«MFV dapamoža kožnaj krainie-siabru arhanizacyi», — skazała jana.
U miežach hetaj razdačy hrošaj Biełaruś taksama maje atrymać ažno 950 miljonaŭ dołaraŭ. Hetyja hrošy nie źviazanyja i mohuć vydatkoŭvacca «na padtrymku ekanomiki» tak, jak hetuju «padtrymku» razumieje atrymalnik.
Vakoł hetych hrošaj u hety momant razhortvajecca cełaja historyja. Najpierš, amal miljard nie moža być atrymany prosta pieravodam. Kali kazać prosta, to heta «ček», jaki atrymalnik moža abmianiać na funty, dołary ci jeŭra ŭ jeŭrapiejskim ci amierykanskim banku.
Vyhladaje, što hety «ček» aficyjny Minsk atrymaje, i z hetym užo mała što možna zrabić. Heta pavinna adbycca ŭžo da kanca žniŭnia.
Tak, New York Times piša, što padčas vajažu pa štatach lidar demakratyčnych sił Cichanoŭskaja i jaje kamanda «nie zdoleli pierakanać pradstaŭnikoŭ MVF admovicca ad vydačy hrošaj Biełarusi».
Jak tłumačać «Našaj Nivie» abaznanyja krynicy, reč u tym, što rehłamient vydačy srodkaŭ nie ŭličvaje ŭnutranuju situacyju ŭ krainach. Heta naradžaje palityčny aksiumaran: adnoj rukoj Zachad zaciskaje režym i pazbaŭlaje jaho ekanamičnaj samastojnaści, a druhoj rukoj daje vializny kredyt dla pieraadolvańnia svaich ža namahańniaŭ.
Takim čynam, kali nie ŭdasca spynić «vydaču čeka», to dziejańni demakratyčnych siłaŭ, možna mierkavać, buduć zasiarodžany na tym, kab nie dapuścić jaho abmiena na realnyja hrošy ŭ zachodnich bankach.
Imavierna, Cichanoŭskaj i kamandzie ŭdałosia zaručycca ŭ hetaj spravie padtrymkaj šeraha amierykanskich sienataraŭ, jakija trymajucca dumki, jakaja stała daminavać pry Trampie, što mižnarodnym arhanizacyjam nielha daviarać, bo jany karumpavanyja i kiepska sinchranizujucca z realnaj palitykaj.
Varta nahadać, što daradca vykanaŭčaha dyrektara MVF — biełarus Alaksandr Zabaroŭski. U Biełarusi jon byŭ pamočnikam Miaśnikoviča ŭ Akademii navuk, paźniej zajmaŭ pasady namieśnika ministra ekanomiki i hałoŭnaha daradcy staršyni Nacbanka. U Amieryku Łukašenka adpuskaŭ Zabaroŭskaha vielmi nieachvotna. Ci jość jahonaja rola ŭ situacyi z hrašyma, i jakaja kankretna, pakul nieviadoma.
Nazirajem.
