«My razhladajem prajekt jak adziny ŭ raźvićci našaha paŭnočnaha kłastara. Da kanca 2021 h. płanujem całkam abjadnać «Janhpur» i «Purnaftu», — cytuje pres-słužba dyrektara «Janhpura» Alaksandra Palakova.
Pavodle jaho słoŭ, pieramovy z bankam i byłym uładalnikam vialisia bolš za hod. Z nabyćciom «Purnafty» ahulnaja płošča aktyvaŭ «Janhpura» nablizicca da 2000 kvadratnych kiłamietraŭ.
«Purnafta» pracuje na rynku z 2007 hoda. Kampanija zajmajecca pošukam, raźviedkaj, zdabyčaj nafty i spadarožnaha naftavaha hazu na Uść-Purejskim licenzijnym učastku, jaki prymykaje da Iźvieścinskaha ŭčastka (heta — Jamała-Nienieckaja aŭtanomnaja akruha).
«Purnafta» maje fond z 69 śvidravin. «Janhpur» stała na 100% zasnavalnikam TAA «Purnafta».
«Biełarusnafta» ŭ 2013 hodzie vykupiła «Janhpur». Heta pieršy i adziny biełaruski aktyŭ, jaki zdabyvaje naftu ŭ Rasii.
Sioleta prajekt pa zdabyčy aceńvajecca ŭ 316 000 ton nafty i hazakandensatu i 1,23 miljarda kubamietraŭ spadarožnaha i pryrodnaha hazu. Kampanija raniej nabyła Paŭdniova-Tydeacinski ŭčastak, jaki joj treba budzie asvojvać z nula, u adroźnieńnie bahataha infrastrukturaj «Purnafty» Uść-Purejskaha ŭčastka.
Płanujecca, što z uviadzieńniem hetaha ŭčastka zdabyča «Janhpura» z ulikam nabytaj «Purnafty» dasiahnie abjomu zdabyčy vuhlevadarodaŭ na ŭsioj terytoryi Biełarusi.
Nahadajem, u lipieni Łukašenka padpisaŭ ŭkaz, pavodle jakoha «Biełarusnaftu» vyvieli z padparadkavańnia «Biełnaftachimu», kali kancern trapiŭ pad amierykanskija sankcyi.
