Adzinyja apładysmienty za čas vystupu kiraŭnika Kamiteta dziaržaŭnaj biaśpieki Ivana Cierciela na hrodzienskim «Azocie» prahučali, kali jamu adkazaŭ načalnik adnaho z cechaŭ pradpryjemstva.
Voś dasłoŭnaja stenahrama hetaha momantu sustrečy. Varta adznačyć, što heta było pieršaje pytańnie z zały. Pierad hetym staršynia KDB raskazvaŭ, jak dziejničaje palicyja ŭ ZŠA i jakija ekanamičnyja prablemy pieražyvajuć krainy Jeŭropy.
«Načalnik cecha:
— U mianie niekalki pytańniaŭ, ale pierad tym, jak ich zadać, chaču prakamientavać vašy słovy.
Što tyčycca Polščy, Hiermanii. Sprava ŭ tym, što ŭ ludziej, jakija siadziać u zale, šmat rodzičaŭ, u kaho dzieci, u kaho inšyja, pracujuć za miažoj. My ź pieršych vusnaŭ viedajem, što tam robicca, tamu ja b nie zusim z vami pahadziŭsia, što tam čort viedaje što.
Što tyčycca Amieryki, vy nie zabyvajcie, što tam volny prodaž zbroi, i tam luby hramadzianin moža volna jaje nabyć. Tamu dziejańni palicejskaha hetym abhruntavanyja, bo ŭ jaho [kaho amierykanski palicejski zatrymlivaje] ŭ kišeni moža pistalet lažać. U nas, prabačcie, ludzi biez zbroi.
Što ŭ vašym razumieńni demakratyja takoje, voś vy patłumačcie, kab my razumieli? My zrazumieli adno: nie vysoŭvajciesia, siadzicie, inačaj vas «zamočać u sarciry». (Vybuch apładysmientaŭ.)
Adkaz Ivana Cierciela:
— Polšča zajmaje takuju pazicyju ŭ dačynieńni da Respubliki Biełaruś — ahresiŭnuju, nie raźličanuju na blizkija intaresy. Jana nie aceńvaje svaje stratehičnyja intaresy na pierśpiektyvu. U Polščy svaje prablemy, pra jakija ja kazaŭ. Vy admaŭlajecie, što tam pa niadzielach adbyvajucca manifiestacyi?
Ludzi z zały, dziasiatki hałasoŭ: Suprać abortaŭ!
Cierciel: Šmattysiačnyja manifiestacyi suprać abortaŭ prachodziać…
Ludzi z zały, dziasiatki hałasoŭ: Nie!
Cierciel: …Jość nacyjanalisty, jość niezadavolenyja partyjaj «Prava i spraviadlivaść», pierakryvajecca darožny ruch…
Žančyna z zały: Aj-jaj-jaj, jak strašna!
Cierciel: Kali łaska! Što tyčycca ZŠA: a što, Aŭtuchovič nie byŭ uzbrojeny?
Hołas z zały: A dzie vy jaho ŭziali ŭvohule? (Vybuch śmiechu ŭ zale.)
Cierciel: A što, vybuch mašyny supracoŭnika AMAPa kala dziciačaha sada — heta narmalna?
(Šum u zale.)
Žanočy hołas: «A zabojstva — heta narmalna, čałavieka?»
Mužčynski hołas: «Dzie lalkavody rasijskija dzielisia?»
Cierciel: Lalkavodaŭ rasijskich vy pabačycie. Tavaryš Babaryka pojdzie ŭ sud, usio projdzie hałosna — i vy ŭsio pabačycie.
Što tyčycca demakratyi… (Šum u zale.) Ja ž vas słuchaju ŭvažliva, pravilna?.. Pieršaje, kali brać z pazicyi nie hladzieć internet, a realnyja rečy — a tyja, pra jakija ja viedaju, jość dźvie formy ŭździejańnia na susieda: haračaja faza vajny i pramaja siła — pakul u nas mirna z susiedziami, ale idzie da hetaha, — druhoje — miakkaja siła tak zvanaja.
Miakkaja siła — heta vyłučeńnie srodkaŭ, prajekty, kulturnaje prasoŭvańnie, jakich vy nie adčuvajecie. Vy dumajecie, što syr biaspłatny — jon nie biaspłatny.
Hołas z zały: Dy jaki syr?
Cierciel: Što datyčyć demakratyi, to prasoŭvańnie demakratyi — heta prasoŭvańnie Zachadam svaich intaresaŭ. Heta maja subjektyŭnaja pazicyja jak čałavieka, jaki vałodaje situacyjaj.
Ja ŭvohule liču, što demakratyja — heta palittechnałohija.
Hołas z zały: Dy niaŭžo?
Cierciel: Pasprabujcie mianie pierakanać u advarotnym. Jość roznyja teoryi: i teoryja elit, i teoryja hramadskaj damovy, chto vučyŭsia, viedaje heta ŭsio. Pa vialikim rachunku, heta ŭsio palittechnałohii.
Miarkujučy pa aŭdyjazapisie sustrečy Ivana Cierciela, jak i pa videa jaho anałahičnaha vystupu na «Naftanie» ŭ Navapołacku dy inšych sustreč dziaržaŭnych čynoŭnikaŭ na pradpryjemstvach, vystupoŭcy nie razumiejuć aŭdytoryi i nie viedajuć hramadskich nastrojaŭ u cełym.
Čynoŭniki vystupajuć pierad ludźmi tak, niby pierad imi nieadukavanyja ludzi, jakija ŭsiamu vierać, dla jakich adzinaja krynica infarmacyi — BT. Miarkujučy pa reakcyi załaŭ, na ludziej heta robić katastrafičnaje ŭražańnie.
«Vy tut nam zajaŭlajecie, što naša sistema robić, a ŭ mianie voś rabotniki z kavidam pa dva-try dni čakajuć, pakul ich u balnicu nakirujuć, bo niama miescaŭ. Z televizara — adno, a pa fakcie — druhoje», — aburana zajaviŭ u tvar Ciercielu rabotnik cecha «Karbamid».
«Dyk heta kancepcyja nacyjanalnaj biaśpieki, kab statystyka była takoj, lehkatraŭnaj, skažam tak?» — kpiŭ z kiraŭnika KDB inšy rabotnik.
