Palitviazień Ihar Łosik u liście z turmy patłumačyŭ pryčyny svajoj haładoŭki pratestu i źviarnuŭsia da nieabyjakavych biełarusaŭ, piša Radyjo Svaboda.
«Ja abviaściŭ haładoŭku, bo bolš nie zastałosia nijakaj mahčymaści paŭpłyvać na nieabhruntavanyja abvinavačańni i majo niepravamiernaje znachodžańnie pad vartaj. Ja niespraviadliva pazbaŭleny voli i mahčymaści ŭbačyć svaju siamju. Za apošnija šeść miesiacaŭ ja prapuściŭ vielmi šmat. Najbolš kryŭdna, što nie pačuŭ pieršyja słovy svajoj dački».
«Praz paŭhoda mnie pradjavili jašče adno absurdnaje abvinavačańnie — padrychtoŭku da ŭdziełu ŭ masavych biesparadkach. Jak heta mahčyma, kali da majho zatrymańnia ni pra jakija «masavyja biesparadki» naahuł havorki nie išło? U hety čas nie było viadoma, čym skončycca rehistracyja kandydataŭ u prezidenty. Mabyć, z punktu hledžańnia śledstva, ja ŭmieju pradkazvać budučyniu», — napisaŭ Ihar Łosik.
Dobra ŭsio abdumaŭšy i ŭzvažyŭšy ŭsie «za» i «suprać», błohier advažyŭsia na haładoŭku pratestu, kab damahčysia spraviadlivaści.
«Ja cudoŭna razumieju: śledam za abviaščeńniem haładoŭki na mianie moža pačacca cisk: mohuć pieravieści ŭ adzinočku ci ŭ karcar, pazbavić asabistych rečaŭ, listoŭ, presy, znosinaŭ z advakatam. Ja mahu zajmieć surjoznyja prablemy sa zdaroŭjem ci navat pamierci. Ale dziela mahčymaści znoŭ abniać dačku ja hatovy iści da kanca. Usio jašče vieru ŭ reštki sumleńnia tych ludziej, jakija kantralujuć rasśledavańnie hetych lipavych abvinavačvańniaŭ», — zajaviŭ Ihar Łosik.
U spravie pryciahnieńnia ŭvahi da aburalnaj niespraviadlivaści i adnaŭleńni pravoŭ paŭtary sotni palityčnych viaźniaŭ Ihar Łosik vykazaŭ spadzieŭ na padtrymku nieabyjakavych biełarusaŭ, mižnarodnych arhanizacyj, ambasadaraŭ krain ES, uradaŭ demakratyčnych dziaržavaŭ.
«Dapamažycie ŭsim nievinavatym viarnucca dadomu. Naša siamja, jak i siemji inšych viaźniaŭ sumleńnia, užo dastatkova napakutavalisia za apošni čas. Ja spyniu haładoŭku tolki paśla źniaćcia ź mianie ŭsich abvinavačańniaŭ abo źmieny miery strymańnia», — padkreślivaje Ihar Łosik.
