Čaściej za ŭsio ź ES viazuć haradskija aŭto nie starejšyja za 2017 hod
— Viazuć absalutna roznyja mašyny — ad Opel Corsa z maleńkim matoram, jakuju možna tanna razmytnić, da Mercedes V-kłasa i Volkswagen Touareg z trochlitrovymi matorami. Viadoma, pieravažna popytam karystajucca madeli, jakija na biełaruskim rynku nie pradstaŭleny, — apisvaje stanovišča spraŭ Jaŭhien, partnior TAA «BiełAŭkcyjon-hrup» pa padbory, kupli i dastaŭcy aŭto ź ES. — Toje, što vyrablajecca ŭ Rasii, ź Jeŭropy nichto nie viazie, za vyklučeńniem inšych kamplektacyj, jakich nie byvaje ŭ madelaŭ rasijskaj zborki.
auto.ru
Samy papularny cenavy siehmient — $12-13 tys.: Renault Megane, Ford Focus, Peugeot 308. Heta značyć haradskija aŭtamabili nie starejšyja za 2017 hod, pryhožyja, stylnyja i niedarahija za košt małych abjomaŭ ruchavikoŭ (1,5-1,6 ł), pryčym, jak praviła, dyzielnych (Jeŭra-6).
— Z katehoryi «krychu daražej» — Renault Talisman: vialikaja i pryhožaja mašyna, znoŭ ža z dyzielnym ruchavikom 1,5-1,6 ł. abo krasovier Peugeot 3008 sa śviežaj i cikavaj źniešnaściu. Nu i kłasika — Volkswagen Passat, ale ich šukajuć u dobrych kamplektacyjach: nie nižejšych za Comfortline, abaviazkova LED-optyka, mahčymaja ličbavaja prybornaja panel, — praciahvaje śpiecyjalist.
motor.com
Darečy, navat u mašynach nizkaha canavoha siehmienta pakupniki ŭsio roŭna chočuć LED-optyku, kruiz-kantrol, aŭtamatyčnuju karobku, panaramny dach. Heta značyć usio toje, što ŭ biudžetnikach nie sustrakajecca ŭ pryncypie.
Nu i, viadoma ž, popytam karystajucca miniveny — siamiejnyja aŭtamabili. Tut dapamahaje 140-y ŭkaz ab ilhotnym mycie.
— Ludzi časta kuplajuć ich dla siabie, asabliva kali ŭ ich minimum troje dziaciej. Bolš tannyja — Citroën C4 i Opel Zafira, daražejšyja — Volkswagen Sharan, Renault Espace i Ford S-Max, — dzielicca źviestkami Jaŭhien. — Ale samaja papularnaja madel tut, jak ni dziŭna, BMW Grand Tourer, u jakoj jość siamimiesnaja viersija, a taksama maleńki mator abjomam 1,5 ł.
BMW Grand Tourer. Fota: hardymutschler.de
Ceny vyraśli na 20 pracentaŭ
Takim čynam, samy papularny cenavy siehmient pry kupli mašyny ŭ ES — $12-13 tys. Pry hetym, pa słovach śpiecyjalistaŭ, zusim niadaŭna hetyja aŭto kaštavali $10-11 tys.
— Košty ŭ Jeŭropie vyraśli nie mienš čym na 20%. Jašče viasnoj cana na aŭtamabil kala 7 tysiač jeŭra była realnaj, na hetyja hrošy možna było kupić univiersały Škoda Superb abo Renault Talisman. Viadoma, u prostych kamplektacyjach i ź miechaničnymi karobkami pieradač, ale ŭsio roŭna heta vialikija aŭtamabili kłasa D. Ciapier za takija hrošy nie kupiš navat Renault Megane, jon abydziecca jak minimum na tysiaču jeŭra daražej, — dzielicca danymi Jaŭhien.
Siońnia ź biudžetam da $8-9 tys. maje sens šukać maksimalna žyvy varyjant na našym rynku. Navat z ulikam ilhotnaj razmytnioŭki ničoha dobraha na hetyja hrošy pryhnać ź Jeŭropy nie atrymajecca, kali tolki nie kazać pra zusim maleńkija mašynki nakštałt Volkswagen up!
Volkswagen Up. Foto: automoto.ua
Rost cen śpiecyjalisty źviazvajuć z aktyvizacyjaj va ŭsich śfierach ekanomiki paśla pačatku vakcynacyi i admieny łakdaŭnaŭ. Na biełaruskim rynku heta pakul mocna nie adbiłasia, bo adnosna dalara istotna asłabieŭ jeŭra. Kali viasnoj adzin jeŭra kaštavaŭ da $1,22, to zaraz jon kaštuje $1,17-1,16. Voś hetaja roźnica kursaŭ pakul i nivieluje rost cen, ale jaje chopić nienadoŭha.
Vyras i popyt na aŭtamabili: dobryja mašyny na jeŭrapiejskich aŭkcyjonach pradajucca vielmi chutka.
Treba razumieć, što kali ŭ takoj situacyi cikavić jakaść, to ekanomii pa paraŭnańni z prapanovami na biełaruskim rynku moža nie atrymacca zusim.
«Da čverci mašyn va ŭzroście ad dvuch da siami hadoŭ jość pytańni pa prabiehu»
Isnuje mierkavańnie: čym starejšy aŭtamabil, tym bolš vierahodnaść, što adomietr budzie chłusić. Adnak ekśpierty ŭpeŭnienyja: taki padychod — sproščany.
— U Jeŭropie hałoŭnym faktaram upłyvu na košt aŭtamabila źjaŭlajecca nie hod jaho vypusku, a mienavita prabieh. Mašyna moža być i staroj, ale ź nievialikim prabieham, udałaj kamplektacyjaj i dobrym matoram budzie kaštavać minimalna tańniej u paraŭnańni z takoj ža novaj.
Što tyčycca skrutki prabiehu, to adbyvajecca heta čaściej za ŭsio ŭ dvuch vypadkach.
— Pa-pieršaje, na mašynach starejšych za 7-10 hadoŭ, jakija źmianili ŭžo nie adnaho ŭładalnika, tamu składana znajści kancy — dzielicca nazirańniami Jaŭhien. — Pa-druhoje, na darahich aŭtamabilach, kab istotna padniać košt. Naprykład, u vypadku z Mercedes V-kłasa roźnica ŭ košcie pamiž mašynami z prabieham 400 tysiač i 100 tysiač kiłamietraŭ moža dasiahać 10 tysiač jeŭra.
Pavodle acenki ekśpierta, u Biełarusi pa kožnaj piataj mašynie va ŭzroście ad dvuch da siami hadoŭ jość pytańni da prabiehu. U Rasii — da kožnamu druhoha aŭtamabila. Mienavita tamu ŭ rasijanaŭ davier da biełaruskich kampanij, jakija handlujuć starymi aŭtamabilami z ZŠA i Jeŭropy, vyšejšy, čym da svaich ułasnych.
— Važny momant: kali ŭ ZŠA mašyna pradajecca na aŭkcyjonie pa pryncypie «jak jość na dadzieny momant, i pretenzii nie prymajucca», to ŭ Jeŭropie jana pradajecca z harantyjaj. Aŭtamabil z prabieham maje hadavuju harantyju na schavanyja defiekty — źviartaje ŭvahu Jaŭhien. — Havorka nie idzie, viadoma, ab znosie kałodak, adsutnaści dyvankoŭ i drapinach u bahažniku. Ale kali mašyna zajaŭlena jak biezavaryjnaja i z realnym prabieham, to takoj jana i pavinna być. Aŭtamabil ź vidavočnymi śladami ramontu i niepracujučaj karobkaj pieradač u Biełaruś prosta nie pajedzie, a budzie viernuty pradaŭcu z apłataj im usich vydatkach.
«Kožnaja treciaja mašyna z Hiermanii — ź pierafarbavanym bampieram?»
Vybirajučy aŭto ŭ Jeŭropie, treba nie tolki źviartać uvahu na prabieh, ale i pamiatać ab niuansach ekspłuatacyi ŭ kožnaj kankretnaj krainie.
— Na kožnaj druhoj abo treciaj niamieckaj mašynie piaredni bampier i kapot buduć całkam pasiečanyja drobnym piaskom abo całkam pierafarbavany. Na aŭtabanach abmiežavańniaŭ chutkaści niama, a pry častaj jaździe na vialikija adlehłaści z chutkaściu 160-180 km/h niemahčyma nie nałavić skołaŭ — tłumačyć Jaŭhien. — Na mašynach ź Bielhii i Niderłandaŭ stan łakafarbavaha pakryćcia lepšy — tam abmiežavańnie na mahistralach 120-130 km/h, dy i sami krainy mienšyja.
Zrešty, u Niderłandach, a taksama ŭ Danii jość inšaja prablema: heta prymorski rehijon, tak što na mašynach uzrostam 5-7 hadoŭ sustrakajecca irža. Na aŭtamabilach z Francyi i Italii, dla jakich najbolš charakternaja kantaktnaja parkoŭka, časta paškodžanyja bampiery, arki i parohi. Choć heta ŭžo bolš zaležyć ad kankretnaha čałavieka, a nie ad krainy. Usiudy jość akuratnyja ŭładalniki, staŭleńnie da mašyn taksama va ŭsich roznaje.
Kolki kaštuje pryhnać aŭto ź Jeŭropy
Varyjant pieršy: praz aŭkcyjon
Pamiery zboru zaležać ad typu aŭkcyjonu, krainy praviadzieńnia, a časam i ad koštu łota. U siarednim jany składajuć 200-600 Jeŭra, kali kazać ab aŭkcyjonach ź fiksavanaj sumaj zboru i aŭtamabili koštam 7-15 tys. jeŭra. Adnak na aŭkcyjonach, na jakich suma zboru zaležyć ad koštu aŭtamabila, zbory na darahuju madel mohuć skłaści i 1000-1200 jeŭra.
Varyjant druhi: u aŭtachausie
Tut budzie kamisija za kuplu nieta. Bo biełarusy, kuplajučy aŭtamabili ŭ Jeŭropie, majuć prava raźličvać na viartańnie PDV.
— Možna zapłacić pradaŭcu canu bruta i potym čakać viartańnia sumy PDV, a možna zapłacić kampanii, jakaja dapamahaje z kuplaj, niejkuju kamisiju za toje, kab kupić mašynu pa canie nieta, — tłumačyć Jaŭhien. — Zvyčajna heta 1-2 adsotki ad koštu, kala 200 jeŭra. Naprykład, kali mašyna kaštuje bruta 12 tysiač, a nieta — 10 tysiač, to vy płacicie 10 200.
Za što jašče treba płacić:
— za dastaŭku. Mašyny jeduć na aŭtavozie pad CMR (hruzavyja transpartnyja nakładnyja), h. zn. sa strachoŭkaj adkaznaści pieravozčyka. Heta kaštuje ŭ siarednim 550-750 Jeŭra. Z Polščy, Čechii i Aŭstryi dastaŭka krychu tańniej, ź Italii, Danii ci Francyi — daražej. U vypadku Hiermanii, Bielhii abo Niderłandaŭ dastaŭka abychodzicca ŭ 650-700 jeŭra
— za afarmleńnie ekspartnych dakumientaŭ (ekspartnaja dekłaracyja EX1) — kala 40 jeŭra;
— za pasłuhi pa padbory aŭtamabila ŭ zaležnaści ad kampanii (ad 500 da 1 tys.rubloŭ.
Razam: da cany mašyny treba dadavać jašče jak minimum 1 tys. jeŭra.
«SB» pachvaliłasia, što skakun Niedasiekaŭ kupiŭ naviutkuju BMV, «jakoj zajzdrościć Cimanoŭskaja». Kolki kaštuje takoje aŭto?
