«Ale dzie heta budzie? U tych ža balnicach, dzie vy zaraziciesia «karonaj»?
«Ja nie ździŭleny. Bo my ž «nienachilajemyja», što treba pierakładać jak «tyja, chto nie vučycca». Nam niavažna rečaisnaść, niavažna, što adbyvajecca, — sarkastyčna kamientuje adzin z surazmoŭcaŭ, siońnia ŭžo były rabotnik adnoj ź biełaruskich balnic. — Bo ŭ nas jość svaja pazicyja, pryniataja 1,5 hoda tamu, na jaje my i ciśniem. Nie treba masak, nie treba ničoha — samo projdzie.
Što tyčycca viartańnia da taho, što rabiłasia padčas pieršaj chvali, to tut taki momant — my baimsia kałapsu sistemy achovy zdaroŭja.
A jakija kryteryi kałapsu? Kali daktaram treba admysłova šukać kisłarod, šukać volnyja łožki — to jon nastupiŭ.
Možna kazać, što nie budzie akazvacca płanavaja dapamoha. Heta žudasna z punktu hledžańnia pijaru, tamu ŭsio adkacili nazad, ciapier užo znoŭ budzie i płanavaja dapamoha, i apieracyi, i ŭsio inšaje.
Ale dzie heta budzie? U tych ža balnicach, dzie vy zaraziciesia «karonaj»? Heta składanaja tema, tak, niekatoryja apieracyi patrabujuć abaviazkovaha ŭmiašańnia ŭ peŭnyja terminy. Ale ž kali vy možacie pieračakać — pieračakajcie.
Bo pryjazdžajuć pacyjenty roznyja, niekatoryja — užo z «čymści». Toje ž tyčycca i dziaciej. Siońnia dzieci chvarejuć zusim nie tak jak hod tamu, chvarejuć bolš, adpaviedna raznosiać chvarobu.
A voś što tyčycca štrafaŭ za maski, to heta moža była nie najlepšaja ideja. Bo kali ja ŭjaŭlaju, što našym siłavikam daduć dadatkovyja pravy i tut, to ja suprać. Hetym ludziam nielha dazvalać jašče bolš.
Dy i sprava nie ŭ štrafach. Ahitacyju i padrychtoŭku da čarhovaj chvali znoŭ pravalili. I ciapier rabić rezkija ruchi ŭžo pozna. Usio strašnaje ŭžo zdaryłasia.
Kali hałoŭnym pa lačeńniu kavidu stanovicca čałaviek, jaki nie maje nijakaj śpiecyjalnaj padrychtoŭki, to pačynajucca hetyja zajavy.
Prablema nie ŭ tym, kolki ŭ nas aparataŭ ŠVŁ — jany nie lečać ludziej. Hałoŭnaja zadača — nie dapuścić, kab u balnicy pačaŭ pastupać vialiki patok chvorych adnačasova.
A ŭ rajonach jašče i arhanizacyjnaje pytańnie. Tam reanimacyi maleńkija, časam uvohule na šeść kojek. Biarom dva nasielenych punkta, u adnym uspyška, u druhim — niama.
Tady treba adnu balnicu addavać całkam pad karonu, a druhuju — pad inšych pacyjentaŭ. Kab minimizavać kantakty i pacyjentaŭ, i piersanału. I banalna jak zručniej — vazić kisłarod u dźvie balnicy albo ŭ adnu? Kali hetyja rašeńni byli pryniatyja raniej — tady dobra. Kali nie — to ciapier pozna ŭžo.
Što tyčycca biełaruskaj vakcyny, to heta mnie nahadvaje Rahozina i jaho płany marsijanskich bazaŭ. Heta ŭvohule nie varta abmiarkoŭvać. Bo kali pravalenaja baza — nie treba budavać pražekty.
Tamu skažu prosta: ludziam treba samim bierahčy siabie».
«Nakont biełaruskaj vakcyny — pakul niama vakcyny, niama pra što i kazać»
Druhi miedyk praciahvaje siońnia pracavać u miedustanovie. Jon kaža:
«Nakont viartańnia płanavaj dapamohi — nieadnaznačny momant. Z adnaho boku płanavaja dapamoha — heta nie tolki prafahlady ci štości nie asabliva važnaje. Heta i dapamoha ankapacyjentam (dzie krytyčnuju rolu adyhryvaje svoječasovaść akazańnia) i lekavańnie chronikaŭ, bieź jakoha jany chutka pačynajuć patrabavać ekstranaj dapamohi.
Z druhoha boku, zaraz jano, mahčyma, i patrebna — kinuć usie mahčymyja siły na baraćbu z kavidam. Adkazać, što pravilna, moža tolki toj, chto maje sapraŭdnyja ličby statystyki i moža skazać, jaki krok moža zachavać bolš žyćciaŭ.
Nakont biełaruskaj vakcyny. Pakul niama vakcyny, niama pra što i kazać. Jak budzie vakcyna, jak buduć apublikavany daśledavańni, tady i možna budzie štości abmiarkoŭvać. Zaraz, padajecca, na niešmatlikich achvotnych pryščapicca chapaje rasijskaj i kitajskaj vakcynaŭ. A što budzie ŭ 2023, chto viedaje?
Pra viartańnie da pavodzinaŭ padčas pieršaj chvali. Dziejańni ŭ pieršuju chvalu byli napałovu chaatyčnyja i častkova biessensoŭnyja, bo nichto ničoha nie viedaŭ. Toje, što rabiŭ Pinievič da hetaj razmovy, było bolš asensavana, bo zasnavana ŭsio ž na vopycie.
Uvohule, kantralujemaj siońniašniuju situacyju dakładna nie nazavieš, usie vielmi drenna. Ale pakul na vulicach trupaŭ niama, padajecca.
Kali reziumavać, to Pinievič chacia b namahaŭsia štości zrabić ź situacyjaj i rabiŭ pravilnyja kroki. Što budzie zaraz — nie viedaju».
«Z samaha pačatku ŭsio zrabili, kab ludzi nie mieli žadańnia vakcynavacca»
Jašče adzin surazmoŭca zusim niadaŭna syšoŭ ź biełaruskaj miedycyny.
«U pieršuju chvalu hety čałaviek nie pryznavaŭ hetaj chvaroby, tamu ciapier časam ciažka zrazumieć, što jon maje na ŭvazie.
Ale što tyčycca masačnaha režymu i štrafaŭ, to heta, napeŭna, strach, što ludzi pačnuć aburacca. Ale ž kali Łukašenka kaža ab pravie kožnaha rasparadžacca svaim losam, to ŭ čas pandemii kožny z nas adkazvaje nie tolki za siabie, ale i za tych, chto pobač. Bo časam my raspaŭsiudžvajem chvarobu, sami taho nie viedajučy.
Masačny režym i tak kiepska pracuje, kali admianić sankcyi za jaho parušeńnie, to my z karanavirusa nikoli nie vyjdziem. Pačnie pracavać niejki naturalny adbor i prosta pamruć usie, chto nie byŭ abaronieny, — kaža miedyk.
— Toje ž tyčycca i vakcynacyi. Adziny dziejsny mietad vyratavacca siońnia — vakcyna. Ale ž z samaha pačatku ŭsio zrabili, kab ludzi nie mieli žadańnia vakcynavacca. Byŭ vialiki deficyt narmalnaj dakładnaj infarmacyi pra vakcyny, ich vidy, efiekty.
A kali ludzi nie majuć infarmacyi — jany bajacca i dakładna nie chočuć vakcynavacca.
Druhi momant — niedasiažnaść vakcyn, jakim ludzi daviarajuć. My ž bačyli vyniki sacyjałahičnych apytańniaŭ, što bolšaja častka chacieła b vakcynavacca tymi ž «Pfajzieram» ci «Madernaj». Dyk zaviazicie ich, zrabicie płatnymi. Ale ž nie.
I siońnia pryjšli da taho, što tolki prymusovaja vakcynacyja moža vyratavać situacyju. Ale prymusovaja — praz tłumačeńni, praz adukacyju abaviazkova ci praz stymulacyju. Kab nie było, jak u niekatorych krainach, dzie ŭ kabinietach doktara vakcynu nie ŭvodziać, a vylivajuć, ale čałavieka zapisvajuć vakcynavanym.
Pakidać situacyju na samich ludziej — niapravilna. U masie svajoj narod nie vielmi kampietentny ŭ pytańniach vakcynacyi.
Raspracoŭka biełaruskaj vakcyny ŭvohule nie vartaja sprava, na maju dumku. Bo nichto nie viedaje, jakija mutacyi virusa buduć u 2023 hodzie. Da taho ž na toj momant, a to i chutčej, užo budzie vielmi šmat vakcyn raspracavana pa ŭsim śviecie. Adpaviedna, košt ich budzie nižejšym, tamu naša vakcyna moža być prosta niekankurentnazdolnaj.
Moža lepš było b hrošy na jaje vydatkavać na zakupku impartnych vakcyn siońnia. Bo «Sputnik» — vakcyna sapraŭdy dobraja, ale palityčnyja padaploki sapsavali joj reputacyju.
Što tyčycca płanavych ahladaŭ i apieracyj, to viarnuć ich — pravilnaje rašeńnie, kali buduć dakładna raździalacca patoki pacyjentaŭ.
Da taho ž chirurhičnaja śpiecyjalnaść patrabuje pastajannaj pracy, kab padtrymlivać manualny navyk. Dla chirurha nie rabić apieracyi miesiac-dva — prablema, paśla navyk składana adnavić.
Tamu, moža i varta było b raźviarnuć kavidnyja łožki — jak u inšych krainach — u tych ža ladovych pałacach, kab bolšaść miedustanoŭ pakinuć u čystaj zonie. Ale siońnia ŭ nas nie chapaje kadraŭ i daktary pierahružanyja, tamu mnie składana ŭjavić, chto b tam pracavaŭ.
Siońnia ja praciahvaju padtrymlivać suviaź z byłymi kalehami-miedykami. I situacyja siońnia horš, čym była kali-niebudź raniej. Bo ŭ moj čas pracy z karonaj nikoli nie było takoha jak zaraz, kali pačynajuć pamirać ciažarnyja žančyny.
Situacyja ciažkaja, niekantralavanaja. I ja viedaju, što pačynajucca prablemy z materyjalnym zabieśpiačeńniem. Bo raniej adnosna ŭsiaho chapała, a siońnia, paviedamlajuć kalehi, pačynajucca ŭžo prablemy z preparatami bijałahičnaj terapii, jakija patrebnyja ludziam u ciažkim stanie».
Čytajcie taksama:
«Daktary skazali, što ja nie adna takaja». Ciažarnaja minčanka zachvareła na kavid — i straciła dzicia
