Tut.by
Na žanočym maršy 19 vieraśnia Natalla Chierše sarvała bałakłavu z amapaŭca, paśla čaho na jaje zaviali kryminalnuju spravu. Siońnia jana vystupiła ŭ sudzie Savieckaha rajona Minska z apošnim słovam. Sud vioŭ Siarhiej Šaciła, piša Radyjo Svaboda.
Pry zatrymańni, pavodle słužbovaha raparta, žančyna nie padparadkavałasia patrabavańniu supracoŭnikaŭ prajści ŭ śpiectranspart i «akazała supraciŭ z hvałtam» u dačynieńni da bajca AMAPa Siarhieja Končyka: vyryvałasia i ŭpirałasia, padrapała 22-hadovamu milicyjantu tvar, ściahnuła ź jaho bałakłavu, tym samym sapsavaŭšy formiennaje abmundziravańnie, i naniesła «cialesnyja traŭmy».
Žančyna svaju vinu nie pryznała ŭ tym, što ŭdzielničała ŭ niesankcyjanavanym mitynhu i nibyta naniesła amapaŭcu cialesnyja paškodžańni. Zajaviła, što ŭdzielničała ŭ mirnaj akcyi pratestu i sprabavała źniać bałakłavu.
«Ja žyvu ŭ jeŭrapiejskaj demakratyčnaj krainie, dzie svaboda słova i mirnych schodaŭ biezumoŭna vykonvajucca i vyznačanyja Kanstytucyjaj, dzie palicejskija nie chavajuć svaje tvary pad maskami i abaraniajuć svaich hramadzianaŭ. Spadziajusia, heta budzie i ŭ svabodnaj, volnaj Biełarusi», — skazała Natalla ŭ apošnim słovie.
Pieršaje sudovaje pasiadžeńnie prajšło 4 śniežnia. Prakuror prasiła prysudzić Natalli Chierše 2 hady 6 miesiacaŭ pazbaŭleńnia voli, a taksama spłacić paciarpiełamu amapaŭcu 1000 rubloŭ kampiensacyi maralnaj škody.
Pamier drapiny kala voka byŭ daŭžynioj 1 santymietr, košt bałakłavy — 1 rubiel, prahučała na pieršym sudovym pasiadžeńni z materyjałaŭ spravy.
Pieršapačatkova paciarpieły Siarhiej Končyk zapatrabavaŭ ad Natalli Chierše 100 rubloŭ u jakaści kampiensacyi maralnaj škody, adnak užo padčas pasiadžeńnia pavysiŭ sumu da 1000 rubloŭ.
