U čaćvier, 24 śniežnia, vośmy raz za apošnija dva miesiacy ŭ Minsku sudzili studenta-čaćviortakurśnika BDUIR i eks-supracoŭnika navukova-techničnaha centra KDB Jana Sałanoviča. Pasiadžeńnie prachodziła ŭ sudzie Partyzanskaha rajona. Z ulikam terminaŭ pa papiarednich pratakołach, za kratami małady čałaviek pavinien pravieści 114 dzion, piša Tut.by.

Spravu viadzie sudździa Michaił Makarevič. Advakat Dźmitryj Pihul zajaviŭ advod sudździ. Sud heta rašeńnie adchiliŭ.

Sudziać studenta za padziei 25 kastryčnika. U materyjałach adznačajecca, što ŭ hety dzień Jan udzielničaŭ u vuličnym šeści na praśpiekcie Niezaležnaści, jakoje nie było ŭzhodniena ź Minharvykankamam. Padčas masavaha mierapryjemstva jon z hrupaj hramadzian vykazvaŭ svaju niezadavolenaść «pa fakcie ŭsiaho taho, što adbyvajecca ŭ Respublicy Biełaruś». Upieršyniu za dva miesiacy vinu małady čałaviek nie pryznaŭ. Paviedamiŭ, što nie pamiataje, što było ŭ toj dzień. Na ŭdakładnieńnie, ci ŭdzielničaŭ jon u šeści, adkazaŭ: «Napeŭna». Mahčyma, miarkuje, u hety dzień jon apynuŭsia pa adrasie, što ŭ pratakole, bo vaziŭ na mašynie dziadźku na dačny ŭčastak i jany prajazdžali pa praśpiekcie.

Jan kaža, što nie viedaŭ, što mierapryjemstva niesankcyjanavanaje. Na vulicu, tłumačyć, jon vyjšaŭ, kab realizavać svajo kanstytucyjnaje prava — «na vykazvańnie svaich palityčnych pohladaŭ».

Na pracesie Jan paviedamiŭ, što na minułym tydni ŭmovy ŭtrymańnia krychu stali bolš žorstkimi, ciapier praktyčna kožny dzień im treba padymać nary. Ni ŭ duš, ni na prahułki jaho nie vodziać. Listoŭ za ŭvieś hety čas jon ni razu nie atrymlivaŭ. Paštovaja skrynia jaho mamy, jak vyśvietlicca paźniej, taksama pustuje ŭvieś hety čas. Paźniej abaronca paviedamić TUT.BY, što mama studenta padała ŭ prakuraturu zajavu pa adbyvańni spahnańnia. Siamja skardzicca na toje, što Jana nie vyvodziać na vulicu, nie vodziać u duš i pazbaŭlajuć karespandencyi.

U svaim vystupie advakat nazvaŭ umovy, u jakich utrymlivajecca Jan, katavańniami.

Rašeńnie pa spravie studenta sudździa Michaił Makarevič pryniaŭ na miescy — 15 sutak. Z ulikam terminaŭ pa papiarednich pratakołach, za kratami małady čałaviek pavinien pravieści 114 dzion.

Nahadajem, Jana Sałanoviča zatrymali ŭ niadzielu, 1 listapada, padčas maršu ŭ Kurapaty. Nazaŭtra sud daŭ jamu 12 sutak, ale, adsiedzieŭšy ich, na volu Jan tak i nie vyjšaŭ. Jak paźniej vyśvietliŭ advakat, padčas razboru małady čałaviek paviedamiŭ, što ŭ znak pratestu vychodziŭ na vulicu sa žniŭnia, i pieraličyŭ 15 epizodaŭ.

Pravaabaroncy pryznali Jana palitviaźniem i patrabujuć nieadkładna jaho vyzvalić.

Chłopiec pracavaŭ u KDB i chadziŭ na Maršy. Ciapier jamu biaskonca dajuć sutki — užo nabieh 71 dzień na Akreścina

Клас
Панылы сорам
Ха-ха
Ого
Сумна
Абуральна