Palina Šarenda-Panasiuk
Prykładna pałova z tych, chto pryjšoŭ padtrymać Palinu, nie zmahli trapić u zału suda — nie chapiła miescaŭ. Praŭda, svajakoŭ puścili. Padtrymać žonku pryjšoŭ jaje muž Andrej, jaki znachodzicca pad chatnim aryštam — na jaho zaviedzienyja dźvie kryminalnyja spravy.
Andrej Šarenda
Da taho ž, pa novaj sudovaj modzie milicyjanty kateharyčna zabaranili zdymać navat pierad pačatkam pasiadžeńnia.
Akramia taho, na ŭvachodzie va ŭsich patrabavali vyklučyć mabilnyja. Mahčyma, heta nastupstva taho, što videa z suda, dzie palitviazień Łatypaŭ rezaŭ sabie horła, akazałasia ŭ siecivie praź ličanyja chviliny.
Na Palinu Šarendu-Panasiuk zaviali až try kryminalnyja spravy: pavodle art. 364 KK («Hvałt albo pahroza vykarystańnia hvałtu ŭ dačynieńni supracoŭnika orhanaŭ unutranych spravaŭ»), art. 368 (abraza prezidenta) i art. 369 (abraza pradstaŭnika ŭłady). Maksimalnaje pakarańnie — da 6 hadoŭ pazbaŭleńnia voli.
Paciarpiełymi pa spravie prachodziać až 7 milicyjantaŭ.
«Ustańcie, kali łaska», — zaklikali ŭsich, kali ŭ zału ŭvajšoŭ sudździa.
«Pierad bandytami nie ŭstaju», — adkazała abvinavačanaja.
«Musicie davać pakazańni stojačy, inakš ja mahu vas vydalić», — papiaredziŭ sudździa.
Paśla hetaha žančyna ŭsio ž ustała.
Palina Šarenda-Panasiuk zamužam, maci dvaich niepaŭnaletnich dziaciej (chłopčyki 5 i 12 hadoŭ). Pracuje repietytaram, raniej sudzimaściaŭ nie mieła.
«Ź jakoha dnia pad vartaj?» — spytaŭ sudździa.
«Zachoplenaja ŭ pałon 3 studzienia», — adkazała žančyna.
Uvohule jana nie stolki adkazvała na pytańni, kolki aburałasia tym, što adbyvajecca i situacyjaj u krainie.
«Ja vas nie liču sudom. Palityčnyja represii ničoha supolnaha z sudom nie majuć», — nieadnarazova paŭtaryła jana.
«Chočacie zajavić advod sastavu suda?» — spytaŭ sudździa ŭ Paliny.
«Vy nie sud».
«Pa jakich pryčynach?»
«Stalinskaja trojka, palavaja žandarmieryja, ale vy nie sud».
«Vy zajaŭlajecie mnie advod?» — spytaŭ sudździa.
«Zajaŭlaju ŭsioj sistemie», — byŭ adkaz. Paśla Šarenda-Panasiuk jašče niekalki razoŭ paŭtaryła — vy nie sud. I dadała: ja ŭstaju tolki tamu, što da mianie mohuć prymianić hvałt, jak jaho prymianiali ŭ SIZA.
Paśla sudździa vyjšaŭ, kab pryniać rašeńnie ab advodzie samoha siabie. Vynik čakany — chadajnictva ab advodzie adchilić.
Advakat paprasiŭ źmianić Palinie mieru strymańnia na padpisku ab niavyjeździe. Prakuror nie padtrymaŭ. Sudździa adchiliŭ hetaje chadajnictva.
U momanty, kali da jaje piersanalna nie źviartalisia, Palina pakazalna čytała niejkuju knižku.
Zatym začytali abvinavačańnie: 29 śniežnia, majučy namier naŭmysna abrazić dvuch milicyjantaŭ patrulna-pastavoj słužby, žančyna raźmiaściła ŭ telehram-kanale «Brest: čutki i fakty» videarolik, dzie z maciukami nazyvała dvuch milicyjantaŭ karnikami i fašystami.
Hetaje videa jana źniała padčas zatrymańnia jaje muža 29 śniežnia 2020 hoda.
Taksama padčas ahladu žylla žančyna abraziła 4 milicyjantaŭ. Niekatoryja abrazy prakuror začytaŭ, cenzurujučy maciuki: «milicyja, idzicie na ch…», «prastytutki», «kurvy», «pajšoŭ na ch… sa svaimi śledčymi dziejańniami», «bandyty bandytničajuć» i hetak dalej.
Akramia taho, padčas ahladu Šarenda-Panasiuk plunuła ŭ tvar adnamu ź siłavikoŭ i vykazała jamu: «łukašysty čortavy». Zatym naniesła siłaviku ŭdar u vobłaść levaha plača.
Tam ža inšamu milicyjantu sarvała masku z tvara, padrapaŭšy tvar kala nosa. Jamu ž skazała: «s…ka łukašysckaja!»
Tam ža vykazvała ŭ adras prezidenta abrazy z vykarystańniem niecenzurnaj leksiki. Ich, praŭda, prakuror čamuści ahučvać nie staŭ.
«Zrazumieła vam abvinavačańnie?» — spytaŭ sudździa.
«Heta nie abvinavačańnie, heta palityčna matyvavany pieraśled», — skazała Šarenda-Panasiuk. Paśla zamiest adkazu pačała začytvać manifiest: narod — suvieren, jon vybraŭ kiraŭnikom dziaržavy Cichanoŭskuju. U Biełarusi raźviazanaja vajna suprać naroda, masačny režym vykarystoŭvajecca bandytami dla ananimizacyi…
«Vinu pryznajacie?» — spytaŭ sudździa.
«Padkreślivaju, toje, što ja tut znachodžusia, heta palityčna matyvavany pieraśled. Heta kryminalnaja sprava, u jakoj paśla vas abvinavaciać. Vy ŭdzielničajecie ŭ palityčnych represijach», — skazała Palina.
«Vy pryznajacie vinu?»
«A vy pryznajacie, što ŭdzielničajecie ŭ palityčnych represijach?»
«Pytańni sudu nie zadajuć. Vinavataj siabie nie pryznajacie?» — jašče raz spytaŭ sudździa.
«Dać adpor bandytu — honar i abaviazak hramadzianina, — adkazała Šarenda-Panasiuk. — Ja nie abvinavačanaja, ja palitźniavolenaja. Patrabuju spynić hety cyrk».
Zatym dapytali paciarpiełych milicyjantaŭ. Žančyna-ŭčastkovaja raspaviała pra dzień, kali ŭ kvatery Šarendy-Panasiuk pravodzili ahlad.
«Dobraachvotna jana adkryvać kvateru nie zachacieła, zajaviŭšy: «Milicyja, idzicie nachier!» — zhadała paciarpiełaja. — Paśla ŭzłamali dźviery i ŭvajšli. Abvinavačanaja abražała milicyjantaŭ ahułam i kankretna prysutnych. U adzin z momantaŭ padyšła da amapaŭca i plunuła tamu ŭ tvar, trapiŭšy na kaŭnier. Inšy zrabiŭ zaŭvahu, abvinavačanaja sadrała ź jaho tvara masku, padrapaŭšy nos ź levaha boku.
Inšy milicyjant pierachapiŭ joj ruku i skazaŭ: «aściarožniej z rukami!»
U adkaz abvinavačanaja naniesła milicyjantu vypad druhoj rukoj u vobłaść tvaru. Paśla hetaha na jaje adzieli kajdanki».
Učastkovaja paćvierdziła, što Šarenda-Panasiuk nieadnarazova vykazvała abrazy ŭ adras Alaksandra Łukašenki ŭ niecenzurnaj formie. Na zaŭvahi nie reahavała.
Inšyja paciarpiełyja faktyčna raspaviali toje ž samaje: vykazvała abrazy, pavodziła siabie ahresiŭna, nie reahavała na zaŭvahi. «Jak tolki niejkuju hadaść zrobić, adrazu dzicia ŭ ruki biare — prykryvajecca», — raspavioŭ adzin z paciarpiełych.
U adździaleńni milicyi Šarenda-Panasiuk ad tłumačeńniaŭ admoviłasia, zamiest podpisu napisała: «fakt palityčnych represij paćviardžaju».
Kali sudździa cikaviŭsia, ci jość pytańni ŭ abvinavačanaj, jana adkazvała čarhovaj pramovaj pra falsifikacyju vybaraŭ.
Amapaviec, jaki staŭ achviaraj plaŭka ŭ tvar, davaŭ pakazańni pa aŭdyjasuviazi. Cikava, što jaho hołas skazili nie da brutalnaha huła, jak heta lubiać rabić u svaich videa siłaviki, a naadvarot, hołas byŭ padobny da mulciašnaha — nibyta amapaviec nadychaŭsia hielijem z pavietranych šarykaŭ.
Jak toj kazaŭ, hołas śmiešny, a situacyja — nie vielmi.
Hety siłavik paćvierdziŭ słovy inšych paciarpiełych: nie chacieła adkryvać dźviery, ich uzłamali, paśla z bok Šarendy-Panasiuk pačalisia kryki, abrazy.
«Padyšła da mianie, pačała abražać, plunuła ŭ mianie. Ja ŭchiliŭsia, trapiła mnie ŭ plačo i trochi ŭ tvar. Taksama jana ŭdaryła mianie ŭ plačo», — raspavioŭ niabačny amapaviec.
Jon zajaviŭ pazoŭ na 2000 rubloŭ.
«Čym matyvavany vaš pazoŭ?»
«Jana pryniziła mianie, plunuła mnie ŭ tvar», — patłumačyŭ toj.
Dapytali i milicyjantaŭ, jaki paciarpieli ad vykładvańnia videarolika z abrazami.
Adzin ź ich raspavioŭ: u toj dzień jon z kaleham zatrymlivaŭ Andreja Šarendu. Toj išoŭ z synam. Paprasiŭ advieści syna dadomu, milicyjanty nie dazvolili, maŭlaŭ, pazvani žoncy, chaj vyjdzie. Jana vyjšła adrazu z telefonam i pačała zdymać videa, palivajučy milicyjantaŭ abrazami. Nieŭzabavie hetaje videa akazałasia ŭ internecie.
Hety ž paciarpieły padaŭ pazoŭ: choča 1500 rubloŭ. Kaža, što pakazaŭ rolik žoncy, taja skazała: heta abraza, jana abražaje ciabie i siamju.
«Stres pieražyŭ nie tolki ja, ale i maja siamja», — skazaŭ paciarpieły.
«Pryznajacie pazoŭ?» — spytaŭ sudździa Šarendu-Panasiuk.
«Mahu tolki pavinšavać hetych dvuch mužčyn sa sposabam, jaki jany vybrali, kab karmić siamju, — adkazała taja. — Hrošy ź mianie spahoniać, vy atrymajecie hetyja 30 srebranikaŭ, ale jany nie pryniasuć vam ščaścia, zhadajcie, jak skončyŭ Iuda».
«Pryznajacie pazoŭ?» — pierapytaŭ sudździa.
«Nie. Heta nie pazoŭ, heta rabaŭnictva».
Druhi milicyjant-pepeeśnik paćvierdziŭ słovy svajho kalehi: abvinavačanaja abražała ich, nazyvała Fašyst №1 i Fašyst №2.
Jon taksama zajaviŭ pazoŭ na 1500 rubloŭ, bo pieranios «maralnyja pakuty, [abvinavačanaja] pryniziła maje honar i hodnaść svaimi słovami i videarolikam»
«Abvinavačanaja, pazoŭ pryznajacie?» — spytaŭ sudździa.
«Dziakuju mižnarodnaj supolnaści za ŭviadzieńnie sankcyj suprać režymu Łukašenki i zaklikaju da mižnarodnaha trybunała!» — skazała Šarenda-Panasiuk.
Paśla dapytali śviedkaŭ, adzin ź ich — milicyjant — raspavioŭ, što ŭbačyŭ videa z abrazami ŭ telehram-kanale. Druhi śviedka, rabočy restarana, byŭ paniatym padčas praviadzieńnia ahladu ŭ kvatery Paliny i Andreja.
«Žančyna pavodziła siabie z vyklikam, abražała pa-ŭsiakamu, u adnaho z amapaŭcaŭ plunuła, druhomu padrapała nos», — koratka raspavioŭ jon. Paćvierdziŭ, što abvinavačanaja vykazvała abrazy ŭ adras prezidenta.
«Žachlivyja ahresiŭnyja pavodziny, jašče i pry małym dziciaci», — acharaktaryzavaŭ padziei śviedka.
«Abvinavačanaja, ci jość pytańni?»
«Vam nie soramna?» — pacikaviłasia Šarenda-Panasiuk u sudździ.
«Vy nie možacie zadavać pytańni sudu. Pytańni da śviedki?»
«Vam nie soramna?» — spytała Palina ŭ śviedki.
«Pytańnie zdymajecca».
«Sumleńnie jość?»
«Pytańnie zdymajecca».
«Jak u vočy svajakam budziecie hladzieć?»
Sudździa źniaŭ i hetaje pytańnie. Zatym abviaściŭ pierapynak da 14:30.
* * *
Nahadajem, Palina Šarenda-Panasiuk za kratami z pačatku studzienia. Siłaviki vyłamali dźviery ŭ jaje kvatery, praviali ahlad, skanfiskavali šerah rečaŭ, a Palinu zatrymali i ŭ kajdankach advieźli ŭ IČU. Paźniej jaje pieraviali ŭ SIZA.
Padčas źniavoleńnia žančynu niekalki razoŭ źmiaščali ŭ karcar, jana skardziłasia na psichałahičny i fizičny cisk.
Jaje muž Andrej Panasiuk adsiedzieŭ bolš za 60 sutak, navat novy 2021 hod sustrakaŭ za kratami. Ciapier jon pad chatnim aryštam, na jaho zaviali spravu pa art. 368 KK (abraza prezidenta) i art. 361 (zakliki da dziejańniaŭ, nakiravanym na pryčynieńnie škody nacyjanalnaj biaśpiecy Respubliki Biełaruś). Jaho pryznali palitviaźniem, Palinu — pakul nie, bo dla hetaha pravaabaroncy musiać mieć upeŭnienaść, što hvałtu ŭ dačynieńni da milicyi nie było, albo heta była samaabarona.
Padrabiaźniej pra siamju Paliny i Andreja čytajcie tut.
