20 krasavika Minski haradski sud razhledzieŭ apielacyju na prysud žurnalistcy TUT.BY Kaciarynie Barysievič. 2 sakavika sud Maskoŭskaha rajona prysudziŭ jaje da šaści miesiacaŭ pazbaŭleńnia voli pa spravie ab «nul pramile». Prakuratura paličyła taki prysud zanadta miakkim — i padała pratest.
Razhlad apielacyi byŭ pryznačany na 14-ju hadzinu. Pasiadžeńnie prachodziła ŭ zakrytym režymie.
U 14.08 u zału zajšli advakaty žurnalistki. Razhlad apielacyi doŭžyŭsia kala 50 chvilin. A 15-j hadzinie ŭ zału stali zapuskać słuchačoŭ.
U 15.20 sudovaja kalehija abviaściła rašeńnie: pakinuć prysud Kaciarynie Barysievič — paŭhoda pazbaŭleńnia voli — u sile. Apielacyjnyja pratest i skarhu sud pakinuŭ biez zadavalnieńnia.
Heta značyć, što ŭžo mienš čym praź miesiac Barysievič zmoža być doma.
U pracesie Kaciaryna Barysievič udzielničała pa videasuviazi z Žodzinskaha SIZA.
Kryminalnuju spravu ŭ dačynieńni da Kaciaryny Barysievič i Arcioma Sarokina raspačali 19 listapada 2020 hoda. Ich abvinavacili ŭ razhałašeńni miedyčnaj tajamnicy, što, na dumku Hienprakuratury, paciahnuła ciažkija nastupstvy. Maksimalnaje pakarańnie pavodle hetaha artykuła — try hady pazbaŭleńnia voli. Nahadajem, 13 listapada 2020 hoda za aŭtarstvam Kaciaryny Barysievič vyjšaŭ artykuł, u jakim sa spasyłkaj na miedycynskija dakumienty i kamientar lekara śćviardžałasia, što ŭ kryvi Ramana Bandarenki nie było vyjaŭlena etanołu. Pieršyja asoby zajaŭlali, što pamierły chłopiec byŭ pjany.