Fota Volhi Šukajła, Tut.by
«Kali pryjšła na pracu paśla taho, jak adbyła administracyjny aryšt, na maim stale lažała ŭžo napisanaja zajava na zvalnieńnie. Maja kiraŭnička skazała, što my raźvitvajemsia albo pavodle ŭłasnaha, albo pavodle artykuła, raspaviadaje Anastasija Klešč, były juryst Nacbanka. Z rabotnicaj vyrašyli razarvać pracoŭnyja adnosiny paśla taho, jak sud joj daŭ 15 sutak pa artykule 23.34. U dadatak da hetaha dziaŭčynu vysialajuć ź internata, bo tam jana žyvie pa chadajnictvie najmalnika, piša Tut.by.
Naścia adpracavała ŭ Nacbanku ŭsiaho 2,5 miesiaca. Za apošnija 4 miesiacy na dziaŭčynu dvojčy składali pratakoł pa artykule 23.34 — udzieł u niesankcyjanavanym masavym mierapryjemstvie, i adzin raz pa 23.4 — niepadparadkavańnie pry zatrymańni.
— Pieršy raz mianie pryciahnuli za 6 vieraśnia. Mianie sfatahrafavali na płoščy ŭ Hrodnie, kali ja pryjazdžała tudy na vychodnyja. Tym razam ja atrymała štraf, — raspaviadaje Nasta. — Druhi raz mianie zatrymali 15 listapada. Ja pryjšła na «Płošču pieramienaŭ», pryniesła kvietki da narodnaha miemaryjała Ramanu Bandarenku. Potym pačuła vybuchi, vyrašyła zajści ŭ hości da siabroŭki, jakaja žyvie ŭ domie pobač z płoščaj. My asabliva nie sačyli, što adbyvałasia ŭ dvary, pili harbatu.
Praź niejki čas da nas u dźviery pahrukali. Heta byli siłaviki.
My adkryli. Nam skazali, što my kidalisia kamianiami ŭ supracoŭnikaŭ AMAPa. Adkaz, što ŭ nas niama kamianioŭ i vokny vychodziać na druhi bok doma, a nie ŭ dvor, ich nie pierakanaŭ. Nastupnaj viersijaj było, što my kidalisia kamianiami na vulicy, a potym zabiehli siudy i schavalisia.
Nasta kaža, što ničoha takoha jany nie rabili. Adnak, pa jaje słovach, im prapanavali prajechać u RUUS i dać tłumačeńnie, što jany rabili ŭ kvatery.
— My vyrašyli nie supraciŭlacca i pajšli ź siłavikami. Na mianie skłali pratakoł pa artykule 23.34. A za toje, što heta ŭžo druhi pryvad, pastavili jašče i artykuł 23.4 za nibyta supraciŭ pry zatrymańni.
U pratakole było napisana, što ja chapałasia za formiennaje abmundziravańnie ludziej, jakija mianie zatrymlivali, upirałasia nahami ŭ ziamlu. Heta pry tym, što mianie zatrymali ŭ kvatery na 14 paviersie, — adznačaje dziaŭčyna. — Pa sukupnaści mnie dali 15 sutak. Adbyvała ja ich u Mahilovie.
Naścia kaža, što ŭ izalatary padchapiła karanavirus. Adrazu paśla vyzvaleńnia jana pajšła ŭ palikliniku, joj zrabili test, jon byŭ stanoŭčy. Na balničnym jana była mienš za dva tydni.
— Kali vyjšła na pracu, znajšła na svaim pracoŭnym stale napisanuju za mianie zajavu na zvalnieńnie. Kiraŭnik patelefanavała i skazała mnie, što siońnia jany sa mnoj raźvitajucca, ale ja mahu vybrać jak: budzie zvalnieńnie pa artykule albo pa ŭłasnym žadańni. Heta mahło być zvalnieńnie za nieadpaviednaść zajmanaj pasadzie albo za ździajśnieńnie niejkaj praviny, haniebnyja pavodziny dziaržaŭnaha słužačaha. Tamu ja vyrašyła syści pavodle ŭłasnaha, — praciahvaje surazmoŭnica. — Mianie raźličyli, navat vypłacili materyjalnuju dapamohu da adpačynku, u jaki ja tak i nie sychodziła.
U dadatak da taho, što Naścia zastałasia biez pracy, joj ciapier jašče treba šukać i žyllo. Dziaŭčyna nie minčanka i žyła ŭ internacie z 2015 hoda.
— Ja žyvu tut pa chadajnictvie najmalnika, a najmalnika ŭ mianie ciapier niama. Mnie skazali ŭ trochdzionny termin vyzvalić pamiaškańnie, prynieśli apaviaščeńnie. Pakul ja chvareła, mnie dazvalali tut zastavacca, bo nielha było vychodzić z domu. Ale i ciapier vyzvalić pakoj ja nie mahu, pakul nie raźbiarusia z pracaj. Tym bolš, što vysielić mianie mohuć tolki pa rašeńni suda. Albo možna pasprabavać prynieści novaje chadajnictva ad najmalnika, ale tut užo nieviadoma zadavolać jaho ci nie, — kaža jana.
Naścia skončyła jurfak BDU. Adrazu pracavała jurystam u nievialikich pryvatnych firmach, zajmałasia pravavym zabieśpiačeńniem dziejnaści pradpryjemstvaŭ i trochi kadravaj pracaj. Potym uładkavałasia ŭ «Bielinviestbank», pracavała bolš za 6 hadoŭ. Kaža, što tam joj vielmi padabałasia.
— Spačatku ja była ŭ jurydyčnym Departamiencie, potym va ŭpraŭleńni pa pracy z prablemnymi aktyvami. Ja zajmałasia spahnańniem zapazyčanaści — praca z nataryusami, sudami, adkazy na zvaroty hramadzian i jurydyčnych asob. Byŭ momant, kali ja pracavała sa spravami ab bankructvie, pačynajučy ad padačy zajavy i zakančvajučy likvidacyjaj. Na apošnim miescy pracy ja była bolš jurystam pravaprymianialnaj praktyki. Heta praca ŭ tym liku i z Nacbankami inšych dziaržaŭ — u mianie byŭ Kyrhyzstan.
Sioleta letam Nasta prajšła pierapadrychtoŭku ŭ Instytucie biznesu BDU, atrymała druhuju vyšejšuju pa śpiecyjalnaści pierakładčyk-refierent — vyvučyła anhlijskuju movu.
Kaža, što ŭ Nacbank pajšła tamu, što chaciełasia niešta pamianiać, pasprabavać niešta novaje.
Ciapier Naścia šukaje pracu. Jaje ŭžo zaprasili na niekalki sumoŭjaŭ.
— Ja hatovaja navat śfieru dziejnaści pamianiać, hałoŭnaje, kab u mianie atrymlivałasia rabić heta, było dastatkova navykaŭ, viedaŭ i ŭmieńniaŭ. Nu i vielmi važna pracavać u dobrym kalektyvie, — adznačaje dziaŭčyna. - Jurystam pracavać mnie taksama padabajecca, pajšła b na jakoje-niebudź pradpryjemstva.
U reziume ŭ hrafie z žadanym zarobkam Nasta ŭkazała «ad 1500 rubloŭ».
— Heta minimum, na jaki možna žyć i zdymać kvateru ŭ Minsku, - miarkuje jana.
Što skazali ŭ Nacbanku nakont hetaha zvalnieńnia
My źviarnulisia ŭ Nacbank pa kamientar adnosna situacyi i spytali, ci moža być padstavaj dla zvalnieńnia rabotnika pryciahnieńnie jaho da administracyjnaj adkaznaści pa artykule 23.34. Atrymać vyrazny adkaz nie ŭdałosia.
— Nacyjanalny bank skasoŭvaje pracoŭnyja adnosiny z rabotnikami pa padstavach, praduhledžanych Pracoŭnym kodeksam. Adnym z takich padstaŭ źjaŭlajecca prośba rabotnika ab skasavańni pracoŭnych adnosin pa pahadnieńni bakoŭ, - skazali ŭ Nacbanku.
***
Kali vy chočacie prapanavać Naście pracu, možna napisać joj na elektronnuju poštu [email protected].
