Dniom 6 śniežnia sotni ludziej u Breście pryjšli raźvitacca z Ramanam Rašeckim, jaki niečakana pamior u siabie ŭ kvatery 4 śniežnia, paviedamlaje Bresckaja hazieta. Ludzi prynieśli z saboj čyrvonyja i biełyja kvietki, u nahach u Ramana pakłali BČB-ściah.
Viadomy brescki aktyvist Vital Kazak, jaki vioŭ raźvitalnuju cyrymoniju kala doma, byŭ zatrymany i dastaŭleny ŭ Leninski RAUS.
Raman Rašecki byŭ aktyŭnym udzielnikam pratesnaha ruchu ŭ Breście, za što nie raz pryciahvaŭsia da administracyjnaj adkaznaści. Apošni raz ź IČU jon vyjšaŭ za dva dni da śmierci.
Napiaredadni śmierci sudovyja vykanaŭcy apisali majomaść u jaho kvatery pa starych daŭhach za parušeńnie PDR. Pa słovach rodnych, u mužčyny spyniłasia serca: jon loh spać i nie pračnuŭsia.
Ramanu Rašeckamu było 43 hady. U jaho zastalisia žonka i čaćviora dziaciej.
