Kamitet pa adukacyi Minharvykankama ahučyŭ, što da 1 vieraśnia ŭsie dziciačyja navučalnyja ŭstanovy nieabchodna abstalavać prapusknymi sistemami. Majucca na ŭvazie turnikiety, pryčym madel takoha abstalavańnia vybiraje sama škoła. Taksama ŭstalujuć dadatkovyja videakamiery. A ŭ pierśpiektyvie płanujecca zaklučać dahavory z Departamientam achovy MUS, kab supracoŭniki viedamstva dziažuryli ŭ škołach u dzionny čas.
Ale ž pasłuhi Departamienta achovy zvyčajna apłačvajucca. Pryčym majuć vyznačany prejskurant, jaki možna pahladzieć na sajcie MUS. Kruhłasutkavaja milicejskaja achova — «milicyjant, adna adzinka» — kaštuje 1736,26 rubloŭ za miesiac ci 14,68 rubloŭ za hadzinu.
Praviadziom prybliznyja padliki. Kali budzie patrabavacca dziažurstva tolki ŭ dzionny čas, to, napeŭna, varta ličyć 12 hadzin pracy milicyi — z 8 ranicy pa 8 viečara. Heta kaštuje 176,16 rubloŭ u dzień.
Z ulikam vychodnych i kanikuł u 2020/21 hodzie školniki vučylisia trochi bolš za 200 dzion za navučalny hod. Akruhlim da 200.
Atrymlivajecca, adna škoła zapłacić 35 232 rubla za hod achovy.
Pavodle źviestak Biełstata, na pačatak 2020/21 navučalnaha hodu ŭ Minsku naličvałasia 279 ustanoŭ siaredniaj adukacyi. Pamnažajem 279 na 35 tysiač — atrymlivajecca 9 miljonaŭ 765 tysiač rubloŭ. Stolki zapłaciać minskija škoły za pasłuhi milicyi.
Varta adznačyć, što padliki prybliznyja. Mahčyma, dla škoł uviaduć inšyja rascenki albo buduć dziejničać źnižki.
