Pierad adjezdam u ZŠA Cichanoŭskaja adznačyła, što meta jaje kamandy — pierakanać mižnarodnuju supolnaść u tym, što pieramieny ŭ Biełarusi mohuć adbycca ź ich dapamohaj.
Jak piša CNN, za apošni čas Cichanoŭskaja sustrełasia sa mnohimi amierykanskimi palitykami, u tym liku z daradcam Biełaha doma pa nacyjanalnaj biaśpiecy Džejkam Salivanam, dziaržaŭnym sakratarom Entani Blinkienam, administrataram Ahienctva pa mižnarodnym raźvićci Samantaj Paŭer i vykonvajučym abaviazki hienieralnaha dyrektara Ahienctva ZŠA pa hłabalnych miedyja Kiełu Čaa.
Kulminacyjaj vizitu Śviatłany Cichanoŭskaj u ZŠA stała sustreča z Džo Bajdenam u Biełym domie. Jak adznačaje Bloomberg, choć sustreča ŭjaŭlała saboj bolš simvaličnuju demanstracyju padtrymki demakratyčnaha ruchu ŭ Biełarusi, Śviatłana Cichanoŭskaja stała pieršym biełaruskim palitykam, jaki atrymaŭ pryjom takoha ŭzroŭniu ad lidara ZŠA.
Raniej Cichanoŭskaja zaklikała administracyju ZŠA ŭvieści bolš žorstkija sankcyi suprać peŭnych asob i arhanizacyj u Biełarusi. Cichanoŭskaja skłała kankretny śpis arhanizacyj, manapalizavanyja režymam i jaho prychilnikami, u tym liku «Biełaruśkalij», a taksama naftavyja, drevaapracoŭčyja i mietałurhičnyja pradpryjemstvy.
Śviatłana zajaviła, što na sustrečach zaklikaje amierykanskich čynoŭnikaŭ padtrymać pieramovy, nakiravanyja na praviadzieńnie novych vybaraŭ pad mižnarodnym nazirańniem, a taksama vyłučyć finansavańnie dla hramadzianskaj supolnaści i niezaležnych srodkaŭ masavaj infarmacyi ŭ Biełarusi.
Jak piša The Washington Post, Cichanoŭskaja paśla sustrečy z Bajdenam adznačyła, što heta «vialiki krok napierad, ale napieradzie jašče doŭhi šlach». «Ja zaručyłasia padtrymkaj Bajdena ŭ tym, što ZŠA buduć dapamahać Biełarusi ŭ našaj składanaj baraćbie». Lidarka adznačyła, što kankretnyja novyja sankcyi z prezidentam ZŠA nie abmiarkoŭvalisia, adnak zakranałasia nieabchodnaść uzmacnić cisk na režym Alaksandra Łukašenki.
Adnak niahledziačy na zajavy ab padtrymcy, novych mier z boku čynoŭnikaŭ ZŠA pakul nie było.
«Ja ŭpeŭniena, što novyja sankcyi buduć chutka ŭviedzienyja, i sankcyi ZŠA, razam ź jeŭrapiejskimi, buduć mieć vializny ŭpłyŭ na režym», — adznačyła Cichanoŭskaja ŭ intervju The Associated Press.
Choć sustreča Cichanoŭskaj z Bajdenam doŭžyłasia kala 15 chvilin, mnohija niezaležnyja ekśpierty padkreślivajuć jaje simvaličnuju značnaść.
«Biełaruskaja tema nabyła vielmi patrebnaje Biełarusi hučańnie. I dziakujučy aŭtarytetu ZŠA hety rezanans budzie adčuvacca va ŭsim zachodnim śviecie», — adznačaje ŭ intervju Deutsche Welle starejšy analityk Centra novych idej, eks-dypłamat Pavieł Macukievič. Na jaho dumku, heta važny akt salidaryzacyi i vialikaja dypłamatyčnaja pieramoha štaba Cichanoŭskaj.
Adnak Macukievič śćviardžaje, što bačyć sapraŭdnuju karyść vizitu tolki ŭ tym vypadku, kali amierykanski bok sfarmuluje stratehiju pa vyrašeńni biełaruskaha kryzisu, jaki budzie ŭklučać i prycelnyja sankcyjnyja miery, i dypłamatyčnyja namahańni, i niejkuju kaardynacyju dziejańniaŭ. Kali ŭsie abmiažujecca tolki dałučeńniem ZŠA da siektaralnych sankcyj, uviedzienych ES, to, na dumku ekśpierta, u sustrečy budzie admoŭny vynik. «Biełaruski režym na novyja sankcyjnyja miery ŭ dačynieńni da Biełarusi reahuje ŭzmacnieńniem cisku na hramadzianskuju supolnaść. Amal źniščanyja apošnija astraŭki svabody, i niama padstaŭ mierkavać, što represiŭnaja mašyna spynicca», — adznačaje Pavieł Macukievič.
Jak piša The New York Times, dypłamatyčnyja sustrečy źjaŭlajucca častkaj stratehii lidarki, nakiravanaj na stvareńnie zachodniaj kaalicyi suprać Alaksandra Łukašenki. U Cichanoŭskaj niama mahčymaści pracavać ź Biełarusi, bo na radzimie jaje čakaje aryšt. Asnoŭny instrumient, dastupny joj u vyhnańni, — zaručycca padtrymkaj Zachadu.
Padčas dypłamatyčnych sustreč Śviatłana Cichanoŭskaja zaklikaje da bolš rašučych dziejańniaŭ. Lidarka patrabuje sankcyj suprać biełaruskich čynoŭnikaŭ, kab pakazać im, što «padtrymka Łukašenki abychodzicca ŭsio daražej».
Taksama The New York Times adznačaje, što hałoŭnaja zadača, jakaja staić ciapier pierad Cichanoŭskaj, — zachavać svoj upłyŭ u Biełarusi. Niekatoryja z tych, chto padtrymlivaje Cichanoŭskuju, niepakojacca, što demakratyčny ruch słabieje ŭ Biełarusi, pakul jaho lidarka za miažoj.
«Kali ty za miažoj u biaśpiecy, to ŭsie zakliki da dziejańniaŭ mohuć skieptyčna ŭsprymacca ŭnutry Biełarusi», — miarkuje Pavieł Słunkin, navukovy supracoŭnik Jeŭrapiejskaj rady pa mižnarodnych adnosinach i były biełaruski dypłamat. Słunkin taksama adznačaje, što ŭžo doŭhi čas Cichanoŭskaja efiektyŭna abaraniaje biełaruskija intaresy na mižnarodnym uzroŭni, ale represii ŭ Biełarusi tolki ŭzmacniajucca.
«Čym bolš času znachodzišsia za miažoj, tym bolš addalaješsia ad hramadstva, pradstaŭnikom jakoha źjaŭlaješsia, — adznačaje Arciom Šrajbman u intervju The New York Times. — Ščyra kažučy, kali pravieści hod pa-za miežami krainy i nie bačyć užyvuju, jak źmianiajecca hramadstva, to kamunikacyja abmiažoŭvajecca tolki toj častkaj hramadstva, jakaja ŭsio jašče zachoŭvaje aktyŭnaść».
Cichanoŭskaja śćviardžaje, što ŭśviedamlaje svaju adkaznaść za toje, jak jaje dziejańni mohuć paŭpłyvać na palitviaźniaŭ, u tym liku na jaje muža, jaki znachodzicca za kratami z traŭnia minułaha hoda. «Ja ni na chvilinu nie zabyvajusia, što moj muž u zakładnikach, jak i tysiačy inšych ludziej, — śćviardžaje lidarka. — My prysłuchoŭvajemsia da ludziej, vyznačajem, da čaho jany hatovyja, i napružanaść raście. Nichto nie viedaje, što moža stać šturškom da novych masavych demanstracyj».
