Sud Savieckaha rajona Minska siońnia razhladaŭ dźvie spravy za vyviešvańnie bieł-čyrvona-biełych ściahoŭ na bałkonach. Ludziej zatrymali ŭ ich kvaterach i adpravili na sutki.
Ilustracyjnaje fota Nadziei Bužan
Andrej Maroz vyviesiŭ ściah na łodžyi 3 śniežnia. A na nastupny dzień da jaho pryjšła milicyja. Uviečary piatnicy pazvanili ŭ damafon, spytali, ci nie ŭ jaho ŭ voknach ściah. Mužčyna admaŭlać nie staŭ. Milicyjanty ŭ formie padnialisia da jaho ŭ kvateru, zabrali ściah i skazali: «Źbirajciesia, pajedziem z nami». Maŭlaŭ, u vas tut adzinočny pikiet. Na prośbu spasłacca na zakon ničoha ŭciamnaha nie adkazali.
«Nu vy ž viedajecie, što ciapier za heta karajuć» — heta byŭ ich adziny arhumient. Kazali: «Vy što, internet nie hladzicie, naviny nie čytajecie?» — pryvodziać toj dyjałoh rodnyja mužčyny.
Andreja zabrali na Akreścina. 7 śniežnia byŭ sud. Śviedka-milicyjant zapeŭnivaŭ, što da mužčyny niaraz prychodzili i vietliva prasili źniać ściah — sam Andrej heta admaŭlaŭ, — a ŭvahu źviarnuli, bo nibyta patelefanavaŭ chtości z žycharoŭ i paskardziŭsia.
Advakat, jaki prysutničaŭ na sudzie, dakazvaŭ, što ŭ Biełarusi nie zabaroniena vyviešvać na łodžyju rečy roznych koleraŭ, a niesankcyjanavanaha mierapryjemstva tam być nie moža — heta pryvatnaja kvatera, jaki dazvoł harvykankama? Adnak pa artykule 23.34 Andreju dali 13 sutak.
«Pravilna kažuć: 1937 hod pryjšoŭ, u kožnaha pavinien być sabrany čamadančyk», — uzdychajuć jaho rodnyja.
U piatnicu ŭviečary pryjšli i da Viktoryi Laščynskaj. Dziaŭčyna paśpieła napisać siabroŭkam i pazvanić maci, skazać, što jaje zatrymlivajuć.
«My pajechali da Savieckaha RUUSa. Była infarmacyja, što Viku ŭnačy adpuściać. My čakali, mabyć, da dźviuch hadzin nočy, ale marna. Na nastupny dzień daviedalisia, što jaje ŭnačy advieźli na Akreścina. U niadzielu vyjšła žančyna, jakaja była ź joj u kamiery, skazała, što tam ciopła i jość srodki hihijeny», — padzialiŭsia siabra Viktoryi.
Dziaŭčynu sudzili pa artykule 23.34. Tyja ž 13 sutak. U pratakole zapisali, što ściah byŭ raźmieščany z metaj publičnaha vykazvańnia niezadavolenaści, svaich hramadska-palityčnych pohladaŭ. Na sudzie Viktoryja raspaviadała, što ŭ jaje nie pytalisia, navošta jana vyviesiła ściah, a listoŭ z papiaredžańniem źniać jaho z bałkona dziaŭčyna raniej nie atrymlivała.
Abodva pracesy vioŭ sudździa Savieckaha rajona Siarhiej Šaciła. Bieł-čyrvona-biełyja ściahi, jakija kanfiskavali ŭ haradžan, jon pastanaviŭ źniščyć.
Hety ž sudździa ranicaj razhladaŭ spravu hramadzianki Šviejcaryi Natalli Chierše. Za toje, što žančyna sarvała bałakłavu z amapaŭca, jon daŭ joj 2,5 hoda kałonii.
