju čarhu, ekanamičnyja — z Ukrainaj.
Zajava Alaksandra Łukašenki taksama pastaviła ŭ tupik biełaruskich apazicyjanieraŭ na čale sa Śviatłanaj Cichanoŭskaj, jakaja supraćstajała Łukašenku na vybarach 2020 hoda. Kamientujučy pa prośbie «Kommiersanta» ideju biełaruskaha palityka pajechać u Krym, jany rabili ŭpor na tym, što Alaksandr Łukašenka nielehitymny prezident, a vykazvać jakuju-niebudź pazicyju ab prynaležnaści paŭvostrava admaŭlalisia.
«Pustaja dekłaracyja i trolinh»
Miarkujučy pa vielmi niadbajnym i vielmi dziŭnym dla Rasii afarmleńni hetaha «dekreta», heta nie bolš čym čarhovaja pustaja dekłaracyja, jakich u historyi z sajuznaj dziaržavaj było ŭžo niamała, miarkuje palitołah Maksim Žaraŭ.
«Da realnaj intehracyi dźviuch krain pa-raniejšamu jašče vielmi daloka. Miarkujučy pa mnohich replikach Łukašenki, bolš padobnych na trolinh (naprykład, pra Krym), biełaruski lidar svajoj pazicyi nie źmianiŭ i źbirajecca i dalej marudzić intehracyjnyja pracesy. Zrazumieć stan intehracyjnych spraŭ možna budzie tolki ŭ lutym 2022 hoda, kali ŭ Biełarusi pavinien adbycca kanstytucyjny refierendum. Pakul što ja mocna sumniavajusia, što hety referendum u realnaści adbudziecca ŭ tym vyhladzie, u jakim jaho abiacaje Kramlu Łukašenka».
«Minsk bolš nie baicca «pakryŭdzić» ni Kijeŭ, ni ES»
Intehracyja nie nastolki hłybokaja, jak zdajecca: pryniatyja ahulnyja pałažeńni, ale djabał chavajecca ŭ detalach, ličyć aŭtar vydańnia «Politika siehodnia».
Na ŭzhadnieńnie akaličnaściaŭ mohuć minuć hady — asabliva heta tyčycca śfier nakštałt padatkaŭ i mytni, jakija vielmi adroźnivajucca ŭ Rasii i Biełarusi i dzie treba damahčysia unifikacyi.
Dasiahnutyja damoŭlenaści paŭpłyvajuć na stan spraŭ unutry dźviuch krain. Miarkujecca intehracyja valutnych sistem, ahulnyja padatkovyja pryncypy, adzinyja padychody pa piensijnaj temie i inšym sacyjalnym zabieśpiačeńni, sumiesnaja baraćba z teraryzmam, uzajemny dostup da dziaržzakupak i dziaržzamovaŭ. I navat bolš — ahulnaja makraekanamičnaja palityka, abjadnańnie płaciežnych sistem, sumiesnyja rynki nafty i hazu…
Choć suvierenitet RB i RF zachavany, jak i aŭtanomnaść u rašeńniach pryhraničnych kanfliktaŭ, u vypadku čaho adkazvać na lubuju ahresiju pryjdziecca razam.
Minsk bolš nie baicca «pakryŭdzić» ni Kijeŭ, ni ES.
«Čas, kali brackija krainy hladzieli na zachad, prajšoŭ. Ciapier jany hladziać adzin na adnaho», — adznačaje aŭtar.
