Fota Depositphotos.com
Źmieny ŭ Apple palahajuć u tym, što mabilnyja prahramy buduć vymušanyja zaprošvać źviestki karystalnikaŭ pierad tym, jak adsočvać ich aktyŭnaść. Heta abmiažuje źviestki, jakija Facebook atrymlivaje ad prahram, kab stvarać profili svaich karystalnikaŭ, jakija zatym dazvalajuć rekłamadaŭcam na Facebook tarhietavać svaju rekłamu, piša The Wall Street Journal.
Hetyja źmieny taksama ŭskładniać rekłamadaŭcam prahlad addačy ad rekłamy, jakuju jany zapuskajuć na Facebook. Budzie składana daviedacca, kolki ludziej bačać tuju ci inšuju rekłamu na svaich mabilnych telefonach, i kolki ź ich u vyniku ŭstaloŭvajuć tuju ci inšuju mabilnuju prahramu.
«Rynačnaja dynamika tut mocna źmienicca», — ličyć Sajman Poŭłtan, vice-prezident pa ličbavym intelekcie z ahienctva Wpromote. «Kali chtości zajmajecca markietynham na Facebook, a efiektyŭnaść ad rekłamy na hetaj płatformie źnižajecca, to vidavočna, što Facebook budzie hublać rekłamadaŭcaŭ».
Pradstaŭniki Facebook adchilajuć płan Apple. Na minułym tydni Mark Cukierbierh padčas svajho dakłada zajaviŭ: «Apple karystajecca svaim daminantnym stanoviščam na płatformie, kab umiešvacca ŭ pracu našych i inšych dadatkaŭ».
Apple abaraniaje svaju palityku i zajaŭlaje, što addaje pieravahu kanfidencyjalnaści karystalnikaŭ.
Pradstaŭniki Facebook ličać, što Apple pavodzić siabie antykankurentna, bo karystajecca svaim kantrolem nad App Store dla atrymańnia vyhody za košt małoha biznesu i raspracoŭščykaŭ dadatkaŭ.
Adzin z faktaraŭ, jaki robić Facebook mocnym biznesam, palahaje ŭ tym, što sacyjalnaja sietka źbiraje źviestki z mabilnych prahram: što ludzi šukajuć u ich, što nabyvajuć i šmat inšaha. Pa źviestkach analityčnaj kampanii MightySignal, pa stanie na śniežań bolš za 85 000 iOS-dadatkaŭ ustalavali kod Facebook, jaki pieradaje sacyjalnaj sietcy źviestki pra karystalnikaŭ. Hetyja źviestki Facebook dalej vykarystoŭvaje ŭ profilach, što vielmi dapamahaje rekłamadaŭcam.
Rekłamadaŭcy śćviardžajuć, što takaja funkcyja Facebook robić hetu płatformu pryvabnaj dla raźmiaščeńnia rekłamy. Źviestki z dadatkaŭ dajuć mahčymaść aptymizavać rekłamu dla ludziej, jakija, imavierna, stanuć prybytkovymi klijentami. Naprykład, mabilnaja hulnia, jakaja zaležyć ad pakupak u dadatku, moža tarhietavać rekłamu na karystalnikaŭ z historyjaj vialikich vydatkaŭ u inšych hulniach.
Zapłanavanyja źmieny Apple faktyčna aznačajuć toje, što Facebook nie atrymaje źviestak karystalnikaŭ praz mabilnyja prahramy bieź ich dazvołu. Akramia hetaha, Facebook budzie pazbaŭleny mahčymaści pakazvać markietołaham, nakolki dobra pracuje ich rekłama na płatformie.
