U prahramu ŭvajšli 24 filmy: 19 sa Šviecyi, Danii, Finlandyi, Isłandyi, Narviehii, Litvy, Łatvii i Estonii, a taksama piać ź Biełarusi.
Jak kaža zasnavalnica i prahramny dyrektar kinafiestyvalu Vola Čajkoŭskaja, dla jaje važna «nie tolki ŭklučać u prahramu filmy, jakija pakazali na bujnych mižnarodnych kinafiestyvalach i jakija našy hledačy naŭrad ci «adkapali» b u internecie i pahladzieli b prosta tak. Ale i
kab hetyja filmy zakranali temy, skažam, pravoŭ žančyn, hiendernych stereatypaŭ, chatniaha hvałtu, roŭnaści i inšych temaŭ, jakija źviazany z kaštoŭnaściami, jakija my padzialajem i jakija možna pakazvać i aśviatlać u Biełarusi ŭ ciapierašni momant».
Taksama joj padajecca istotnym nie tolki pahruzić hledačoŭ u atmaśfieru sacyjalnych tem i prablem, ale i ŭ atmaśfieru rassłableńnia i mahčymaści pahladzieć na surjoznyja temy z humaram.
«Tamu
ŭ našaj prahramie jość i kamiedyi nakštałt finskaha filma «Žaleznyja łedzi», i dackaj karciny «Piersona non hrata», i estonskaha vesterna «Apošnija», i łatvijskaha remiejka na Biełaśniežku «U lusterku»: adnačasova i humarny, i trahičny»,
— kaža Čajkoŭskaja.
U prahramie pradstaŭleny błok dakumientalnych stužak (siarod ich «Jak my hulali ŭ revalucyju», pryśviečanaja padziejam u Litvie ŭ 1980-ch), a taksama ŭłasna biełaruskaja prahrama.
Prablemam baćkoŭ i dziaciej pryśviečanyja stužki «Tata» Maryi Jakimovič i režysiorski debiut Voli Čajkoŭskaj «Ahulnaja mova».
Taksama ŭ prahramie karotki mietr «Sojka». Jaje źniała biełaruska z ZŠA Anastasija Sierhijeni, jakaja apisvaje adzin dzień z žyćcia emihrantki ź Biełarusi. U hałoŭnaj roli źniałasia aktrysa Lanka Hryu.
Aprača taho ŭ prahramie Źziańnia-2021 — industryjalnaja płatforma, jakaja sioleta składajecca z 12 anłajn-mierapryjemstvaŭ (lekcyi, razmovy i dyskusii na aktualnyja temy). Usie iventy buduć dastupnyja tolki tym hledačam, jakija nabyli chacia b adzin kvitok na sajcie kinafiestyvalu.
Nabyć kvitki možna na sajcie fiestyvalu. Ubačyć film možna budzie na praciahu sutak zhodna z raskładam. Usie stužki možna budzie hladzieć nie tolki na desktopach, ale i na mabilnych pryładach ios praz mabilny dadatak forumu.