«Jaho niemahčyma zabaranić prosta tamu, što niemahčyma zabaranić Biełaruś.
Nie, možna, viadoma, vydać cyrkular i dumać, što heta niešta źmienić. Ale nie źmienić ničoha. BČB budzie da taho času, pakul budzie Biełaruś.
Łohika jabaciek takaja: raz ściah vykarystoŭvali kałabaracyjanisty, značyć, što jon fašyscki i ad jaho treba admovicca. Paśladoŭnaje raźvićcio hetaj łohiki nie ŭ tym, kab prapanoŭvać jabaćkam, u takim vypadku, zabaranić i ściahi Bielhii ci Rasii. Dla hetaha ŭ ich ruki karotkija, dy i dzie Bielhija taja znachodzicca, jany na karcie nie pakažuć.
Paśladoŭnaje raźvićcio hetaj łohiki ŭ tym, što pad hetym ściaham była zasnavana sučasnaja biełaruskaja dziaržava Respublika Biełaruś. I, kali ŭžo ściah «fašyscki», to i ad dziaržavy, što vykarystoŭvała jaho, treba admovicca? Abo pahadzicca, što ŭsie my žyviom u pieršapačatkova ŭ asnovie svajoj u «fašysckaj» dziaržavie?
Unikalnaść i sakralnaść BČB u tym, što heta — nacyjanalny ściah, jaki źjaviŭsia ŭ toj histaryčny momant, kali biełarusy zajavili pra siabie jak pra sfarmavanuju nacyju. Mienavita pad im byli zasnavanyja abiedźvie biełaruskija nacyjanalnyja dziaržavy — i BNR, i RB. Hety ściah — simvał nacyi i simvał adbytaj i aformlenaj u 1991-m nacyjanalnaj dziaržavy. Mienavita ŭ hetaj dziaržavie my žyviom užo 30 hadoŭ i mienavita bieł-čyrvona-bieły byŭ simvałam jaje źjaŭleńnia i zastajecca simvałam isnavańnia.
Ab dziejnaj simvolicy hetaha skazać nielha. Heta — varyjacyi na simvoliku ideałahičnaj dziaržavy SSSR, u jakoj intaresy ludziej, narodaŭ i nacyj byli zasunutyja na tryccać treci płan, kab dahadzić niejkim niežyćciazdolnym ideałahičnym i tearetyčnym kanstrukcyjam, što paciarpieli ŭ vyniku poŭny krach. U vyniku čaho poŭny krach paciarpieła i taja dziaržava, źnikšy z karty śvietu.
Sproby naviazać ideałahičnuju (suprać nacyjanalnaj) simvoliku pamierłaj dziaržavy sučasnaj nacyi — palityčnaja niekrafilija i nie bolš za toje. Budučyni na takim fundamiencie nie pabuduješ. I całkam łahična, što pryjšoŭ momant, kali ŭ hramadstvie heta zrazumieli. Mahčyma, jašče nie ŭsie, ale praces pajšoŭ i jon niezvarotny.
U 90-ja hady ja hladzieŭ adzin futbolny matč, pamiž Hiermanijaj i Hałandyjaj. Hałandskija zaŭziatary prymudrylisia praciahnuć na trybunu rovar, jaki padniali z płakatam: «Bolš nie adbieracie». Užo nie viedaju, prydumaŭ kamientatar hetuju historyju na chadu, ci takoje i napraŭdu było, ale jon patłumačyŭ, što padčas Druhoj suśvietnaj nacysty ŭviali ŭ Niderłandach zabaronu na vieliki.
Hałandcy, viadoma, nie zrabili z rovara nacyjanalny simvał tolki tamu, što jaho zabaraniali niemcy. Transpartny srodak zastaŭsia tym, čym i byŭ, — transpartnym srodkam.
Sapraŭdy hetak ža i naš BČB, jakija b idyjockija rasparadžeńni chto ni vydavaŭ, nazaŭždy zastaniecca tym, čym jon jość, — ściaham, pad jakim sfarmavałasia biełaruskaja nacyja i była zasnavanaja isnaja biełaruskaja dziaržava — Respublika Biełaruś.
A paśla ŭsich tych pakut, jakija byli (i, napeŭna, na žal, jašče buduć) pad im vyniesienyja — jašče i sapraŭdnaj śviatyniaj.
