Fota cfncm.org
U adnoj z rehijanalnych słužb chutkaj dapamohi Brytanii ŭpieršyniu vykarystali robataŭ-paramiedykaŭ dla niepramoha masažu serca. Novaja technałohija daść miedykam mahčymaść nadzialić bolš uvahi inšym aśpiektam sardečna-lohačnaj reanimacyi.
Prateściravać robaty pad nazvaj LUCAS 3 vyrašyła Paŭdniova-centralnaja słužba chutkaj dapamohi, jakaja absłuhoŭvaje anhlijskija hrafstvy Bierkšyr, Bakinhiemšyr, Oksfardšyr i Chempšyr. 28 robataŭ byli pieradadzienyja bryhadam paramiedykaŭ z hetych hrafstvaŭ, piša Daily Mail.
LUCAS 3 — heta miechaničnaja sistema, jakaja moža vykonvać jakasny niepramy masaž serca biez spynieńnia ad momantu, kali bryhada paramiedykaŭ pačynaje pracavać z pacyjentam, da jaho pryjezdu ŭ špital. U situacyi, kali čałaviek straciŭ prytomnaść i nie dychaje, taki masaž vyklučna važny dla zabieśpiačeńnia ŭsiaho arhanizma kroŭju i kisłarodam.
Košt adnaho robata — amal $17 tysiač, ale pry hetym LUCAS 3 zdolny značna palehčyć praces reanimacyi. Kali miedyki robiać masaž serca ŭručnuju, jany mohuć stamicca, što paŭpłyvaje na jakaść masažu. Časam pacyjentaŭ treba pieramiaščać ź miescaŭ, dzie masaž rabić niazručna, abo rabić im masaž padčas pieravozki pacyjentaŭ u špital na vysokaj chutkaści. Robat dazvolić zrabić masaž bolš biaśpiečnym i jakasnym, a miedyki atrymajuć mahčymaść zaniacca inšymi aśpiektami reanimacyi pacyjenta.